મનોરંજન / વીરુની તબિયત પૂછવા ધર્મેન્દ્રના ઘરે પહોંચ્યા અમિતાભ બચ્ચન, જુઓ વીડિયો

બોલીવૂડના પ્રખ્યાત અભિનેતા ધર્મેન્દ્ર હાલ ઘરે આરામ કરી રહ્યા છે, કારણ કે તેમને હોસ્પિટલમાંથી ડિસ્ચાર્જ મળી ગયો છે. તાજેતરમાં શ્વાસ લેવામાં તકલીફને કારણે તેમને હોસ્પિટલમાં દાખલ કરવામાં આવ્યા હતા, પરંતુ હવે તેમની તબિયતમાં સુધારો જોવા મળી રહ્યો છે. પરિવારની ઈચ્છા મુજબ, હવે ધર્મેન્દ્રનો આખો ઈલાજ ઘરેથી જ કરવામાં આવશે. આ વચ્ચે તેમના જૂના મિત્ર અને બોલીવૂડના શેહન્શાહ, અમિતાભ બચ્ચન તેમના સ્વાસ્થ્યની ખબર લેવા તેમના ઘરે પહોંચ્યા.

સોશિયલ મીડિયા પર એક વીડિયો ઝડપથી વાયરલ થઈ રહ્યો છે, જેમાં અમિતાભ બચ્ચનને ધર્મેન્દ્રના ઘરે બહાર તેમની કારમાં બેઠેલા જોવામાં આવ્યા છે.

View this post on Instagram

A post shared by Zoom TV (@zoomtv)

વીડિયોમાં દેખાય છે કે અમિતાભ પોતે જ કાર ડ્રાઈવ કરી રહ્યા છે, જ્યારે પાપારાઝી તેમની આસપાસ એકઠા થઈ ગયા છે. બંને દિગ્ગજ કલાકારોની મિત્રતા દાયકાઓ જૂની છે, અને જ્યારે પણ એકબીજા પર મુશ્કેલી આવે છે ત્યારે બંને એકબીજાના સહયોગી બની રહે છે. ધર્મેન્દ્રને હોસ્પિટલમાંથી ડિસ્ચાર્જ મળ્યા બાદ તેમના ચાહકોમાં ખુશીનું વાતાવરણ છે. ઘણા લોકોએ સોશિયલ મીડિયા પર તેમની સારી તબિયત માટે શુભેચ્છાઓ આપી છે. થોડા દિવસો પહેલાં જ્યારે તેમના હોસ્પિટલમાં દાખલ થવાની ખબર બહાર આવી હતી, ત્યારે ચાહકોમાં ચિંતા છવાઈ ગઈ હતી. દરેકે પ્રાર્થના કરી હતી કે બોલીવૂડના ‘હીમેન’ જલદી સ્વસ્થ થઈ જાય.

હાલમાં ધર્મેન્દ્રના પરિવારના સભ્યો તેમની નજીક રહીને તેમની દેખભાળ કરી રહ્યા છે. તેમને જરૂરિયાતની તમામ સુવિધાઓ ઘર પર જ ઉપલબ્ધ કરાવવામાં આવી છે જેથી તેઓ આરામથી સ્વસ્થ થઈ શકે. તબીબોના જણાવ્યા મુજબ, તેમની હાલત સ્થિર છે અને ધીમે ધીમે સુધારાની દિશામાં આગળ વધી રહી છે. આ વચ્ચે સોશિયલ મીડિયા પર ખોટી અફવાઓ પણ ફેલાઈ હતી કે ધર્મેન્દ્રનું અવસાન થયું છે. આ ખોટી માહિતી સામે તેમની પત્ની અને અભિનેત્રી હેમા માલિનીએ કડક પ્રતિક્રિયા આપી હતી. તેમણે પોતાના સોશિયલ મીડિયા પર પોસ્ટ કરીને જણાવ્યું કે ધર્મેન્દ્ર સંપૂર્ણપણે સલામત છે અને ઘરે આરામ કરી રહ્યા છે. તેમણે ચાહકોને વિનંતી કરી કે આવી ખોટી અફવાઓ પર વિશ્વાસ ન કરે.

આ પણ વાંચો : જૂનો ટપ્પુ 8 વર્ષ પછી 'તારક મહેતા...' શોમાં પરત ફરશે? મેકર્સે જણાવી સચ્ચાઈ

અમિતાભ બચ્ચનની મુલાકાત એ દર્શાવે છે કે બોલીવૂડની આ જૂની મિત્રતા આજે પણ એટલી જ જીવંત છે જેટલી પહેલાં હતી. બંનેએ અનેક ક્લાસિક ફિલ્મોમાં સાથે કામ કર્યું છે જેમ કે શોલે, ચુપકે ચુપકે અને રામ બલરામ, જે આજેય ચાહકોના દિલમાં તાજી છે. ચાહકો માટે આ વીડિયો આશાનું સંદેશ લઈને આવ્યો છે કે ધર્મેન્દ્ર સ્વસ્થ થઈ રહ્યા છે અને તેમની સાથે અમિતાભ જેવા મિત્રો ઉભા છે. લોકો આશા રાખી રહ્યા છે કે જલદી જ ધર્મેન્દ્ર ફરી એકવાર પર્દા પર તેમની એવરગ્રીન સ્મિત અને એનર્જી સાથે દેખાશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ