- મહાઠગ કિરણ પટેલના 12 સ્થળે તપાસ
- 12 સ્થળો પર EDએ પાડ્યા દરોડા
- તપાસમાં વાંધાજનક દસ્તાવેજો મળી આવ્યા
મહાઠગ કિરણ પટેલે PMOના અધિકારી હોવાનું જણાવીને અનેક લોકોને ચૂનો ચોપડ્યો હોવાની ફરિયાદો નોંધાયા બાદ તપાસ ચાલી રહી છે. કિરણ પટેલની ધરપકડ બાદ મહાઠગના એક પછી એક કારનામા બહાર આવી રહ્યા છે. ત્યારે કિરણ પટેલની મુશ્કેલીઓમાં વધારો થયો છે. કારણ કે હવે કેન્દ્રીય તપાસ એજન્સી EDએ પણ આ મામલે તપાસ શરૂ કરી છે.
એકસાથે 12 ઠેકાણાઓ પર દરોડા
ગઈકાલે એન્ફોર્સમેન્ટ ડિરેક્ટોરેટ (ED)ની ટીમોએ કિરણ પટેલના એક સાથે 12 ઠેકાણાઓ પર દરોડા પાડ્યા હતા. મહાઠગ કિરણ પટેલના સાગરિતો પર EDએ મોટી કાર્યવાહી કરી છે. જમ્મુ-કાશ્મીર પોલીસની ફરિયાદનાં આધારે ED કાર્યવાહી કરી રહી છે.
વાંધાજનક દસ્તાવેજો મળી આવ્યા
ઈડીની ટીમ દ્વારા અમદાવાદ, ગાંધીનગર, મોરબી અને મહેસાણામાં 12 સ્થળોએ દરોડા પાડવામાં આવ્યા હતા. એન્ફોર્સમેન્ટ ડિરેક્ટોરેટ (ED)ની ટીમોએ કિરણ પટેલનાં સાથી જય સીતાપરા, હાર્દિક ચંદ્રાણા, વિઠ્ઠલ પટેલ, અમિત પંડ્યા અને પિયુષ વસીટાને ત્યાં સર્ચ ઓપરેશન હાથ ધર્યું હતું. એવું કહેવામાં આવી રહ્યું છે કે, તપાસ દરમિયાન અમુક સ્થળેથી વાંધાજનક દસ્તાવેજો મળી આવ્યા છે. તપાસમાં જમીનના દસ્તાવેજની સાથે સાથે ગુનાહિત પ્રવૃતિની સામગ્રી પણ મળી આવી હતી.
માલિની પટેલને અપાયા છે જામીન
આપને જણાવી દઈએ કે, મહાઠગ કિરણ પટેલની પત્ની માલિની પટેલના સેશન્સ કોર્ટે 16 મેના રોજ મોરબી GPCBમાં છેતરપિંડીના કેસમાં જામીન મંજૂર કર્યા છે. જામીન મંજૂર કરતાની સાથે જ કોર્ટે પોલીસ તપાસમાં સાથ સહકાર આપવાની ટકોર કરી છે. મહત્વનું છે કે, મોરબીના વેપારીને GPCBનું લાયસન્સ અપાવવાના બહાને મહાઠગ અને તેની પત્નીએ છેતરપિંડી આચરી હતી.
