ફૂડ સેફ્ટી એન્ડ સ્ટાન્ડર્ડ ઓથોરિટી ઓફ ઈન્ડિયા એટલે કે FSSAI એ તમામ ઈ-કોમર્સ ફૂડ બિઝનેસ ઓપરેટરોને ચેતવણી આપી છે કે તેઓ તેમની વેબસાઈટ દ્વારા હેલ્થ ડ્રિંક અને એનર્જી ડ્રિંક જેવા શબ્દોનો દુરુપયોગ ન કરે.
FSSAI એ ઈ-કોમર્સ પ્લેટફોર્મને તેમની વેબસાઈટ પર વેચાતા ખાદ્યપદાર્થો અને પીણાંને યોગ્ય કેટેગરીમાં વર્ગીકૃત કરવા જણાવ્યું છે, જેથી યોગ્ય માહિતી લોકો સુધી પહોંચે અને ગ્રાહકો યોગ્ય ઉત્પાદનો ખરીદી શકે. હેલ્થ ડ્રિંક્સ અને એનર્જી ડ્રિંક્સના નામે ઈ-કોમર્સ પ્લેટફોર્મ પર આવા ઘણા પીણાં વેચવામાં આવે છે, જે ધોરણોને પૂર્ણ કરતા નથી. FSSAI એ આવા પીણાંના વર્ગીકરણ અંગે ઈ-કોમર્સ કંપનીઓને કડક સૂચના આપી છે.
FSSAIએ કહ્યું છે કે વેબસાઇટ્સ દ્વારા વેચવામાં આવતા ખાદ્ય ઉત્પાદનોનું યોગ્ય વર્ગીકરણ નક્કી કરવું જોઈએ અને વેચાણ વધારવા માટે આવા શબ્દોનો ઉપયોગ ન કરવો જોઈએ, જે નિયમો હેઠળ માન્ય નથી. FSSAI એ તમામ ઈ-કોમર્સ ઓપરેટરોને સલાહ આપી છે કે તેઓ તેમની વેબસાઈટ પર 'હેલ્થ ડ્રિંક' અથવા 'એનર્જી ડ્રિંક'ની કેટેગરીમાંથી આવા પીણાંને દૂર કરે કારણ કે આ રીતે યોગ્ય રીતે વિભાજન ન કરવું ગ્રાહકોમાં મૂંઝવણ પેદા કરે છે.
FSSAI એ સ્પષ્ટ કર્યું છે કે 'હેલ્થ ડ્રિંક' શબ્દ FSS એક્ટ 2006 અથવા તેના હેઠળ બનાવેલા નિયમો હેઠળ ક્યાંય વ્યાખ્યાયિત નથી. હકીકતમાં, ફૂડ કેટેગરી સિસ્ટમ (FCS) 14.1.4.1 અને 14.1.4.2 (કાર્બોનેટેડ અને નોન-કાર્બોરેટેડ વોટર બેઝ્ડ ફ્લેવર્ડ ડ્રિંક્સ) હેઠળ લાઇસન્સ પ્રાપ્ત ઉત્પાદનો પર જ એનર્જી ડ્રિંકનો ઉપયોગ કરવાની મંજૂરી છે. પરંતુ એનર્જી ડ્રિંક્સ કે હેલ્થ ડ્રિંકના નામે બજારમાં આવી અનેક પ્રોડક્ટ્સ આડેધડ વેચાઈ રહી છે.
વધુ વાંચો : નોકરીયાત વર્ગ આ રીત અપનાવી ઈન્કમ ટેક્સમાં મેળવી શકે છે વર્ષે લાખોની રાહત
સાથે જ એમ પણ કહ્યું છે કે તેનો ઉદ્દેશ્ય ઉત્પાદનોની ગુણવત્તા અંગે સ્પષ્ટતા અને પારદર્શિતા લાવવાનો છે, જેથી ગ્રાહક ખોટી માહિતીને કારણે એવી વસ્તુ ન ખરીદે જે તેના સ્વાસ્થ્ય માટે સારું ન હોય. FSSAIએ પ્રોપ્રાઈટરી ફૂડના નામે આવા ઉત્પાદનોનો પ્રચાર અને વેચાણ કરવાનો નિર્દેશ આપ્યો છે. Proprietary foodમાં એવા ખોરાકનો સમાવેશ થાય છે જે ખાદ્ય સુરક્ષા અને ધોરણોમાં પ્રમાણિત નથી.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
