લાઈફસ્ટાઈલ / ડાયાબિટીસના દર્દીઓ સાવધાન! ખભાનો દુખાવો હોઈ શકે છે ફ્રોઝન શોલ્ડરની નિશાની

જો તમને ડાયાબિટીસ છે અને છેલ્લા કેટલાક સમયથી ખભામાં દુખાવો, જકડાણ અથવા હાથ હલાવવામાં મુશ્કેલી અનુભવાઈ રહી હોય તો તેને સામાન્ય સમસ્યા માનીને અવગણશો નહીં. તબીબી ભાષામાં આ સ્થિતિને ‘ફ્રોઝન શોલ્ડર’ કહેવામાં આવે છે. એક અભ્યાસ મુજબ, ડાયાબિટીસ ધરાવતા લોકોમાં ખભા સંબંધિત સમસ્યાઓનું પ્રમાણ સામાન્ય લોકોની સરખામણીએ ઘણું વધુ હોય છે. સમયસર સારવાર ન કરવામાં આવે તો આ સમસ્યા રોજિંદા જીવનને અસર કરી શકે છે.

શું છે ફ્રોઝન શોલ્ડર?

ફ્રોઝન શોલ્ડર એવી સ્થિતિ છે જેમાં ખભાના સાંધા આસપાસના કનેક્ટિવ ટિશ્યૂ જાડા અને કઠોર બની જાય છે. જેના કારણે ખભાની હલનચલન મર્યાદિત થવા લાગે છે. શરૂઆતમાં દુખાવો થાય છે અને પછી ધીમે-ધીમે હાથ ઉંચો કરવો અથવા ફેરવવો મુશ્કેલ બની શકે છે.

ડાયાબિટીસમાં કેમ વધે છે જોખમ?

નિષ્ણાતોના જણાવ્યા અનુસાર લાંબા સમય સુધી બ્લડ શુગરનું સ્તર વધુ રહે તો શરીરના ટિશ્યૂમાં ફેરફાર થવા લાગે છે. વધારાનો ગ્લુકોઝ કોલેજન નામના પ્રોટીનને અસર કરે છે, જેના કારણે ટિશ્યૂ પોતાની લવચીકતા ગુમાવે છે. આ અસર ખભાના સાંધા પર પણ પડે છે. ઉપરાંત, શરીરમાં સતત સોજો અને ટિશ્યૂ સુધી ઓછો રક્તપ્રવાહ પણ આ સમસ્યાને ગંભીર બનાવી શકે છે.

ફ્રોઝન શોલ્ડરના ત્રણ તબક્કા

ફ્રીઝિંગ સ્ટેજ

આ તબક્કામાં ખભાનો દુખાવો ધીમે-ધીમે વધે છે અને હાથની હલનચલન ઘટવા લાગે છે.

ફ્રોઝન સ્ટેજ

દુખાવો થોડો ઓછો થઈ શકે છે, પરંતુ ખભાની જકડાણ યથાવત રહે છે.

થોઇંગ સ્ટેજ

આખરી તબક્કામાં ધીમે-ધીમે ખભાની ગતિશીલતા પાછી આવવા લાગે છે. સમગ્ર પ્રક્રિયા કેટલાક મહિના થી લઈને બે વર્ષ સુધી ચાલી શકે છે.

કેવી રીતે થાય છે નિદાન?

ડૉક્ટર દર્દીની મેડિકલ હિસ્ટ્રી, ખાસ કરીને ડાયાબિટીસની માહિતી, શારીરિક તપાસ તેમજ જરૂર પડે તો એક્સ-રે અથવા MRI જેવા ટેસ્ટની મદદથી ફ્રોઝન શોલ્ડરનું નિદાન કરે છે. સમયસર ઓળખ થઈ જાય તો સમસ્યાને વધુ ગંભીર બનતા અટકાવી શકાય છે.

આ પણ વાંચોઃ મસલ્સ બનશે સ્ટ્રોન્ગ, હાડકાં પણ થશે મજબૂત.. ઘરે બનાવો ચોકલેટ પ્રોટીન પાઉડર

શું છે સારવાર?

ફ્રોઝન શોલ્ડરની સારવારનો મુખ્ય હેતુ દુખાવો ઘટાડવો અને ખભાની સામાન્ય કાર્યક્ષમતા પાછી લાવવાનો હોય છે. તેના માટે દુખાવો અને સોજો ઘટાડતી દવાઓ આપવામાં આવે છે. ફિઝિયોથેરાપી અને નિયમિત સ્ટ્રેચિંગ એક્સરસાઈઝ સૌથી અસરકારક માનવામાં આવે છે. સાથે જ બ્લડ શુગરને નિયંત્રણમાં રાખવું પણ ખૂબ જરૂરી છે. ગંભીર સ્થિતિમાં ડૉક્ટર ઈન્જેક્શન અથવા અન્ય તબીબી સારવારની સલાહ આપી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ