IND vs AFG / શુભમન ગિલ 154, ઈશાન કિશન 125, અફઘાનિસ્તાન સામેની વનડેમાં ભારતના બે સ્ટારનો ધમાકો

ક્રિકેટના મેદાન પર જ્યારે પણ ભારતીય ટીમ ઉતરે છે, ત્યારે વિરોધી ટીમોમાં પાકિસ્તાન જેવો જ ભયાનક ખૌફ જોવા મળે છે. કંઈક આવો જ નજારો આજે ભારત અને અફઘાનિસ્તાન વચ્ચે લખનૌના ભારત રત્ન શ્રી અટલ બિહારી વાજપેયી ઇકાના ક્રિકેટ સ્ટેડિયમમાં રમાઈ રહેલી બીજી વનડે મેચમાં જોવા મળી રહ્યો છે. ત્રણ મેચોની આ વનડે સીરીઝના બીજા મુકાબલામાં અફઘાનિસ્તાનના કેપ્ટન હશમતતુલ્લાહ શાહિદીએ ટોસ જીતીને પિચના મિજાજને જોઈ પહેલા બોલિંગ કરવાનો નિર્ણય કર્યો હતો, પરંતુ ભારતીય બેટ્સમેનોએ તેમના આ નિર્ણયને સંપૂર્ણપણે ખોટો સાબિત કરી દીધો છે. હાલમાં શુભમન ગિલ અને શ્રેયસ અય્યર ક્રીઝ પર હાજર છે અને રનનો ગ્રાફ સતત ઉપર જઈ રહ્યો છે.

શરૂઆતી ઝટકા બાદ રોહિત-ગિલની શાનદાર રિકવરી

આજની મેચમાં ભારતીય પ્લેઈંગ ઈલેવનમાં મોટા ફેરફાર જોવા મળ્યા હતા. યશસ્વી જયસ્વાલ અને કુલદીપ યાદવની ટીમમાં વાપસી થઈ હતી, જ્યારે યુવા ખેલાડી પ્રિન્સ યાદવે આંતરરાષ્ટ્રીય વનડે ક્રિકેટમાં પોતાનું ગૌરવશાળી ડેબ્યુ કર્યું હતું. જો કે, મેચની શરૂઆતમાં ભારતને મોટો ઝટકો લાગ્યો હતો જ્યારે ઓપનર યશસ્વી જયસ્વાલ માત્ર 4 રન બનાવીને મોહમ્મદ સલીમ સાફીના દડા પર નાંગેયાલિયા ખારોટીને કેચ આપી બેઠા હતા. પરંતુ ત્યારબાદ કેપ્ટન રોહિત શર્મા અને ત્રીજા નંબરે બેટિંગ કરવા આવેલા પ્રિન્સ શુભમન ગિલે મોરચો સંભાળ્યો હતો. બંનેએ અફઘાન બોલરોની બરાબરની ધોલાઈ કરી હતી. કેપ્ટન રોહિત શર્મા પોતાની અર્ધસદી તરફ વધી રહ્યા હતા, ત્યારે જ તેઓ 48 રનના સ્કોર પર રાશિદ ખાનની ગુગલીમાં ક્લીન બોલ્ડ થઈ ગયા હતા. રોહિત આઉટ થયા ત્યારે ભારતનો સ્કોર 96/2 રન હતો.

ઇશાન કિશન અને શુભમન ગિલનું તોફાન

રોહિત શર્માના આઉટ થયા બાદ મેદાન પર ઇશાન કિશનની એન્ટ્રી થઈ અને ત્યારબાદ જે થયું તે અફઘાનિસ્તાનની ટીમ વર્ષો સુધી ભૂલી નહીં શકે. શુભમન ગિલે માત્ર 38 દડામાં અને ઇશાન કિશને 52 દડામાં પોતાની શાનદાર હાફ સેન્ચુરી પૂરી કરી હતી. અડધી સદી બાદ બંને ખેલાડીઓએ રનની ગતિ બમણી કરી નાખી હતી. શુભમન ગિલે શાનદાર ક્લાસ બતાવતા માત્ર 77 દડામાં પોતાની વનડે કરિયરની 9 મી સદી ફટકારી દીધી હતી. બીજી તરફ, ઇશાન કિશને પણ તોફાની બેટિંગ કરતા માત્ર 71 દડામાં પોતાના વનડે કરિયરની બીજી સદી ફટકારીને ઇતિહાસ રચી દીધો હતો. ઇશાન કિશન આઉટ થતા પહેલા 79 દડામાં 125 રનની વિસ્ફોટક અને યાદગાર ઇનિંગ રમી ગયા હતા. તેમની આ તોફાની ઇનિંગમાં 14 આકર્ષક ચોગ્ગા અને 7 ગગનચુંબી છગ્ગા સામેલ હતા. તેઓ નાંગેયાલિયા ખારોટીના દડા પર કેચ આઉટ થયા હતા.

વધુ વાંચો: સુપર ઓવરમાં શ્રીલંકા સામે હારી ઇન્ડિયન ટીમ, ફાઈનલનો રસ્તો બન્યો મુશ્કેલ

ઇશાન કિશન આઉટ થયા બાદ પણ અફઘાનિસ્તાનની મુશ્કેલીઓ ઓછી થઈ નથી. સદી ફટકારી ચૂકેલા શુભમન ગિલે 110 બોલમાં 154 રન ફટકાર્યા હતા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ