કાર્યવાહી / હોટલમાં દુષ્કર્મ આચર્યું, ધર્મ પરિવર્તનની ફરજ પાડતો, 'દરગાહમાં લઈ જઈને'... રાજકોટમાં લવ જેહાદનો કિસ્સો

રાજકોટ શહેરમાં એક પરિણીતાએ બિનહિન્દુ યુવક સામે ધર્મ પરિવર્તન માટે દબાણ, દુષ્કર્મ અને બ્લેકમેઇલિંગના ગંભીર આરોપો લગાવતાં મામલો ચર્ચાનો વિષય બન્યો છે. પીડિતાના પરિવારજનોનો આક્ષેપ છે કે અગાઉ રજૂઆતો કરવા છતાં પોલીસ દ્વારા યોગ્ય કાર્યવાહી કરવામાં આવી નથી.

મહિલા સોશિયલ મીડિયા મારફતે યુવકના સંપર્કમાં આવી

મળતી માહિતી મુજબ, પરિણીતા આશરે એક વર્ષ પહેલાં ઇન્સ્ટાગ્રામ મારફતે અફઝલ સીદા નામના યુવકના સંપર્કમાં આવી હતી. પીડિતાનો આક્ષેપ છે કે છેલ્લા છ મહિનાથી આરોપી તેના પર ધર્મ પરિવર્તન કરવા તેમજ પોતાના લગ્નજીવનનો અંત લાવવા માટે સતત દબાણ કરી રહ્યો હતો.

પરિણીતાએ વધુમાં આરોપ લગાવ્યો છે કે અફઝલની સાગરીત તરીકે ઓળખાતી અનિશા નામની મહિલા પણ તેને પતિથી અલગ થવા અને આરોપી સાથે ભાગી જવા માટે સમજાવતી હતી.

દોરો બાંધીને પાણી પીવડાવવામાં આવતું

ફરિયાદ અનુસાર, આરોપી તેને એક દરગાહમાં લઈ જતો હતો. જ્યાં દોરો બાંધીને પાણી પીવડાવવામાં આવતું હતું. ઉપરાંત ગોંડલ રોડ વિસ્તારની એક હોટલમાં તેની સાથે દુષ્કર્મ આચરવામાં આવ્યું હોવાનો પણ આક્ષેપ કરવામાં આવ્યો છે.

મહિલાના ફોટા અને વીડિયો વાયરલ કરવાની ધમકી

પીડિતાના જણાવ્યા મુજબ, આરોપી તેની પાસે રહેલા ફોટા અને વીડિયો સોશિયલ મીડિયામાં વાયરલ કરવાની ધમકી આપતો હતો. આ સતત માનસિક તણાવના કારણે પરિણીતાએ ગત રાત્રે એસિડ પી આત્મહત્યાનો પ્રયાસ કર્યો હોવાનું જણાવાયું છે. જોકે, તેના પતિની સમયસર નજર પડતાં તેને રોકી લેવામાં આવી હતી અને તેનો જીવ બચી ગયો હતો.

આ પણ વાંચોઃ 'કલેકટર-કમિશનરની સૂચના હશે તો જ પાલિકા ડિમોલિશન માટે ગઈ હશે' સુરતમાં બોલ્યાં કેન્દ્રીય મંત્રી રામદાસ અઠાવલે

અગાઉ ત્રણ વખત ફરિયાદ નોંધાઈ ચૂકી

પરિવારજનોનો દાવો છે કે આરોપી વિરુદ્ધ અગાઉ પણ ત્રણ વખત ફરિયાદો નોંધાઈ ચૂકી છે. તેઓએ પોલીસ તંત્ર સામે યોગ્ય અને તાત્કાલિક કાર્યવાહી ન કરવાના આક્ષેપો પણ કર્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ