VIDEO / કોટામાં રાહુલ ગાંધીની રૉકસ્ટાર જેવી એન્ટ્રી: કૉલર માઈક અને ટાઈટ શર્ટમાં જોવા મળ્યો અનોખો અંદાજ

રાજસ્થાનના કોચિંગ હબ ગણાતા કોટા શહેરમાંથી કોંગ્રેસ નેતા રાહુલ ગાંધીનો એક અત્યંત અનોખો અને ફિલ્મી અંદાજ સામે આવ્યો છે. જે રીતે ક્રિકેટના મેદાન પર ભારતીય ટીમ પાકિસ્તાન વિરૂદ્ધ આક્રમક બેટિંગ કરીને મેચ પોતાના નામે કરી લે છે, એ જ જોશ અને આત્મવિશ્વાસ સાથે રાહુલ ગાંધીએ કોટાના દશેરા મેદાન પર આયોજિત કાર્યક્રમમાં યુવાનોના દિલ જીતી લીધા છે. કૉલર માઈક, ટાઈટ ફિટિંગવાળી શર્ટ અને રૉકસ્ટાર જેવી શાનદાર બોડી લેંગ્વેજ સાથે જ્યારે રાહુલ ગાંધી સ્ટેજ પર આવ્યા ત્યારે આખું મેદાન 'રાહુલ, રાહુલ' ના નારાઓથી ગૂંજી ઉઠ્યું હતું. સ્ટેજ પર પાર્ટી પૉપર્સ અને ડ્રાય આઈસ ફોગના કારણે આખો માહોલ કોઈ મ્યુઝિકલ કન્સર્ટ જેવો ફિલ્મી બની ગયો હતો.

ગુડ ઇવનિંગ, હાઉ ઇઝ એવરીબડી? કહીને જીત્યા દિલ

રાહુલ ગાંધીએ સ્ટેજ પર આવતાની સાથે જ કૉલર માઈકમાં પશ્ચિમી શૈલીમાં કહ્યું, ગુડ ઇવનિંગ, હાઉ ઇઝ એવરીબડી? (Good Evening, How is everybody?). આટલું સાંભળતા જ સામે હાજર હજારો યુવાનો જોશથી ભરાઈ ગયા હતા અને હવામાં હાથ લહેરાવીને તેમને ચિયર્સ કરવા લાગ્યા હતા.

યુવાનોના આ જબરદસ્ત પ્રતિસાદને જોઈને રાહુલ ગાંધીએ શરૂઆતમાં જ સ્પષ્ટતા કરતા કહ્યું કે, આ કોઈ રાજકીય મુલાકાત નથી. આ મુલાકાત માત્ર તમારા માટે છે. તે યુવાનો માટે છે જેઓ નોકરી મેળવવા માટે રાત-દિવસ સંઘર્ષ કરી રહ્યા છે. આજે સાંજે હું ભાજપ, કોંગ્રેસ કે રાજનીતિ જેવા કોઈ પણ શબ્દો મારા મોઢેથી કાઢીશ નહીં. સોશિયલ મીડિયા પર યૂઝર્સ તેમની આ સ્ટાઈલને 'રૉકસ્ટાર એન્ટ્રી' અને 'મોટિવેશનલ સ્પીકર સ્ટાઈલ' તરીકે ઓળખાવી રહ્યા છે.

શિક્ષણ વ્યવસ્થા પર પ્રહાર

કોચિંગ સિટી કોટામાં વિદ્યાર્થીઓ સાથે વાતચીત કરતી વખતે રાહુલ ગાંધીએ દેશની વર્તમાન શૈક્ષણિક સિસ્ટમ સામે ગંભીર સવાલો ઉભા કર્યા હતા. તેમણે ચિંતા વ્યક્ત કરતા કહ્યું કે આજની શિક્ષણ પ્રણાલી બાળકો પર એટલું માનસિક દબાણ લાવે છે કે તેમના સપનાઓ કચડાઈ જાય છે. રાહુલ ગાંધીએ દેશની હાલની શિક્ષણ વ્યવસ્થાને ખુલ્લેઆમ લૂંટની સિસ્ટમ ગણાવ્યું હતું.

વધુ વાંચો : 'મોદી શાંત, સંયમિત અને જબરદસ્ત... હું એમના જેવો નહીં' ટ્રમ્પે PMના કર્યાં ભરપૂર વખાણ

તેમણે એક ચોંકાવનારો દાવો કરતા કહ્યું કે, દેશમાં આજે પરિસ્થિતિ એવી છે કે દર 100 એન્જિનિયરોમાંથી 80 એન્જિનિયરો બેરોજગાર ફરે છે, જે દેશના ભવિષ્ય માટે બિલકુલ યોગ્ય સંકેત નથી. તેમણે વધુમાં ઉમેર્યું કે ભારતીય શિક્ષણ વ્યવસ્થા હવે 'સિલેક્ટેડ સિસ્ટમ' નહીં પરંતુ 'રિજેક્ટેડ સિસ્ટમ' બની ગઈ છે અને આ દેશના હોનહાર બાળકોનું ઘોર અપમાન છે. કોટામાં વિદ્યાર્થીઓ વચ્ચેનો રાહુલ ગાંધીનો આ નવો લુક અને અંદાજ હાલમાં ટોક ઓફ ધ ટાઉન બન્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ