રાજનીતિ / 300 યુનિટ મફત વીજળી, મહિલાઓ માટે લાડલી બહેન યોજના, દિલ્હી માટે ભાજપ કરી શકે મોટી જાહેરાતો

Delhi Assembly Election : દિલ્હી વિધાનસભા ચૂંટણીને લઈ રાજકીય પક્ષો હવે મતદારોને આકર્ષવા એડીચોટીનું જોર લગાવી રહ્યા છે. નોંધનિય છે કે, દિલ્હીમાં આગામી 5મી ફેબ્રુઆરીએ મતદાન યોજાનાર છે અને 8મીએ પરિણામ જાહેર થશે. આ તરફ હવે સમાચાર સામે આવ્યા છે કે, ભાજપ પોતાના ચૂંટણી ઢંઢેરામાં મફત વીજળીની જાહેરાત કરી શકે છે. આ સાથે ભારતીય જનતા પાર્ટી મંદિરો અને ગુરુદ્વારા જેવા ધાર્મિક સ્થળો પર 500 યુનિટ સુધી મફત વીજળી આપવાનું પણ આયોજન કરી રહી છે.

BJPએ ચૂંટણી જીતવા કમર કસી

આવતા મહિને દિલ્હીમાં વિધાનસભાની ચૂંટણી યોજાવાની છે. ભારતીય જનતા પાર્ટી (BJP) ચૂંટણી જીતવા માટે કમર કસી ગઈ છે. એવા સમાચાર છે કે ભાજપ દિલ્હીના લોકો માટે મફત વીજળીની જાહેરાત કરી શકે છે. સૂત્રોના જણાવ્યા અનુસાર ભાજપ દિલ્હીના લોકો માટે 300 યુનિટ સુધી મફત વીજળીની જાહેરાત કરી શકે છે. ભાજપ મહિલાઓ માટે લાડલી બહેના યોજના જેવી વિશેષ યોજનાની પણ જાહેરાત કરી શકે છે. આ સાથે BJP પાઇપલાઇન દ્વારા મફત શુદ્ધ પાણી આપવાનું વચન પણ આપી શકે છે.

આમ આદમી પાર્ટીએ આપ્યા છે અનેક ચૂંટણી વચનો

દિલ્હીમાં સત્તાધારી આમ આદમી પાર્ટી લગભગ એક મહિનાથી ચૂંટણી વચનો અને જાહેરાતો કરી રહી છે. પાર્ટીએ મહિલાઓથી લઈને વૃદ્ધો, ઓટો ડ્રાઈવરો અને પૂજારી-ગ્રંથીઓ સુધી દરેકને મદદ કરવા માટે મોટી યોજનાઓની જાહેરાત કરી છે. જેમાં વૃદ્ધો માટે સંજીવની સ્કીમ, મહિલાઓ ચૂંટણી જીતે તો 2100 રૂપિયા, ઓટો ડ્રાઇવરો માટે 10 લાખ રૂપિયાનો વીમો અને પૂજારીઓ અને ગ્રંથીઓ માટે 18,000 રૂપિયાના પગારનું વચન સામેલ છે.

કોંગ્રેસની દિલ્હીમાં પાંચ ગેરંટી આપવાની તૈયારી

કર્ણાટક ચૂંટણીની જેમ દિલ્હીમાં પણ કોંગ્રેસે પાંચ ગેરંટી આપવાની તૈયારી કરી છે. પાર્ટી શ્રેણીબદ્ધ જાહેરાતો કરી રહી છે. રાજસ્થાનની તર્જ પર કોંગ્રેસે પણ દિલ્હીમાં ચિરંજીવી યોજનાની જેમ આરોગ્ય ક્ષેત્રે જીવન રક્ષા યોજનાની જાહેરાત કરી છે. આ યોજના હેઠળ કોંગ્રેસે 25 લાખ રૂપિયાના સ્વાસ્થ્ય વીમાનું વચન આપ્યું છે. દિલ્હીની ચૂંટણીમાં કોંગ્રેસ જે પાંચ ગેરંટી આપવા જઈ રહી છે તેમાં પ્યારી દીદી યોજના (મહિલા ડાયરેક્ટ બેનિફિટ ટ્રાન્સફર), જીવન રક્ષા યોજના (આરોગ્ય વીમો), યુવાનોને નોકરીની ગેરંટી, મજૂર વર્ગ આવક ગેરંટી યોજના અને બધા માટે રાશન યોજનાની જાહેરાતનો સમાવેશ થાય છે. પણ કરી શકે છે.

આ સાથે જ કોંગ્રેસે મહિલાઓ માટે પ્યારી દીદી યોજનાનું વચન પણ આપ્યું છે. કોંગ્રેસનું કહેવું છે કે, તે કર્ણાટકની જેમ દિલ્હીમાં પણ મહિલાઓને લાભ આપશે. દિલ્હીમાં સત્તામાં આવ્યા બાદ પ્રથમ કેબિનેટ બેઠકમાં આ યોજના લાગુ કરવામાં આવશે. કર્ણાટકમાં કોંગ્રેસે આ મોડેલ પર મહિલાઓ માટે ગૃહ લક્ષ્મી યોજના લાગુ કરી છે. કર્ણાટકના ઉપમુખ્યમંત્રી અને કોંગ્રેસના નેતા ડીકે શિવકુમારે કહ્યું કે, અમે ગૃહ જ્યોતિ અને ગૃહ લક્ષ્મીની ગેરંટી પૂરી કરી છે. કર્ણાટકમાં મહિલાઓને 2,000 રૂપિયા મળી રહ્યા છે. તેઓ બસમાં મફત મુસાફરી કરી રહ્યા છે અને મફત રાશન મેળવી રહ્યા છે. અમે બેરોજગાર લોકોને 3,000 રૂપિયા આપી રહ્યા છીએ. કુલ 1 કરોડ 22 લાખ લોકોને લાભ મળી રહ્યો છે. કોંગ્રેસ જ્યાં પણ અને ગમે તે વચન આપે છે તે હંમેશા તેને પૂર્ણ કરે છે. બાકીની ગેરંટી અમે પછીથી જાહેર કરીશું.

વધુ વાંચો : એક જ બેઠક પર કેજરીવાલ લડશે ચૂંટણી, જાટ અનામત પર ખેલ્યો દાવ, દિલ્હી વિધાનસભાના સમીકરણ બદલાશે?

નોંધનિય છે કે, 2013, 2015 અને 2020ની વિધાનસભા ચૂંટણીમાં દિલ્હીમાં કોંગ્રેસની હાર થઈ છે. કોંગ્રેસ 2015 અને 2020માં ખાતું પણ ખોલાવી શકી નથી. કોંગ્રેસે રાષ્ટ્રીય રાજધાનીમાં 1998 થી 2013 સુધી 15 વર્ષ સુધી સત્તા સંભાળી હતી અને શીલા દીક્ષિત મુખ્ય પ્રધાન હતા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ