ટ્રોલ / ''કુછ ધન છોડ કે તો...'', ધનતેરસની શુભેચ્છા પાઠવતા યુઝર્સ વિજય માલ્યા પર ભડક્યાં

હાલમાં લંડનમાં રહેતા ભાગેડુ ઉદ્યોગપતિ વિજય માલ્યાએ શુક્રવારે સોશિયલ મીડિયા પ્લેટફોર્મ 'X' પર ધનતેરસની શુભેચ્છા પાઠવી હતી. તેમણે લખ્યું, "ધનતેરસના અવસરે સૌને હાર્દિક શુભેચ્છાઓ." તેમની આ પોસ્ટ પર યુઝર્સે અનેક મજેદાર અને કટાક્ષવાળી કમેન્ટ કરી હતી; એક યુઝરે તો ત્યાં સુધી લખ્યું કે, "તમે પાછળ થોડું ધન તો છોડી શક્યા હોત!" આ પોસ્ટ વાયરલ થઈ ગઈ છે અને શનિવારે સવારે 10.30 વાગ્યા સુધીમાં તેને લગભગ 4.29 લાખ યુઝર્સે જોઈ લીધી હતી. આ પોસ્ટને 9 હજાર થી વધુ લાઈક્સ, 800થી વધુ રિપોસ્ટ્સ અને લગભગ 1 હજાર કમેન્ટ મળી છે.

શું લખ્યુ યૂઝર્સે ?

'Rofl Gandhi 2.0' નામના એક યુઝરે વિજય માલ્યાની આ પોસ્ટ પર કમેન્ટ કરતા સૂચવ્યું કે, ભારત છોડતા પહેલા તેઓ થોડા પૈસા પાછળ છોડી શક્યા હોત. બીજી તરફ, નિલેશ દેવડાએ લખ્યું, "ધનતેરસની શુભકામનાઓ, સર! તમે ભારત ક્યારે પાછા ફરી રહ્યા છો? તમારા વિના, SBIના લોકો ધનતેરસ ઉજવી શકતા નથી." સૌરવ પંવારે કમેન્ટ કરી, "SBIના લોકો તમારી પાસે તેમના પૈસા માંગી રહ્યા છે." અન્ય એક યુઝર, 'VishalUnfiltered'એ લખ્યું, "તમારી મનપસંદ મીઠાઈ કદાચ 'લોન પાપડી' હશે. અરે, મારો મતલબ 'સોન પાપડી' છે, ખરું ને?"

દિવાળી બોનસની રાહ

PM નામના એક યુઝરે કમેન્ટ કરી, "સર, તમને સમૃદ્ધિ પ્રાપ્ત થાય તેવી શુભેચ્છા. બેંકો હજુ પણ તેમના દિવાળી બોનસની રાહ જોઈ રહી છે." માલ્યાની પોસ્ટ પર નીતિન ચડ્ડરે કમેન્ટ કરતા સૂચવ્યું કે, 'ધનતેરસ'ની સાચી શુભેચ્છાઓ તો તે બેંકોને આપવી જોઈએ, જેમને હજુ પણ આશા છે કે માલ્યા પાછા ફરશે.

9000 કરોડ રુપિયાનુ દેવુ

વિજય માલ્યા એક ભારતીય બિઝનેસમેન અને સંસદના ભૂતપૂર્વ સભ્ય છે. એક સમયે તેઓ અબજોપતિઓની કેટેગરીમાં આવતા હતા અને 'કિંગ ઓફ ગુડ ટાઈમ્સ' તરીકે જાણીતા હતા. તેમની કંપની 'કિંગફિશર એરલાઈન્સ'ના પતન બાદ તેમનું વ્યવસાયિક સામ્રાજ્ય ધરાશાયી થઈ ગયું. તેમના પર છેતરપિંડી, મની લોન્ડરિંગ અને બેંકો પાસેથી લીધેલી આશરે 9 હજાર કરોડ રૂપિયાની લોન ન ચૂકવવાના આરોપો છે. હાલમાં વિજય માલ્યા યુનાઇટેડ કિંગડમમાં રહે છે.

ભાગેડુ આર્થિક અપરાધી ઘોષિત

માર્ચ 2016માં, લગભગ 17 ભારતીય બેંકો માલ્યા પાસેથી લોનની વસૂલાત કરવાનો પ્રયાસ કરી રહી હતી. આ સમયગાળા દરમિયાન, તેઓ ભારત છોડીને યુનાઇટેડ કિંગડમ જતા રહ્યા. ત્યારબાદ, ભારતીય અદાલતોએ તેમને 'આર્થિક ભાગેડુ ગુનેગાર' જાહેર કર્યા. બાકી નીકળતી રકમની વસૂલાત કરવા માટે, ભારતની તપાસ એજન્સીઓએ તેમની કેટલીક સંપત્તિઓ જપ્ત કરી અને તેને વેચવાની પ્રક્રિયા શરૂ કરી.

આ પણ વાંચોઃ રોકાણકારોની આવકમાં ₹29.57 લાખ કરોડનો વધારો, જાણો તેજી પાછળના 5 મોટા કારણ

એન્ફોર્સમેન્ટ ડિરેક્ટોરેટ (ED) એ તાજેતરમાં બોમ્બે હાઈકોર્ટને જણાવ્યું હતું કે, વિજય માલ્યા પાસેથી બેંકો દ્વારા 14,131.60 કરોડ રૂપિયાની સંપત્તિની વસૂલાત કરવાથી તેમની સામેનો મની લોન્ડરિંગનો કેસ બંધ થઈ જશે નહીં. વર્ષ 2020માં, માલ્યાએ ફોજદારી કાર્યવાહી રદ કરવાની માંગ કરતી અરજી દાખલ કરી હતી અને દલીલ કરી હતી કે બેંકોએ તેમની લેણી રકમ વસૂલ કરી લીધી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ