આક્રોશ / કિશન હત્યા કેસમાં ગુજરાતમાં ઘેરા પ્રત્યાઘાત, અનેક જગ્યાએ રેલી અને સજ્જડ બંધ

• ધંધુકા- રાઘનપૂરનો ઘટના અંગે ઉગ્ર આક્રોશ 
• સૌરાષ્ટ્ર-ગુજ્રરાતમાં ઠેર-ઠેર બંધ, રેલીઓ કાઢી 
• હિંદુ સંગઠનોની માગ,આરોપીઓને કડક સજા 

ધંધુકામાં ભરવાડ યુવકની કરવામાં આવેલી નિર્મમ હત્યા અને રાઘનપૂરમાં યુવતી પર થયેલા નિર્લજ્જ  હુમલાના  પડઘા ગુજરાતભરમાં પડી રહ્યા છે. બીજી બાજુ હત્યા કેસમાં  ATS પણ ઘટનામાં સંડોવાયેલા અને મદદગાર આરોપીઓ સુધી પહોચી ગઈ છે અને એક-એકને શોધીને દબોચી રહી છે. આ તરફ હત્યાનો વિરોધ કરવા અને સંવેદના વ્યક્ત કરવા સાથે હત્યાને વખોડવાનો સિલસિલો ગામ-પરગામ યથાવત છે. 

 

સાવલી-જામનગરમાં બંધ 

ધંધુકાના યુવકની હત્યાના પડઘા સાવલીમાં પડ્યા છે. હિંદુ સંગઠનોએ મૌન પાળીને મૃતકને  શ્રદ્ધાંજલિ પાઠવી હતી.ત્યાર બાદ જય શ્રી રામના નારા લગાવવામાં આવ્યા હતા. સાવલીના ગાંધી ચોકથી મામલતદાર કચેરી સુધી રેલી કાઢવામાં આવી હતી.અને ત્યાર બાદ મામલતદારને આવેદન પત્ર પાઠવવામાં આવ્યું હતું. તો જામનગરના ફલ્લામાં પણ રેલી કાઢવામાં આવી હતી. હિન્દુ સંગઠનો દ્વારા સૂત્રોચ્ચાર સાથે રેલી કાઢી ધંધુકા -રાધનપૂરની ઘટના અંગે રોષ વ્યક્ત કર્યો હતો અને ઘટનાને વખોડી કાઢવામાં આવી હતી  

 

તારાપુર -આટકોટ બંધ,કાલે જસદણ-વિંછીયા 

ધંધુકા-રાધનપૂરની ઘટનાને વખોડતા આણંદનું તારાપુર સજ્જડ બંધ રહ્યું હતું. કિશન ભરવાડની હત્યાના વિરોધમાં તારાપુર બંધનું એલાન અપાયું હતું. નગરજનો સ્વયંભુ બંધમાં જોડાયા હતા. તો જસદણનું આટકોટ ગામ આજે બપોર સુધી સજ્જડ બંધ રહ્યું છે. આટકોટના વેપારીઓએ બંધ પાળી બંધને સમર્થન જાહેર કરતા આરોપીઓને કડક સજા કરવા માટે માગણી પણ કરી છે. હવે આવતીકાલે જસદણ અને વીંછીયા બંધનું એલાન અપાયું છે જેમાં મૌન રેલી કાઢી વિરોધ પ્રદર્શિત કરવામાં આવશે 

પડઘા ભાભરમાં પણ 

ધંધુકા તેમજ રાધનપુરમાં હિન્દુ યુવક-યુવતીઓ પર હુમલાની ઘટનાને વખોડતા બનાસકાંઠાના ભાભર શહેરમાં હિન્દુ સંગઠનોએ બંધનું એલાન આપ્યું છે. શહેરના તમામ વેપારીઓએ બંધને સમર્થન પણ આપ્યું છે.  હિન્દુ સંગઠનોએ બંધમાં જોડાવા માટે અપીલ પણ કરી છે.