મોટી જાહેરાત / કોંગ્રેસે કહ્યું અમારી સરકાર આવશે તો OBCનો હશે મુખ્ય ફાળો, ગ્રામ પંચાયતોમાં ઓબીસી અનામત મુદ્દે રાજકારણમાં ગરમાવો

• ગ્રામ પંચાયતોમાં OBC અનામતને મુદ્દે રાજકારણ ગરમાયું
• OBC સમાજ જેમની સાથે રહેશે તેની આગામી સરકાર બનશે: સોલંકી
• વસ્તી પ્રમાણે સ્થાનિક સ્વરાજની સંસ્થામાં 27 ટકા અનામતની માંગ:કોંગ્રેસ

અનામત માટે રચાયેલ કમિશનની કોંગ્રેસ અને ભાજપના નેતાઓએ મુલાકાત લીધી. કોંગ્રેસ નેતા ભરતસિંહ સોલંકી, લાખા ભરવાડ અને રઘુ દેસાઈનું નિવેદન પણ સામે આવ્યું છે. કોંગ્રેસનું કહેવું છે કે, વસ્તી પ્રમાણે સ્થાનિક સ્વરાજની સંસ્થામાં 27 ટકા અનામતની માંગ છે. 52 ટકા OBCની વસ્તી હોય તો 10 ટકાના બદલે 27 ટકા અનામત મળવી જોઈએ. સરકારી નીતિ નિયમો અનુસાર વસ્તી ગણતરી પ્રમાણે મળવી જોઈએ. તે મુજબ વસ્તી પ્રમાણે OBC અનામત આપવામાં આવે છે. બજેટમાં જોગવાઈ થવી જોઈએ. OBCને અન્યાય થશે તો સરકારે ભોગવવું પડશે.'

સ્થાનિક સ્વરાજ્યની ચૂંટણીમાં 27 ટકા અનામત લાગુ કરીશું: કોંગ્રેસ

બીજી બાજુ કોંગ્રેસે ચૂંટણીલક્ષી મોટી જાહેરાત કરતા જણાવ્યું કે, 'સ્થાનિક સ્વરાજ્યની ચૂંટણીમાં 27 ટકા અનામત લાગુ કરીશું. 27 વર્ષથી OBC સમાજને હળહળતો અન્યાય થતો આવ્યો છે.
અમે હેપ્પીનેસ ઇન્ડેક્સને જીડીપી માટે મહત્વનું માનીએ છીએ. બીજેપી સમય પ્રમાણે ચૂંટણીલક્ષી જાહેરાતો કરે છે. અમારી સરકાર આવશે તો OBCનો મુખ્ય ફાળો હશે એમાં કોઈ શંકાને સ્થાન નથી.'

જાતિ આધારિત વસ્તી ગણતરી થવી જોઈએ એ અમારી મુખ્ય માંગણી: ભરતસિંહ

સ્થાનિક સ્વરાજ્યની સંસ્થાઓની ચૂંટણીમાં OBC અનામત મુદ્દે કોંગ્રેસે પ્રેસ કોન્ફરન્સ યોજી હતી. જેમાં ગુજરાત કોંગ્રેસના પૂર્વ પ્રમુખ ભરતસિંહ સોલંકીએ નિવેદન આપતા જણાવ્યું હતું કે, 'ગ્રામપંચાયતની ચૂંટણીમાં 10 ટકા અનામત OBC હતી. આ 10 ટકા OBC અનામત પણ કાઢી નાખવાની વાત થઈ રહી છે. જાતિ આધારિત વસ્તી ગણતરી થવી જોઈએ એ અમારી મુખ્ય માંગણી છે. કેન્દ્ર અને રાજ્યમાં જે પક્ષની સરકાર છે તે પક્ષ અનામતની જોગવાઈ પૂરી કરવા માંગે છે.'

ભાજપે લોકકલ્યાણ માટે નહીં સત્તા ટકાવવા સરકાર બદલી છે: ભરતસિંહ

વધુમાં જણાવ્યું કે, 'ગુજરાતની ઇન્ક્યુસિવ વિકાસ કોંગ્રેસે કર્યો છે. ભાજપ બંધારણ અને પાર્લામેન્ટે ઘડેલા નિર્ણયોનો અમલ નથી કરતી. 1976માં બક્ષી કમિશને આપેલા રિપોર્ટ મુજબ કોંગ્રેસે અનામત અમલ કરી. સામાજિક સમીકરણના કારણે ભાજપ ગભરાઈ ગયું છે. ભાજપે લોકકલ્યાણ માટે નહીં સત્તા ટકાવવા સરકાર બદલી છે. 159 બેઠકવાળી કોંગ્રેસ સરકાર ઉથલાવવાનું પાપ ભાજપના નેતાઓએ કર્યું હતું. OBC સમાજ જેમની સાથે રહેશે તેની આગામી સરકાર બનશે. આવા રિપોર્ટના કારણે ભાજપે કેન્દ્રમાં 3 OBC નેતાને મંત્રીમંડળમાં સ્થાન આપ્યું. અમારી સરકાર આવશે તેમાં OBCનો મુખ્ય રોલ હશે.'