- અરવલ્લીના બાળક દૈવિકનું નિધન
- SMAથી પીડિત દૈવિક સોનું નિધન
- લોકો દૈવિક માટે એકઠુ કરી રહ્યાં હતા ફંડ
દૈવિક સોની SMA-1 બીમારીથી પીડિત હતો. સ્પાઈન મક્યુલર એટ્રોફી નામની ગંભીર બીમારીથી પીડિત દૈવિકની સારવાર માટે 16 કરોડ રૂપિયાની જરૂરિયાત હતી. પિતા સહિત અનેક લોકો દૈવિક સોની માટે ફંડ એકઠું કરી રહ્યાં હતા. VTVએ પણ આ બાળકની મદદ કરવા માટે અપીલ કરી હતી. ત્યારે મોડાસાની ખાનગી હોસ્પિટલમાં સારવાર દરમિયાન માસુમનું નિધન થતાં સમગ્ર પંથકમાં શોકની લાગણી પ્રસરી છે.
હાથ પગ હલાવવાના બિલકુલ બંધ કરી દેતા માતા-પિતા પહોંચ્યા ડોક્ટર પાસે
મોડાસા તાલુકાના ટીંટોઇ ગામે રહેતા દેવાંગ સોની પોતે સોનીકામ કરી મધ્યમ પરિસ્થિતિમાં જીવન ગુજારો કરે છે તેમને ત્યાં દીકરાનો જન્મ થયો તેનું નામ દૈવિક રાખ્યું. આ દૈવિક શરૂઆતમાં સરસ રમતો ખીલતો હતો, પરંતુ ત્રણ માસનો થયો ત્યાંથી શરીરની હલન ચલન પ્રક્રિયા ઓછી થવા લાગી હાથ પગ હલાવવાના બિલકુલ બંધ થઈ ગયા જેથી માતા પિતા ખૂબ ચિંતા કરવા લાગ્યા અને સારવાર માટે મોડાસા ખાનગી હોસ્પિટલમાં લઇ ગયા ત્યારે ડોક્ટરને આ બાળકમાં કોઈ અલગ પ્રકારના લક્ષણ હોવાનું જણાતા ડોક્ટરે બાળકે રિપોર્ટ માટે અમદાવાદ લઈ જવા જણાવ્યું હતું.
રિપોર્ટમાં SMA-1ની બીમારી હોવાનું આવ્યું હતું સામે
અમદાવાદમાં કરવામાં આવેલા રિપોર્ટમાં બાળકને સ્પાઇનલ મસ્ક્યુલર એસ્ટ્રોપી SMA-1ની બીમારી હોવાનું સામે આવ્યું હતું. આ ગંભીર રોગ છે તેની સારવાર ખૂબ મોંઘી હોય છે, આ રોગ સામે પ્રતિકાર કરવા અને નાથવા માટે અમેરિકાથી 16 કરોડના ઇન્જેક્શનની જરૂર પડે તો આ બાળક બચી શકે પણ પરિવાર મધ્યમ વર્ગીય હતો તેમની પાસે પેટિયું રળે તેટલા જ રૂપિયા હતા આટલો મસ મોટો ખર્ચ ઉપાડી શકે તેટલા નહીં.
VTVએ પણ બાળકની મદદ માટે કરી હતી અપીલ
આટલી મોટી રકમ સાંભળી બાળકના પિતા દેવાંગ સોની અને અન્ય પરિવારજનો ભાગી પડ્યા હતા, પરંતુ ગ્રામજનો અને કુટુંબીજનોએ હિંમત આપી અને સોશિયલ મીડિયાના માધ્યમથી મદદ માટે અપીલ કરી હતી. તેમજ એક એનજીઓ દ્વારા દૈવિક સોનીના નામનું બેન્ક એકાઉન્ટ ખોલાવી ડોનેશન ઉઘરાવવાનું શરૂ કર્યું હતું. દૈવિકના પિતાએ પણ બે હાથ જોડીને વિનંતી કરી હતી કે ઇન્જેક્શનની કિંમત બહુ મોટી છે પણ જો બધા થોડું થોડું ડોનેશન આપે તો દૈવિક બચી શકે એમ છે. VTV પણ અપીલ કરી હતી કે, બને તેટલી મદદ આ બાળકને કરો જેથી કોઇકના ઘરનો દિપક બુજાઇ ન જાય. ત્યારે માસુમ આ દુર્લભ બીમારી સામે જંગ હારી ગયો છે. મોડાસાનો દૈવિક સોની SMA-1 નામની ગંભીર બીમારી સામે જિંદગીનો જંગ હાર્યો છે.
સ્પાઇનલ મસ્ક્યુલર એસ્ટ્રોપી શું છે?
SMA - 1 એટલે સ્પાઇનલ મસ્ક્યુલર એસ્ટ્રોપી આ રોગ તાજા જન્મેલા બાળકમાં થાય છે શરૂઆતમાં નોર્મલ જન્મેલુ બાળક હલન ચલનથી લઈ અન્ય ક્રિયાઓ કરે છે પરંતુ જેમ જેમ ઉંમર વધતી જાય તેમ તેમ આ બીમારીના લક્ષણ વધતા જાય એટલે કે ત્રણ માસથી વધુ ઉંમર થાય એટલે હાથ પગ હલાવવાના બિલકુલ બંધ થઈ જાય છે. સુકાતા જતા કોષોને જીવિત કરવા તેના ઈલાજ માટે અમેરિકામાં ઇન્જેક્શનની શોધ થઈ છે અને આ ઇન્જેક્શન લગભગ 22 કરોડમાં મળે છે પરંતુ ભારત સરકાર દ્વારા આ ઇન્જેક્શન પર ટેક્સ કે અન્ય ખર્ચમાં માફી આપતા આવતા ઇન્જેક્શન 16 કરોડમાં પડે છે.
