નેશનલ / મુખ્ય ચૂંટણી કમિશનર જ્ઞાનેશ કુમારને Z-Plusથી પણ વધુ સુરક્ષા, પોલીસને મળેલા ગુપ્ત ઈનપુટ બાદ સુરક્ષા વ્યવસ્થામાં વધારો

નવી દિલ્હીમાં મુખ્ય ચૂંટણી કમિશનર (CEC) જ્ઞાનેશ કુમારના નિવાસસ્થાનની બહાર સુરક્ષા વ્યવસ્થા સઘન બનાવવામાં આવી છે. નવી ધમકી અંગેની માહિતી મળ્યા બાદ દિલ્હી પોલીસે આ પગલું ભર્યું છે. અધિકારીઓના જણાવ્યા અનુસાર, જ્ઞાનેશ કુમાર પાસે પહેલેથી જ 'Z-પ્લસ' સુરક્ષા છે, પરંતુ ગુપ્તચર વિભાગની નવી માહિતી અને રાજધાનીમાં ચાલી રહેલા વિરોધ પ્રદર્શનોને ધ્યાનમાં રાખીને તેમના ઘરની બહાર વધારાના પોલીસ જવાનો તૈનાત કરવામાં આવ્યા છે.

પોલીસના એક વરિષ્ઠ અધિકારીએ જણાવ્યું હતું કે, સ્થાનિક જિલ્લા પોલીસને પણ તેમના સ્તરે સુરક્ષા વ્યવસ્થા સઘન બનાવવા સૂચના આપવામાં આવી છે. નવી દિલ્હી જિલ્લામાં પહેલેથી જ વિરોધ પ્રદર્શનો ચાલી રહ્યા હોવાથી, કોઈપણ અનિચ્છનીય ઘટનાને રોકવા માટે તમામ સુરક્ષા એજન્સીઓને પરસ્પર સંકલન સાધવા કહેવામાં આવ્યું છે.

INDIA બ્લોકના નેતા કરી રહ્યા છે વિરોધ- પ્રદર્શન

એવા સમયે જ્ઞાનેશ કુમારની સુરક્ષા વધારી દેવામાં આવી છે જ્યારે લોકસભામાં વિપક્ષના નેતા રાહુલ ગાંધીના નેતૃત્વમાં 'ઇન્ડિયા' (INDIA) ગઠબંધનના નેતાઓ ચૂંટણી પંચ દ્વારા હાથ ધરવામાં આવેલી મતદાર યાદીની 'સ્પેશિયલ ઇન્ટેન્સિવ રિવિઝન' (SIR) પ્રક્રિયામાં કથિત અનિયમિતતાઓ સામે વિરોધ પ્રદર્શન કરી રહ્યા છે. વિપક્ષે મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી છે.

આ પણ વાંચોઃ 17 હજાર ફૂટની ઉંચાઈ પર હતું વિમાન અને અચાનક પડી વીજળી, ઇન્ડિગોની ફ્લાઈટમાં પેસેન્જરના જીવ તાળવે ચોંટ્યા

શું હોય છે Z-પ્લસ સુરક્ષા?

Z-પ્લસ (Z-plus) એ દેશમાં સુરક્ષાની બીજા ક્રમની સર્વોચ્ચ શ્રેણી છે. તેનાથી ઉપર વડાપ્રધાન અને તેમના નજીકના પરિવારના સભ્યોને પૂરી પાડવામાં આવતી સ્પેશિયલ પ્રોટેક્શન ગ્રુપ (SPG) સુરક્ષા આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ