નેશનલ / "તેઓ માર્ચ રોકી શકે છે, પણ અમારી ઇચ્છાશક્તિને નહીં", દિલ્હીમાં પોલીસ ઘર્ષણ અને અટકાયત બાદ રાહુલ ગાંધીનો પ્રહાર

દેશની રાજધાની દિલ્હીમાં બુધવારે વિપક્ષી ગઠબંધન INDIA ના સાંસદો દ્વારા યોજાયેલા વિરોધ પ્રદર્શન બાદ રાજકીય ગરમાવો ચરમસીમાએ પહોંચ્યો છે. જંતર-મંતર તરફ આગળ વધી રહેલા વિપક્ષી નેતાઓની બસોને પોલીસે બેરિકેડિંગ કરીને અટકાવી દીધી હતી, જેના પછી ભારે હંગામો સર્જાયો હતો. આ ઘટનાક્રમ અને પોતાની અટકાયત બાદ લોકસભામાં વિપક્ષના નેતા રાહુલ ગાંધીએ કેન્દ્ર સરકાર, ગૃહ મંત્રાલય અને ચૂંટણી પંચ પર આકરા પ્રહારો કર્યા છે.

I am thankful to every INDIA alliance MP standing firm in defence of our democracy - in Parliament, outside on the streets, and today near Jantar Mantar. They can stop a march. They can refuse a meeting. But they cannot stop the will of our people. Narendra Modi, Amit Shah, Gyanesh Kumar and the entire system will be brought to justice.

— Rahul Gandhi (@RahulGandhi) October 7, 2026

"દરેક FIR મારા માટે એક મેડલ છે"

પોલીસ અટકાયત બાદ સોશિયલ મીડિયા પ્લેટફોર્મ X પર પોસ્ટ કરતાં રાહુલ ગાંધીએ લખ્યું, હું INDIA ગઠબંધનના દરેક એ સાંસદનો આભારી છું, જેઓ સંસદની અંદર, રસ્તા પર અને આજે જંતર-મંતર પાસે લોકશાહીની રક્ષા માટે મજબૂતીથી ઊભા રહ્યા. તેઓ એક માર્ચ રોકી શકે છે, બેઠક કરવાની ના પાડી શકે છે, પરંતુ તેઓ આપણા દેશના લોકોની ઇચ્છાશક્તિને ક્યારેય રોકી શકશે નહીં. પોતાના પર થયેલા કાનૂની કેસો અંગે બોલતા રાહુલ ગાંધીએ નરેન્દ્ર મોદી અને અમિત શાહ પર નિશાન સાધતા કહ્યું કે, "મારા વિરુદ્ધ અત્યાર સુધીમાં 45 FIR નોંધાઈ ચૂકી છે. મારો ટાર્ગેટ મારા વિરુદ્ધ 100 FIR થવાનો છે. મારા પર નોંધાતી દરેક FIR મારા માટે એક મેડલ સમાન છે. સમગ્ર સિસ્ટમને ન્યાયના કટોકટામાં ઊભી રાખવામાં આવશે.

જંતર-મંતર નજીક હાઈવોલ્ટેજ ડ્રામા

આ અગાઉ, INDIA ગઠબંધનના વિપક્ષી સાંસદોએ એકસાથે લંચ કર્યા બાદ 3 બસોમાં સવાર થઈને જંતર-મંતર તરફ વિરોધ પ્રદર્શન માટે પ્રસ્થાન કર્યું હતું. બસોની છત પર કોંગ્રેસ અને અન્ય વિપક્ષી પક્ષોના નેતાઓ રાષ્ટ્રધ્વજ તિરંગો લહેરાવતા જોવા મળ્યા હતા. જોકે, જંતર-મંતરથી આશરે 1 Kilometer દૂર અશોક રોડ પર શાંગરી-લા હોટેલ પાસે પોલીસે કડક સુરક્ષા ઘેરો બનાવી બસોને રોકી દીધી હતી. પોલીસે સમગ્ર વિસ્તારમાં ભારતીય ન્યાય સંહિતા (BNS) ની કલમ 163 લાગુ હોવાનું જણાવી નેતાઓને આગળ વધતા અટકાવ્યા હતા.

પ્રિયંકા ગાંધી રસ્તા પર બેઠા, નેતાઓની અટકાયત

પોલીસ દ્વારા રોકવામાં આવ્યા બાદ વાતાવરણ તંગ બન્યું હતું અને વિપક્ષી નેતાઓએ જોરદાર સૂત્રોચ્ચાર શરૂ કર્યા હતા. કોંગ્રેસ મહાસચિવ પ્રિયંકા ગાંધી વાડ્રા હાથમાં બંધારણની નકલ લઈને મહિલા નેતાઓ સાથે રસ્તા પર જ બેસી ગયા હતા. ત્યારબાદ દિલ્હી પોલીસે ત્વરિત કાર્યવાહી કરીને રાહુલ ગાંધી, પ્રિયંકા ગાંધી સહિત અનેક સાંસદોની અટકાયત કરી તેમને સેન્ટ્રલ દિલ્હીના પોલીસ સ્ટેશને લઈ જવામાં આવ્યા હતા.

વધુ વાંચો : જંતર-મંતર પર હાઇવોલ્ટેજ ડ્રામા, પોલીસે રોકતાં પ્રિયંકા ગાંધી રસ્તા પર સૂઈ ગયાં, લગાવ્યો ગંભીર આરોપ

રાહુલ ગાંધીએ જણાવ્યું હતું કે લોકસભા અને રાજ્યસભાના આશરે 300 સાંસદો ચૂંટણી કમિશનરોને મળીને રજૂઆત કરવા માંગતા હતા, પરંતુ તેમને મળવાની મંજૂરી આપવામાં આવી નહોતી. કોંગ્રેસ અધ્યક્ષ મલ્લિકાર્જુન ખડગેએ પણ આક્ષેપ કર્યો હતો કે ચૂંટણી પંચ વડાપ્રધાનના ઇશારે ભૂલો કરી રહ્યું છે અને વિપક્ષ જનતાના બંધારણીય અધિકારો માટે પોતાની લડાઈ જારી રાખશે.