હોળી પહેલા જ કેન્દ્ર સરકારે તેના કર્મચારીઓને મોટી ભેટ આપી છે. મોદી સરકારે કેન્દ્રીય કર્મચારીઓના મોંઘવારી ભથ્થાંમાં 4 ટકાનો વધારો કરી દીધો છે. ગુરુવારે કેન્દ્રીય કેબિનેટની બેઠકમાં ડીએ વધારાને મંજૂરી આપવામાં આવી હતી. કર્મચારીઓને 1 જાન્યુઆરી 2024થી મોંઘવારી ભથ્થું મળતું રહેશે જેને કારણે લાખો કર્મચારીઓ અને પેન્શનર્સને લાભ થશે.
વધીને કેટલું થયું ડીએ
નવા 4 ટકાના વધારા સાથે કેન્દ્રીય કર્મચારીઓનું ડીએ 50 ટકા થયું છે. આ પહેલા ઓક્ટોબર 2023માં કેન્દ્રીય કેબિનેટે 48.67 લાખ કર્મચારીઓ અને 67.95 લાખ પેન્શનરો માટે 4 ટકા ડીએ વધારીને 46 ટકા કર્યું હતું.
ગ્રેજ્યુઈટી લિમિટ પણ વધી
કેન્દ્ર સરકારે ડીએની સાથે ગ્રેજ્યુઈટી લિમિટ પણ વધારીને 25 લાખ કરી છે.
2023માં પણ 4 ટકા વધ્યું હતું ડીએ
છેલ્લે ઓક્ટોબર 2023માં કેન્દ્રીય કર્મચારીઓના ડીએમાં 4 ટકાનો વધારો થયો છે. એક વર્ષ કરતાં પણ ઓછા સમયમાં કર્મચારીઓને 8 ટકાનો વધારો મળ્યો છે.
HRA પણ વધશે
સાતમા પગાર પંચની ભલામણો મુજબ ડીએ 50 ટકા થઈ જતાં ઘર ભાડામાં પણ વધારો થશે. આ વધારાની સાથે જ કેન્દ્ર સરકારના કર્મચારીઓના ટેક હોમ સેલેરી પેકેજમાં વધારો થવાનો છે. એચઆરએ (ઘર ભાડા)ને 3 કેટેગરીમાં વિભાજીત કરવામાં આવ્યું છે. આ વર્ગો X, Y અને Z છે. જો એક્સ કેટેગરીનો કર્મચારી શહેરો/નગરોમાં રહે છે, તો તેનું એચઆરએ વધીને 30 ટકા થઈ જશે. એ જ રીતે, એચઆરએનો દર વાય કેટેગરી માટે 20 ટકા અને ઝેડ કેટેગરી માટે 10 ટકા રહેશે. હાલમાં એક્સ, વાય અને ઝેડ શહેરો/નગરોમાં રહેતા કર્મચારીઓને અનુક્રમે 27, 18 અને 9 ટકા એચઆરએ મળે છે.
