બિઝનેસ / ધનતેરસ પર લોકોએ પાણીની જેમ વાપર્યા રૂપિયા, 1,000,000,000,000ની કરી ખરીદી

દિવાળીની શરૂઆત સાથે ઉજવાતા ધનતેરસના દિવસે આ વર્ષે અદ્ભુત ખરીદી નોંધાઈ છે. દેશભરમાં લોકો સોનું, ચાંદી, વાસણો, ઇલેક્ટ્રોનિક્સ અને ઘરના ઉપકરણો ખરીદવા ઉમટી પડ્યા હતા. કન્ફેડરેશન ઓફ ઓલ ઈન્ડિયા ટ્રેડર્સ (CAIT)ના જણાવ્યા મુજબ, આ વર્ષે ભારતીય ગ્રાહકોએ માત્ર એક જ દિવસે અંદાજે ₹1 લાખ કરોડની ખરીદી કરી છે.

અહેવાલ મુજબ, આ કુલ વેચાણમાં ફક્ત સોના અને ચાંદીના વેચાણનો હિસ્સો ₹60,000 કરોડનો રહ્યો, જે ગયા વર્ષની સરખામણીમાં 25 ટકાનો વધારો દર્શાવે છે. સોનાના ભાવ આ વર્ષે 60 ટકા ઉછળી ₹1,30,000 પ્રતિ 10 ગ્રામ સુધી પહોંચી ગયા છે, છતાં પણ લોકોની ખરીદીની ઉત્સુકતા અદભુત રહી.

જ્વેલરી બજારોમાં કેટલું વેચાણ?

CAITના જ્વેલરી વિભાગ “ઓલ ઈન્ડિયા જ્વેલર્સ એન્ડ ગોલ્ડસ્મિથ્સ ફેડરેશન”ના જણાવ્યા અનુસાર છેલ્લા બે દિવસમાં જ્વેલરી બજારોમાં અપૂર્વ ધસારો જોવા મળ્યો. માત્ર દિલ્હીના બુલિયન બજારોમાં જ ₹10,000 કરોડથી વધુનું વેચાણ નોંધાયું છે. ધનતેરસને પરંપરાગત રીતે સોનું, ચાંદી અને સમૃદ્ધિનું પ્રતીક માનવામાં આવે છે અને તે પાંચ દિવસના દિવાળી તહેવારની શરૂઆત દર્શાવે છે.

ચાંદીના ભાવ કેટલા?

આ વર્ષે ચાંદીના ભાવ પણ 55 ટકા વધીને ₹1,80,000 પ્રતિ કિલો સુધી પહોંચી ગયા, જ્યારે ગયા વર્ષે તે ₹98,000 હતા. તેમ છતાં ગ્રાહકોની માંગ મજબૂત રહી. સોના-ચાંદી સિવાય વાસણો અને રસોડાના ઉપકરણોનું વેચાણ ₹15,000 કરોડ, ઇલેક્ટ્રોનિક્સ અને ઇલેક્ટ્રિકલ સામાનનું ₹10,000 કરોડ, તેમજ સુશોભન અને ધાર્મિક સામગ્રીનું ₹3,000 કરોડનું વેચાણ થયું.

આ પણ વાંચો : દિવાળીમાં IPO ભરતાં લોકોને લાગી ગઈ લોટરી! જાહેર થયાં મોટા સમાચાર, થઈ બલ્લે-બલ્લે

CAITના મહાસચિવએ જણાવ્યું કે આ ઉછાળો GSTમાં રાહત અને "વોકલ ફોર લોકલ" જેવી સરકારની નીતિઓને કારણે શક્ય બન્યો છે. ગ્રાહકો હવે ભારતીય ઉત્પાદનોને વધારે પ્રાધાન્ય આપી રહ્યા છે, જેના કારણે નાના વેપારીઓ, કારીગરો અને સ્થાનિક ઉત્પાદકોને મોટો લાભ થઈ રહ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ