બીઝનેસ / ITR ફાઈલિંગની છેલ્લી તારીખ નજીક, રિટર્ન ભરવું જરૂરી, નહીંતર 5000 રૂપિયાનો દંડ

ઇન્કમ ટેક્સ રિટર્ન (ITR) ફાઇલ કરવાની અંતિમ તારીખ 15 સપ્ટેમ્બર 2025 નજીક આવી રહી છે, અને હવે માત્ર ત્રણ દિવસ બાકી છે. ઇન્કમ ટેક્સ વિભાગના આંકડા મુજબ, 11 સપ્ટેમ્બર સુધીમાં 5.48 કરોડ ITR ફાઇલ કરવામાં આવ્યા છે. જો કે, ઈ-ફાઇલિંગ પોર્ટલ પર તકનીકી સમસ્યાઓ અને રિફંડમાં વિલંબની ચિંતાઓ વચ્ચે, ડેડલાઇન વધવાની શક્યતા ઓછી દેખાઈ રહી છે. ઇન્કમ ટેક્સ રિટર્ન ફાઇલ કરતી વખતે ટેક્સપેયર્સને અનેક તકનીકી સમસ્યાઓનો સામનો કરવો પડી રહ્યો છે. ઘણા ટેક્સપેયરઓ અને ચાર્ટર્ડ એકાઉન્ટન્ટ્સે સોશિયલ મીડિયા પ્લેટફોર્મ્સ પર આ અંગે ફરિયાદ કરી છે. તેમનું કહેવું છે કે તેઓ એન્યુઅલ ઇન્ફોર્મેશન સ્ટેટમેન્ટ (AIS), ફોર્મ 26AS અને ટેક્સપેયર્સ ઇન્ફોર્મેશન સમરી (TIS) જેવા મહત્વના દસ્તાવેજોને ઍક્સેસ કરી શકતા નથી. આ સમસ્યાઓ ગત એક મહિનાથી કરદાતાઓ વચ્ચે ચર્ચાનો મુખ્ય વિષય બની છે.

અત્યાર સુધી કેટલા રિટર્ન ફાઇલ થયા?

ઇન્કમ ટેક્સ વિભાગના જણાવ્યા મુજબ, 11 સપ્ટેમ્બર સુધીમાં 5.48 કરોડ ITR ફાઇલ થયા છે, જેમાંથી 5.15 કરોડ રિટર્નનું ઈ-વેરિફિકેશન પણ થઈ ચૂક્યું છે. જો કે, માત્ર 3.66 કરોડ રિટર્નની પ્રોસેસિંગ થઈ છે, એટલે કે ઘણા ટેક્સપેયરઓને તેમના રિફંડ માટે હજુ રાહ જોવી પડશે. આ આંકડા દર્શાવે છે કે રિટર્નની પ્રોસેસિંગમાં વિલંબ થઈ રહ્યો છે, જે કરદાતાઓ માટે ચિંતાનો વિષય છે.

શું ITR ડેડલાઇન વધશે?

જોતવાણી એસોસિએટ્સના કંપની સેક્રેટરી અને પાર્ટનરએ જણાવ્યું, “ઇન્કમ ટેક્સ રિટર્નની અંતિમ તારીખ વધશે કે નહીં, તેનું મૂલ્યાંકન અનુપાલનના આંકડા અને સિસ્ટમની તૈયારીના આધારે થવું જોઈએ. હાલની સ્થિતિ બંને પાસાંઓ પર ડેડલાઇન વધવાની શક્યતા ઓછી દર્શાવે છે.” તેમણે વધુમાં કહ્યું કે ટેક્સપેયર્સને સમયાંતરે તકનીકી સમસ્યાઓનો સામનો કરવો પડ્યો છે, જેમાં પોર્ટલનું ધીમું લોડ થવું અને પીક અવર્સ દરમિયાન મુશ્કેલીઓનો સમાવેશ થાય છે. છેલ્લા કેટલાક વર્ષોના વલણોને જોતાં, આ વખતે 15 સપ્ટેમ્બર સુધીમાં 8 કરોડ ITR ફાઇલ થવાની અપેક્ષા છે. હાલના આંકડા મુજબ, બાકીના ચાર દિવસમાં લગભગ 2.5 કરોડ નવા રિટર્ન ફાઇલ કરવાની જરૂર છે. 11 સપ્ટેમ્બરે 18 લાખ રિટર્ન ફાઇલ થયા હતા, પરંતુ આ ગતિ જાળવવી પડકારજનક છે. 8 કરોડના લક્ષ્યને હાંસલ કરવું મુશ્કેલ હોવા છતાં અશક્ય નથી.

સરકારે વધારી હતી ITRની અંતિમ તારીખ

આ વર્ષે મે મહિનામાં, સરકારે ટેક્સપેયર્સને મોટી રાહત આપતા ITR ફાઇલ કરવાની અંતિમ તારીખ 31 જુલાઈથી વધારીને 46 દિવસ આગળ એટલે કે 15 સપ્ટેમ્બર કરી હતી. આનું કારણ ITR ફોર્મ્સ અને યુટિલિટીઝ સાથે જોડાયેલી તકનીકી અને પરિચાલન સમસ્યાઓ હતી. તે સમયે ચાર્ટર્ડ એકાઉન્ટન્ટ્સ અને કરદાતાઓએ વધારાના સમયની માંગ કરી હતી. હવે ફરીથીટેક્સપેયર્સ અને CAs 15થી 30 દિવસની વધુ મુદતની માંગ કરી રહ્યા છે.

ITR ફાઇલિંગની પ્રક્રિયા અને પડકારો

ITR ફાઇલ કરવાની પ્રક્રિયા હવે સંપૂર્ણપણે ઓનલાઇન છે. ટેક્સપેયર્સએ ઇન્કમ ટેક્સ પોર્ટલ પર નોંધણી કરવી, યોગ્ય ITR ફોર્મ પસંદ કરવું (જેમ કે વેતનભોગીઓ માટે ITR-1, વ્યવસાયની આવક માટે ITR-3) અને આવક તથા વેરા સંબંધિત માહિતી ભરીને રિટર્ન સબમિટ કરવું પડે છે. ઈ-વેરિફિકેશન માટે આધાર OTP, નેટબેન્કિંગ કે ડીમેટ એકાઉન્ટ જેવા વિકલ્પો ઉપલબ્ધ છે. જો વેરિફિકેશન સમયસર ન થાય તો રિટર્નની પ્રોસેસિંગમાં વિલંબ થઈ શકે છે.

વધુમાં વાંચો: 'સુપ્રીમ કોર્ટ ચૂંટણી પંચને SIR કરાવવાનો નિર્દેશ ન આપી શકે' ECએ દાખલ કરી એફિડેવિટ

જે ટેક્સપેયર્સ સમયસર ITR ફાઇલ નથી કરી શકતા, તેમના માટે દંડની જોગવાઈ છે. જેમની આવક 5 લાખથી વધુ છે, તેમને લેટ ફાઇલિંગ પર મહત્તમ 5,000 રૂપિયાનો દંડ ભરવો પડી શકે છે. આ ઉપરાંત, બેલેટેડ રિટર્ન પર રિફંડમાં પણ વિલંબ થઈ શકે છે. આ સ્થિતિમાં, ટેક્સપેયર્સને સલાહ આપવામાં આવે છે કે તેઓ અંતિમ તારીખની રાહ જોવાને બદલે જલદીથી રિટર્ન ફાઇલ કરે, જેથી તકનીકી સમસ્યાઓ અને દંડની ચિંતાઓ ટાળી શકાય.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ