ફિલ્મ અભિનેતા ઈરફાન ખાનની માતા સઈદા બેગમનું શનિવારે જયપુરમાં નિધન થઈ ગયું છે. તેઓ 82 વર્ષના હતા. ટોંકના નવાબ ખાનદાનથી સંબંધ ધરાવતા સઈદા બેગમની તબિયત ઘણાં સમયથી ખરાબ હતી. તેમણે જયપુર સ્થિત તેમના નિવાસ સ્થાને છેલ્લા શ્વાસ લીધા. તેમના નિધનના સમાચારથી ટોંકમાં રહેતાં તેમના પરિવારજનો શોકગ્રસ્ત થઈ ગયા છે.
બોલિવૂડના જાણીતા અભિનેતા ઈરફાન ખાનની માતાનું નિધન થઈ ગયું
એક્ટર હાલ મુંબઈમાં છે
લોકડાઉનને કારણે એક્ટર કદાચ અંતિમ સંસ્કારમાં પહોંચી શકશે
પરિવારજનોએ જણાવ્યું કે ઈરફાનની માતા છેલ્લા ઘણાં સમયથી બીમાર હતા. ઈરફાનના માતા-પિતા ટોંકના રહેવાસી હતા. ઈરફાનનું બાળપણ પણ ટોંકમાં પસાર થયું છે. અત્યારે ઈરફાન પણ બીમારીથી ગ્રસ્ત છે. તેના માટે આ ખૂબ જ દુખના સમાચાર છે.
ત્યારે રિપોર્ટ મુજબ લોકડાઉન હોવાને કારણે ઈરફાન ખાન કદાચ જ તેની માતાના અંતિમ સંસ્કારમાં સામેલ થઈ શકશે. તેણે વીડિયો કોન્ફ્રેસિંગ દ્વારા માતાના અંતિમ દર્શન કર્યાં છે. તે હાલ મુંબઈમાં છે. તમને જણાવી દઈએ કે, ઈરફાનના પિતા યાસીન ખાનનું થોડાં વર્ષો પહેલાં જ અવસાન થઈ ગયું હતું.
ઈરફાન ખાન પણ 3 વર્ષથી ગંભીર બીમારીથી ઘેરાયેલો છે. 2017માં ઈરફાન કામને અધવચ્ચે છોડીને ઈલાજ માટે વિદેશ જતો રહ્યો હતો. ત્યારબાદ સોશિયલ મીડિયા પર ઈરફાને તેની બીમારી અંગે જાણકારી આપી હતી અને તે તેની તબિયત અંગે ફેન્સને અપડેટ પણ આપતો હતો. ગયા વર્ષે જ તે વિદેશથી ઈલાજ કરાવીને પાછો આવ્યો હતો. ત્યારબાદ તેણે તેની ફિલ્મ અંગ્રેજી મીડિયમનું શૂટિંગ પૂરું કર્યું હતું.