- કેન્દ્રીય ગૃહમંત્રી અમિત શાહનું કર્ણાટક ચૂંટણી વચ્ચે મોટું નિવેદન
- અમારી પાર્ટીએ 4% મુસ્લિમ અનામત નાબૂદ કરી: અમિત શાહ
- કોંગ્રેસે તુષ્ટિકરણની નીતિ હેઠળ મુસ્લિમ આરક્ષણ આપ્યું હતુ: અમિત શાહ
- કોંગ્રેસ અનામતના વિરુદ્ધમાં છે તો PM મોદીની લોકપ્રિયતા અપાર: અમિત શાહ
કર્ણાટકમાં વિધાનસભાની ચૂંટણીને લઈ રાજકીય પક્ષોએ મતદારોને રીઝવવા એડીચોટીનું જોર લગાવી દીધું છે. આ તરફ આજે કર્ણાટક ચૂંટણીના પ્રચાર પડઘમ શાંત થઈ જશે. આ બધાની વચ્ચે કેન્દ્રીય ગૃહમંત્રી અને ભાજપના દિગ્ગજ નેતા અમિત શાહનું મોટું નિવેદન સામે આવ્યું છે. તેમણે કહ્યું કે, કર્ણાટકમાં પૂર્ણ બહુમતીથી ભાજપની સરકાર બનશે. આ સાથે ઉમેર્યું કે, ભાજપને તમામ તરફથી સમર્થન મળી રહ્યુ છે.
કેન્દ્રીય ગૃહમંત્રી અમિત શાહે કહ્યું કે, મેં કર્ણાટકના તમામ પ્રદેશોની મુલાકાત લીધી છે. ગત ચૂંટણીની સરખામણીએ તમામ પ્રદેશોમાં ભાજપ તરફ વલણ, ઉત્સાહ અને સમર્થન પ્રચંડ છે. ભાજપ ત્યાં પૂર્ણ બહુમત સાથે સરકાર બનાવશે.
મુસ્લિમ અનામતને લઈ શું કહ્યું ?
અમિત શાહે કહ્યું કે, અમારી પાર્ટીએ 4% મુસ્લિમ અનામત નાબૂદ કરી છે કારણ કે તે ગેરબંધારણીય હતું. આપણા બંધારણમાં ધર્મના આધારે આરક્ષણની કોઈ જોગવાઈ નથી. કોંગ્રેસે તુષ્ટિકરણની નીતિ હેઠળ આ મુસ્લિમ આરક્ષણ આપ્યું હતું, જેને અમે હટાવી દીધું છે.
કેન્દ્રીય ગૃહમંત્રી અમિત શાહે કહ્યું કે, કોંગ્રેસે જ્યારે જ્યારે PM વિરુદ્ધ નિવેદનો કર્યા છે ત્યારે ભાજપે જવાબ આપ્યા છે. તેમણે કહ્યું કે, કર્ણાટકમાં પૂર્ણ બહુમતીથી ભાજપની સરકાર બનશે. આ સાથે કહ્યું કે, કોંગ્રેસ અનામતના વિરુદ્ધમાં છે તો PM મોદીની લોકપ્રિયતા અપાર છે. તેમણે કહ્યું કે, કર્ણાટકમાં ડબલ એન્જીન સરકાર બનશે. કર્ણાટકની જનતા કોંગ્રેસને જવાબ આપશે. કોંગ્રેસે PM માટે અપશબ્દનો ઉપયોગ કર્યો છે.
અમિત શાહે કહ્યું કે, અમે આરક્ષણની અંદર ખૂબ જ સમજી વિચારીને આરક્ષણ કર્યું છે. અમે અનુસૂચિત જનજાતિ આરક્ષણમાં અનામતમાં કેટલીક મર્યાદાઓ નક્કી કરી છે. કોંગ્રેસ તેને હટાવવા માંગે છે પરંતુ હું સ્પષ્ટ કરવા માંગુ છું કે, જે અનામત એસસીની અનામતમાં છે, તેને હટાવવામાં નહીં આવે.
