ભાજપની લોકસભાની 195 ઉમેદવારોની યાદીમાં પશ્ચિમ બંગાળમાં 20 ઉમેદવારો સામેલ છે જેમાં ઉડીને આંખે વળગે તેવું નામ ભોજપુરી સ્ટાર પવનસિંહનું છે. ભાજપે પવનસિંહને આસનસોલ બેઠક પરથી ઉમેદવાર બનાવ્યાં છે. તેમની સામે ટીએમસી બોલીવુડ એક્ટર શત્રુઘ્ન સિંહાને ઉતારવાની છે. ભાજપના સૂત્રોને ટાંકીને જાણવા મળે છે કે એક આંતરિક સર્વે અને અનેક લોકો સાથેની વાતચીત બાદ એવું તારણ નીકળ્યું હતું કે શત્રુઘ્ન સિંહા સામે કોઇ સ્ટારને રમાડવો જોઇએ અને ભોજપુરી સ્ટાર પવન સિંઘનું નામ ફાઇનલ થઇ ગયું હતું. ભાજપના મતે આ લડાઈ ઓલ્ડ સ્ટાર અને ન્યૂ સ્ટાર વચ્ચે છે. બંગાળની સૌથી હાઈપ્રોફાઈલ બેઠકોમાંની એક આસનસોલની બેઠક છે. અહીં મોટી મોટી હસ્તીઓને હંમેશા મેદાનમાં ઉતારવામાં આવે છે.
ભાજપે 195 ઉમેદવારોની પહેલી યાદી જાહેર કરી
ભારતીય જનતા પાર્ટી (ભાજપ)એ શનિવારે આગામી લોકસભા ચૂંટણી માટે 195 ઉમેદવારોની પહેલી યાદી જાહેર કરી છે. પશ્ચિમ બંગાળમાં ભાજપે 20 લોકોની યાદી જાહેર કરી છે. આમાંથી નવ સાંસદોને ફરી ટિકિટ આપવામાં આવી છે. અલીપુરદુઆરથી માત્ર એક જ સાંસદ જોન બરલાને ટિકિટ આપવાનો ઇનકાર કરવામાં આવ્યો છે. તેમની જગ્યાએ બે વખત ધારાસભ્ય રહી ચૂકેલા મનોજ તિગ્ગાને ટિકિટ આપવામાં આવી છે. આ 20 લોકોમાં ચાર ધારાસભ્યો છે, જેમને ટિકિટ આપવામાં આવી છે.
કોણ છે પવનસિંહ
પવન સિંહ ભોજપુરી ફિલ્મના સ્ટાર છે. તેમની ફેન ફોલોઇંગ ખૂબ જ મોટી છે અને તેની એક્ટિંગ અને ફિલ્મોમાં ગાવાની સાથે તેની પ્રોપર્ટી પણ કરોડોમાં છે. અહેવાલો અનુસાર પવન સિંહની અંદાજિત નેટવર્થ લગભગ 6-8 મિલિયન ડોલર (લગભગ 50-65 કરોડ રૂપિયા) છે. પવન સિંહની ગણતરી ભોજપુરી સિનેમાના સૌથી મોંઘા કલાકારોમાં થાય છે.
