- બિહારના નાયબ મુખ્યમંત્રી તેજસ્વી યાદવને ઝટકો
- તેજસ્વી યાદવ સામે પ્રાથમિક રીતે ગુનો બનતો હોવાનું કોર્ટે નોંધ્યું
- તેજસ્વી યાદવ સામે અમદાવાદ મેટ્રોપોલિટન મેજિસ્ટ્રેટ કોર્ટે સમન્સ કર્યુ ઇશ્યુ
બિહારનાં નાયબ મુખ્યમંત્રી તેજસ્વી યાદવ સામે બદનક્ષી કેસમાં અમદાવાદ મેટ્રોપોલિટન મેજીસ્ટ્રેટ કોર્ટે સમન્સ ઈશ્યું કરતા તેજસ્વી યાદવની મુશ્કેલીમાં વધારો થયો છે. ત્યારે બદનક્ષી કેસમાં પ્રાથમિક રીતે ગુનો બનતો હોવાનું કોર્ટે નોંધ્યું છે. જેથી તેજસ્વી યાદવ સામે પણ પ્રાથમિક રીતે ગુનો બને છે જેની કોર્ટે નોંધ લીધી હતી. તેમજ 22 સપ્ટેમ્બરનાં રોજ તેજસ્વી યાદવને હાજર રહેવા માટે મેટ્રો કોર્ટે સમન્સ ઈશ્યું કર્યું હતું.
હરેશ મહેતાએ નોંધાવ્યો છે કેસ
સામાજિક કાર્યકર અને બિઝનેસમેન હરેશ મહેતાએ તેજસ્વી યાદવે આપેલા નિવેદન મામલે મેટ્રો કોર્ટમાં માનહાનિનો કેસ દાખલ કર્યો છે. ગુજરાતીઓને ઠગ કહેવા બદલ બિહારના DyCM તેજસ્વી યાદવ સામે IPC કલમ 499, 500 હેઠળ ફરિયાદ નોંધવામાં આવી છે. ફરિયાદમાં તેજસ્વી યાદવના વિવાદીત નિવેદનના કારણે ગુજરાત અને ગુજરાતીઓનું અપમાન થયું હોવાથી તેમની વિરુદ્ધ બદનક્ષીનો કેસ ચલાવી સખત સજા કરવામાં આવે તેવી માંગ કરવામાં આવી છે.
શું બોલ્યા હતા તેજસ્વી યાદવ?
PNB કૌભાંડના આરોપી મેહુલ ચોક્સીની રેડ કોર્નર નોટિસ રદ્દ થવા મામલે નિવેદન આપતા સમયે બિહારના નાયબ મુખ્યમંત્રી તેજસ્વી યાદવે બફાટ કર્યો હતો. વડાપ્રધાન નરેન્દ્ર મોદી અને કેન્દ્રીય ગૃહમંત્રી અમિત શાહના પર નિશાન સાધતા તેજસ્વી યાદવે તમામ ગુજરાતીઓ પર આપત્તિજનક શબ્દનો ઉપયોગ કર્યો હતો. તેજસ્વી યાદવે કહ્યું હતું કે, બે ઠગ છે. આજે દેશની દશા જોઈએ તો, માત્ર ગુજરાતી જ ઠગ હોઈ શકે છે અને તેમને માફ પણ કરવામાં આવશે.
