સ્પોર્ટ્સ / IPL જેવી જ વધુ એક લીગ શરૂ કરવાની તૈયારીમાં BCCI, કંઇક આવું હશે ફોર્મેટ, જાણો ક્યારથી રમાવાની શક્યતા

• 10-10 ઓવરની મેચને શાનદાર રિસ્પોન્સ મળી રહ્યો છે
• નવા ફોર્મેટની લીગ શરૂ થઈ શકે છે !
• સપ્ટેમ્બર-ઓક્ટોબર 2024માં રમાઈ શકે છે આ લીગ !

વિશ્વના અનેક દેશોમાં 10-10 ઓવરની ક્રિકેટ મેચને શાનદાર રિસ્પોન્સ મળી રહ્યો છે. આ કારણોસર ભારતમાં પણ આ ફોર્મેટની મેચ શરૂ કરવાની તૈયારી કરવામાં આવી રહી છે. BCCI ક્રિકેટના આ સૌથી નાના અને નવા ફોર્મેટની લીગ શરૂ કરવાનું વિચારી રહી છે. આ ફોર્મેટ માટેની બ્લૂ પ્રિન્ટ તૈયાર થઈ ગઈ છે. આ લીગ સપ્ટેમ્બર-ઓક્ટોબર 2024માં રમાઈ શકે છે.

મીડિયા રિપોર્ટ અનુસાર શેરધારકોને BCCIની T10 ફોર્મેટમાં લીગ શરૂ કરવાની યોજના ખૂબ જ પસંદ આવી છે. આ લીગ 20-20 ઓવરના ફોર્મેટમાં પણ રમાઈ શકે છે, જે અંગે વિચારણાં કરવામાં આવી રહી છે. આ લીગમાં શામેલ થનાર ખેલાડીઓની વય મર્યાદા નક્કી કરવા બાબકતે ચર્ચા કરવામાં આવી રહી છે. IPL અને આંતરરાષ્ટ્રીય ક્રિકેટ પર કોઈ અસર ન પડે, તે માટે વયમર્યાદા નક્કી કરવામાં આવી રહી છે.

BCCIની આ યોજના IPL ફ્રેન્ચાઈઝીની સહમતિ પર નિર્ભર રહેશે. આ મામલે BCCIનો IPL ફ્રેન્ચાઈઝી સાથે કરાર છે. આ કારણોસર IPL જેવી અન્ય લીગ શરૂ કરવા માટે, BCCIએ IPL ફ્રેન્ચાઇઝીની મંજૂરી લેવી પડશે. નવી લીગથી જૂની ફ્રેન્ચાઇઝીઓને આર્થિક નુકસાન ન થાય તે માટે IPL ફ્રેન્ચાઇઝીની મંજૂરી લેવાની રહેશે. 

અનેક બાબતે ચર્ચા વિચારણાં ચાલી રહી છે
આ પ્લાનને વધુ સારો બનાવવા માટે ચર્ચા કરવામાં આવી રહી છે. શું આ લીગ ભારતમાં દર વર્ષે રમાવવી જોઈએ? આ લીગનું દર વર્ષે અલગ-અલગ સ્થળે આયોજન કરવું જોઈએ? આ લીગ T10 કે T20 કયા ફોર્મેટમાં રમાવી જોઈએ? વયમર્યાદા રાખવી જોઈએ કે નહીં? આ તમામ સવાલ અંગે ચર્ચા વિચારણાં કરવામાં આવી રહી છે.