અમદાવાદ / નથી જોઈ શકતા, નથી સાંભળી શકતા, છતાં દિવ્યાંગ પ્રેમભાવથી દોરામાં મોતી અને આભલા પરોવી બનાવે છે સુંદર રાખડી

• અમદાવાદમાં દિવ્યાંગ બાળકોએ બનાવી અવનવી રાખડીઓ
• સંસ્થા દ્વારા દિવ્યાંગ બાળકો માટે અનેક પ્રવૃત્તિઓ કરાવાય છે
• દિવાળી વખતે પણ અવનવી ચીજ વસ્તુઓ બાળકો તૈયાર કરે છે

અમદાવાદના આવેલ અંધજન મંડળના દિવ્યાંગ બાળકોનો માનસિક તેમજ શારીરિક વિકાસ થઈ શકે તે હેતુથી તેમની પાસે અલગ અલગ પ્રવૃતિઓ કરાવવામાં આવે છે. આ રાખડી બનાવતી દીકરીઓ પોતે દિવ્યાંગ છે.  જેમાંથી કોઈ જોઈ શકતા નથી, તો કોઈ બોલી કે સાંભળી શકતા નથી.  છતાંય તેઓ તેમના પ્રેમભાવથી દોરામાં મોતી અને આભલા પરોવી આ દીકરીઓ ભાઈની રક્ષા માટે સુંદર મજાની રાખડીઓ તૈયાર કરવાનું કાર્ય કરે છે.

સંસ્થા દ્વારા દિવ્યાંગ બાળકો માટે અનેક પ્રવૃતિઓ કરવામાં આવે છે
દિનેશભાઈ બહેલ સાથે વાત કરતા જણાવ્યું કે અમારી સંસ્થા દ્વારા દિવ્યાંગ બાળકો માટે અનેક પ્રવૃત્તિઓ કરવામાં આવે છે. એમના હાથમાં  જાદુ છે (મેજિકલ ફિંગર) રોજ ૬ થી ૭ કલાક કામ કરીને દિવાળીના દીવા,  બાંધણી, તોરણ, પેપર કપ, પેપર ડીસ જેવી વિવિધ વસ્તુઓ આ બાળકો દ્વારા બનાવામાં આવે છે. જેનાથી દિવ્યાંગ દીકરા-દીકરીઓનો માનસિક અને શારીરિક વિકાસ થઈ શકે.

દિવ્યાંગ બાળકો રાખડીઓ પણ બનાવી રહ્યા છે
દીકરીઓ રક્ષાબંધન માટે વિવિધ ડિઝાઇનની રાખડીઓ બનાવીને તેનું જુદી જુદી જગ્યાએ વેચાણ કરે છે. આ વખતે પચાસ હજાર જેટલી રાખડીઓ બનાવાની તૈયારી કરી રહ્યા છે. દિવ્યાંગ બાળકો હાલ આપણા દેશનું નામ રોશન કરીને મેડલ પણ મેળવી રહ્યા છે.