ક્રાઈમ / અરવલ્લીના શામળાજીમાં પતિએ કુહાડી મારીને પત્નીની હત્યા કરી, લાશની બાજુમાં બેસી રહ્યો

અરવલ્લીના શામળાજી તાલુકાના શામળપુર ગામમાં ઘરકંકાસમાં પતિએ પત્નીના માથામાં કુહાડીના ઘા ઝીંકી દેતાં તેણીનું મોત નીપજ્યું હતું. ઘટનાને પગલે સમગ્ર પંથકમાં ચકચાર મચી હતી.

કુહાડી વડે કરી પત્નીની હત્યા

શામળપુર ગામે રહેતા પ્રભુદાસ વિરજી ગામેતી અને તેમની પત્ની કૈલાશબેન વચ્ચે ઘરકામ બાબતે બોલાચાલી થઈ હતી. દરમિયાન પ્રભુદાસે ઉશ્કેરાઈ જઈ ઘરમાં પડેલી કુહાડી વડે પત્નીના માથામાં ઘા ઝીંકી દીધો હતો.

આરોપી લાશની બાજુમાં બેસી રહ્યો

ગંભીર રીતે ઘવાયેલી કૈલાશબેન જીવ બચાવવા ઘર બહાર દોડી હતી, પરંતુ ઘર નજીક ખુલ્લી જગ્યામાં ઢળી પડતાં તેમનું મોત નીપજ્યું હતું. આ ઘટના બાદ આરોપી પતિ મૃતદેહની બાજુમાં જ બેસી રહ્યો હતો. દરમિયાન મૃતકના પુત્રને ઘટનાની જાણ થતાં તે ઘરે દોડી આવ્યો હતો. પુત્ર સહિત આસપાસના લોકો એકત્ર થતાં આરોપી પ્રભુદાસ ત્યાંથી ફરાર થઈ ગયો હતો.

પુત્રે જાણ કરતા પોલીસ દોડી આવી

પુત્ર દ્વારા ઘટનાની જાણ શામળાજી પોલીસને કરવામાં આવતાં તાત્કાલિક સ્થળ પર પહોંચી હતી. પોલીસે મૃતકની લાશને પોસ્ટમોર્ટમ માટે ખસેડી હતી અને મૃતકના પુત્ર દીપક પ્રભુદાસ ગામેતીની ફરિયાદના આધારે તેના પિતા પ્રભુદાસ વિરજી ગામેતી વિરુદ્ધ હત્યાનો ગુનો નોંધ્યો હતો. ત્યાર બાદ અલગ અલગ ટીમો બનાવીને પોલીસે ફરાર આરોપીને ગણતરીના કલાકોમાં ઝડપી પાડ્યો હતો. આરોપીની ધરપકડ કરી આગળની કાયદેસરની કાર્યવાહી હાથ ધરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ