કાર્યવાહી ક્યારે / 'તારા નાટક વધી ગયા છે, આજે તો પતાવી...’ કહીને 3 શખ્સોનો યુવક પર હથોડાથી જીવલેણ હુમલો

સુરતના જહાંગીરપુરા ખાતે આવેલ જાનકી રેસિડેન્સીમાં ચર્ચા કરતી વખતે સોસાયટીના મેઈનટેઈન્સ અંગે બોલાચાલી થતા ડોક્ટર સહિત ત્રણ લોકોએ બેઘા મળી યુવક પર હથોડાથી હુમલો કર્યો હતો. હુમલાનો વીડિયો સોશિયલ મીડિયામાં વાયરલ થયો હતો. આ સમગ્ર મામલે ચિરાગ કાંતીલાલ કોસંબિયા (રહે. જાનકી રેસીડેન્સી, જહાંગીરપુરા) એ જહાંગીરપુરા પોલીસ મથકે ડોક્ટર સહિત ત્રણ વ્યક્તિઓ સામે પોલીસ ફરિયાદ નોંધાવી છે.

ઈજાગ્રસ્તને સારવાર અર્થે ખસેડાયો

મળતી માહિતી મુજબ વાતચીત દરમ્યાન મામલો ઉગ્ર બનતા ભરત સુરતી સેન્ટીંગના કામમાં ઉપયોગમાં લેવાતો હથોડો લઈ આવ્યા અને ચિરાગ પર જીવલેણ હુમલો કરી અપશબ્દો બોલેલ અને કહેલ કે તારા નાટક વધી ગયા છે. આજે તો તને પતાવી જ નાંખું તેમ કહી ધમકી આપી હતી. જે બાદ હિરેન બરોડીયા અને ડો. વિપુલ બરોડિયાએ પણ ચિરાગ સાથે ઝપાઝપી કરી હતા. ઘટના સ્થળે હાજર અન્ય લોકોએ વચ્ચે પડી બંનેને છુટા પાડ્યા હતા. અને ઈજાગ્રસ્તને સારવાર અર્થે હોસ્પિટલ ખસેડવામાં આવ્યો હતો.

આ પણ વાંચોઃ મોડી રાત્રે અમદાવાદમાં ખેલાયો ખૂની ખેલ, 25 વર્ષના હિતેશનું અજાણ્યા શખ્સે ઢીમ ઢાળી દીધું

પોલીસે આરોપીઓની શોધખોળ શરૂ કરી

સોસાયટીમાં હાજર રહેલ સ્થાનિકો દ્વારા સમગ્ર ઘટનાનો વીડિયો બનાવવામાં આવ્યો હતો. તેમજ નજરે જોનારા બાળકો તેમજ અન્ય લોકો જીવલેણ હુમલો જોઈને ચીસ પાડી ઉઠ્યા હતા. ચિરાગ કોસંબિયાએ જહાંગીરપુરા પોલીસ મથકે ભરત સુરતી, હિરેન બરોડિયા અને ડોક્ટર વિપુલ બરોડિયા વિરૂદ્ધ ફરિયાદ નોંધાવી છે. બનાવ બાદ ત્રણેય લોકો સ્થળ પરથી ભાગી ગયા હોવાનું જાણવા મળી રહ્યું છે. પોલીસે ફરિયાદના આધારે આરોપીઓને પકડવાની તજવીજ હાથ ધરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ