Stock Market Update / શેર બજારમાં કડાકો: માર્કેટ ખુલતા જ સેન્સેક્સ 600 અંક તૂટ્યો, નિફ્ટીમાં પણ ભૂચાલ

સોમવારે શેરબજાર ખુલતાની સાથે જ ભારે કડાકો જોવા મળ્યો. મધ્ય પૂર્વમાં અમેરિકા અને ઈરાન વચ્ચે વધી રહેલા યુદ્ધના કારણે વૈશ્વિક બજારોમાં નકારાત્મક માહોલ સર્જાયો હતો, જેની સીધી અસર ભારતીય શેરબજાર પર પણ જોવા મળી. એશિયન બજારોમાં પહેલેથી જ ઘટાડાના સંકેતો દેખાઈ રહ્યા હતા અને ટ્રેડિંગ શરૂ થતાં જ બોમ્બે સ્ટોક એક્સચેન્જ (BSE) તેમજ નેશનલ સ્ટોક એક્સચેન્જ (NSE) બંનેમાં ભારે વેચવાલી જોવા મળી.

BSE સેન્સેક્સ 700 પોઈન્ટથી વધુ ગબડ્યો

શેરબજારમાં ઘટાડાના સંકેતો પહેલાથી જ દેખાઈ રહ્યા હતા અને ટ્રેડિંગ શરૂ થતાંની સાથે જ સેન્સેક્સ અને નિફ્ટી બંનેમાં તીવ્ર ઘટાડો નોંધાયો. BSE સેન્સેક્સ 700 પોઈન્ટથી વધુ ગબડ્યો, જ્યારે NSE નિફ્ટી 200 પોઈન્ટ સુધી નીચે સરકી ગયો. રોકાણકારોમાં ગભરાટ જોવા મળ્યો અને શરૂઆતથી જ બજારમાં ભારે અસ્થિરતા જોવા મળી.

77,569 પોઈન્ટની સરખામણીએ 76,963 પર તીવ્ર ઘટાડા

સોમવારે BSE સેન્સેક્સ તેના અગાઉના બંધ 77,569 પોઈન્ટની સરખામણીએ 76,963 પર તીવ્ર ઘટાડા સાથે ખુલ્યો હતો. ત્યારબાદ થોડા જ સમયમાં તેમાં વધુ ઘટાડો નોંધાતાં તે 700થી વધુ પોઈન્ટ તૂટીને 76,857 સુધી પહોંચી ગયો. બીજી તરફ NSE નિફ્ટી પણ અગાઉના બંધ 24,206ની સરખામણીએ 24,039 પર ખુલ્યો હતો અને બાદમાં લગભગ 200 પોઈન્ટ ઘટીને 24,000ની આસપાસ ટ્રેડ થતો જોવા મળ્યો.

મારુતિનો શેર 2 ટકા અને HDFC બેંકનો શેર લગભગ 1.60 ટકા સુધી

બજારમાં આવેલા આ મોટા ઘટાડાની અસર મોટા શેરો પર પણ સ્પષ્ટ જોવા મળી. BSE લાર્જકેપ કેટેગરીમાં ઇન્ડિગોનો શેર લગભગ 2.50 ટકા, ટાટા સ્ટીલનો શેર 2.35 ટકા, મારુતિનો શેર 2 ટકા અને HDFC બેંકનો શેર લગભગ 1.60 ટકા સુધી ઘટીને ટ્રેડ થઈ રહ્યો હતો. ઉપરાંત મિડકેપ શેરોમાં પણ ભારે દબાણ જોવા મળ્યું. મુથૂટ ફાઇનાન્સનો શેર 2.50 ટકા, અશોક લેલેન્ડનો શેર 2 ટકા, કોફોર્જનો શેર 1.95 ટકા અને HPનો શેર લગભગ 1.70 ટકા સુધી નીચે આવ્યો હતો.

ઈરાન વચ્ચે ચાલી રહેલું ભીષણ યુદ્ધ માનવામાં આવી

શેરબજારમાં આવેલા આ ઘટાડા પાછળનું સૌથી મોટું કારણ મધ્ય પૂર્વમાં અમેરિકા અને ઈરાન વચ્ચે ચાલી રહેલું ભીષણ યુદ્ધ માનવામાં આવી રહ્યું છે. યુદ્ધના કારણે વૈશ્વિક રોકાણકારોમાં અનિશ્ચિતતા વધી છે, જેના પરિણામે વિશ્વભરના શેરબજારોમાં ભારે દબાણ જોવા મળી રહ્યું છે. એશિયન બજારોમાં પણ તેની અસર સ્પષ્ટ રહી હતી. જાપાનનો નિક્કી ઇન્ડેક્સ 900થી વધુ પોઈન્ટના ઘટાડા સાથે ટ્રેડ થઈ રહ્યો હતો, જ્યારે દક્ષિણ કોરિયાનો કોસ્પી ઇન્ડેક્સ લગભગ 7 ટકા સુધી તૂટી ગયો હતો. આ નકારાત્મક વૈશ્વિક સેન્ટિમેન્ટની સીધી અસર ભારતીય શેરબજાર પર પણ પડી છે.

ક્રૂડ ઓઇલના ભાવમાં પણ અચાનક ઉછાળો

આ ઉપરાંત હોર્મુઝ સ્ટ્રેટ બંધ થવાની આશંકાને કારણે ક્રૂડ ઓઇલના ભાવમાં પણ અચાનક ઉછાળો આવ્યો છે. જેના કારણે વૈશ્વિક સ્તરે ફરી એક વખત ફુગાવાના જોખમની ચિંતા વધી ગઈ છે. બ્રેન્ટ ક્રૂડના ભાવ લગભગ 5 ટકા વધીને પ્રતિ બેરલ 80 ડોલરની નજીક પહોંચી ગયા હતા. જ્યારે WTI ક્રૂડ ઓઇલ અને મુર્બન ક્રૂડના ભાવમાં પણ લગભગ 4 ટકાનો વધારો નોંધાયો હતો અને તે પ્રતિ બેરલ 75 ડોલરની આસપાસ ટ્રેડ થઈ રહ્યા હતા.

આ પણ વાંચો : સ્ટ્રેટ ઓફ હોર્મુઝ સંકટમાં રશિયા બન્યું ઢાલ, ક્રૂડ ઓઇલની ખરીદીમાં બનાવ્યો રેકોર્ડ

આ તમામ પરિબળોને કારણે ભારતીય શેરબજારમાં સપ્તાહની શરૂઆત ભારે ઘટાડા સાથે થઈ છે. વૈશ્વિક યુદ્ધની સ્થિતિ, એશિયન બજારોમાં નબળાઈ અને ક્રૂડ ઓઇલના વધતા ભાવને કારણે રોકાણકારોમાં ચિંતા વધી છે. આગામી દિવસોમાં મધ્ય પૂર્વની સ્થિતિ અને આંતરરાષ્ટ્રીય બજારોની દિશા ભારતીય શેરબજાર માટે મહત્વપૂર્ણ સાબિત થઈ શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ