રાજ્યના હવામાનને લઈ અંબાલાલ પટેલની ફરી એકવાર આગાહી સામે આવી છે. તેમણે આગાહી કરી છે કે, રાજ્યમાં આજથી તાપમાનમાં વધારો થશે. જેમાં મધ્ય ગુજરાતના વડોદરા, આણંદમાં ગરમીનુ પ્રમાણ વધું રહેશે. જ્યાં તાપમાનનો પારો ઉંચકાઈને 43 ડિગ્રી સુધી જશે તેવી પણ શક્યતાઓ વ્યક્ત કરી છે.
કયાં કેટલો તાપમાન રહેશે ?
હવામાન નિષ્ણાંત અંબાલાલ પટેલે ગરમીને લઈ આગાહી કરતા જણાવ્યું હતું કે, અમદાવાદમાં 42 ડિગ્રીથી વધુ તાપમાન નોંધાવાની શક્યતા છે જ્યારે સૌરાષ્ટ્રના રાજકોટમાં 41 ડિગ્રીથી વધુ તાપમાન નોંધાશે. સુરેન્દ્રનગર, હળવદ, મોરબીમાં 43 ડિગ્રી તો કચ્છ જિલ્લામાં 40 ડિગ્રી તાપમાન રહેવાની શક્યતા વ્યક્ત કરી છે. વધુમાં જૂનાગઢ, ભાવનગરમાં 42 ડિગ્રી, પોરબંદર, દ્વારકામાં 36 ડિગ્રી અને સુરત જિલ્લામાં 39 ડિગ્રી તાપમાન રહેવાની સંભાવના વ્યક્ત કરી છે. આહવા, ડાંગ, વલસાડમાં 36 ડિગ્રી અને ઈડર, વડાલીમાં 43 ડિગ્રી ગરમીનો પારો પહોંચી શકે છે.
વાંચવા જેવું: ગુજરાતમાં ગરમીનો પારો જશે આસમાને, બે દિવસનું યલો એલર્ટ જાહેર, અમદાવાદનું તાપમાન 41.3 ડિગ્રીએ
ચોમાસું વહેલુ આવશે ?
વેસ્ટર્ન ડિસ્ટર્બન્સના કારણે 18 એપ્રિલથી તાપમાનમાં ઘટાડો થશે. ઉલ્લેખનીય છે કે, અરબ સાગર અને બંગાળની ખાડીના ભેજથી વેસ્ટર્ન ડિસ્ટર્બન્સ સર્જાશે. 18થી 21 એપ્રિલ દરમિયાન રાજ્યમાં વાદળછાયુ વાતાવરણ રહેશે. તો 25 એપ્રિલ બાદ વેસ્ટર્ન ડિસ્ટર્બન્સથી ગરમી વધવાની શક્યતા વ્યક્ત કરાઈ છે. અખાત્રીજ દરમિયાન કેટલાક વિસ્તારોમાં પ્રિમોનસૂન એક્ટિવિટી સર્જાશે. જેના પગલે ગુજરાતમાં આ વર્ષે વહેલું ચોમાસુ શરૂ થવાની આગાહી કરાઈ છે. 8 થી 14 જૂન દરમિયાન ગુજરાતમાં ચોમાસાનો પ્રારંભ થઈ જશે અને 24 મે થી 4 જૂન દરમિયાન ગુજરાતના કેટલાક વિસ્તારોમાં વરસાદ થશે. રોહિણી નક્ષત્રને લઇ રાજ્યમાં વરસાદ પડી શકે છે તેમ પણ અંબાલાલ પટેલ જણાવ્યું છે
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
