કાર્યવાહી / સિંધુભવન સ્પા કાંડ મામલે અમદાવાદ CP એક્શનમાં: તાત્કાલિક ધોરણે બોડકદેવના PI ધવનને હટાવાયા, નવો ચાર્જ કોના શિરે

• સિંધુભવન રોડ પર સ્પામાં યુવતીને માર મારવાનો કેસ
• બોડકદેવ પોલીસ સ્ટેશનના PI અભિષેક ધવનને હટાવાયા
• સ્પા કાંડ બાદ અભિષેક ધવનને હટાવી એસ.એન.પટેલને ચાર્જ સોંપાયો
• બોડકદેવના PI અભિષેક ધવનની વેજલપુર બદલી થઈ

Ahmedabad News: અમદાવાદના સિંધુભવન રોડ પર આવેલા ગેલેક્સી સ્પાના માલિક દ્વારા યુવતીને ઢોર માર મારવામાં આવતા ખળભળાટ મચી ગયો હતો.  સ્પા સંચાલકનો યુવતીને ઢોર માર મારતો વીડિયો વાયરલ થયો હતો. સોશિયલ મીડિયા પર આ વીડિયો ફરતા થતાં સમગ્ર મુદ્દો ટોક ઓફ ધ ટાઉન બન્યો હતો. જે બાદ પોલીસ દ્વારા સ્પા સંચાલક મોહસીન રંગરેજની ધરપકડ કરવામાં આવી હતી. સિંધુભવન રોડ પર સ્પા કાંડ બાદ પોલીસની આબરૂના લીરેલીરા ઊડતા તંત્ર હરકતમાં આવ્યું છે. 

PI ધવનને હટાવી એસ.એન.પટેલને ચાર્જ સોંપ્યો
આ ઘટના બાદ પોલીસ કમિશનર જી.એસ મલિકે ગંભીર નોંધ લઈને PI અભિષેક ધવનને હટાવી એસ.એન.પટેલને ચાર્જ સોંપ્યો છે. જ્યારે પીઆઈ ધવનને વેજલપુર પોલીસ સ્ટેશનમાં સેકન્ડ પીઆઈનો ચાર્જ સોંપવામાં આવ્યો છે. અહીં સૌથી મહત્વની વાત તો એ છે કે સમગ્ર ઘટના બાદ યુવતી ફરિયાદ નોંધાવવા પોલીસ સ્ટેશન ખાતે પહોંચી હતી, છતાં પોલીસે ફરિયાદ નોંધી નહોતી. પીઆઈ અભિષક ધવનની બેદરકારીથી પોલીસની આબરૂના લીરેલીરા ઉડ્યા છતાં પીઆઈ સામે કોઈ દંડાત્મક કાર્યવાહી કરવામાં આવી નથી. તેઓની ફક્ત બદલી કરવામાં આવી છે.    

હોબાળો થતા યુવતીની નોંધવામાં આવી ફરિયાદ
સિંધુભવન રોડ પર આવેલા ગેલેક્સી સ્પાના માલિકે તેના સ્પામાં કામ કરતી યુવતીને ઢોર માર મારતો વીડિયો વાયરલ થયો હતો. જે બાદ યુવતી બોડકદેવ પોલીસ સ્ટેશન ખાતે ફરિયાદ નોંધાવવા પહોંચી હતી, પરંતુ ફરિયાદ નોંધી નહતી. પરંતુ વીડિયો વાયરલ થયા બાદ હોબાળો મચતા યુવતીની ફરિયાદ નોંધવામાં આવી હતી. તો સમગ્ર ઘટનાની નોંધ રાજ્ય સરકાર અને પોલીસ કમિશનર જી.એસ મલિકે પણ લીધી હતી. 

ફરાર આરોપીની કરાઈ હતી ધરપકડ
જે બાદ  પોલીસ એક્શનમાં આવી ગઈ હતી અને ફરાર સ્પા સંચાલકની શોધખોળ હાથ ધરવામાં આવી હતી. જે બાદ આરોપીને દબોચી લઈ તેમની વિરુદ્ધ કલમ 354, 323, 294-ખ હેઠળ ગુનો નોંધાયો હતો.