SHORT & SIMPLE / ખરા બપોરે અમદાવાદના ઇસ્કોનબ્રિજ પરથી રિક્ષા ચાલક વૃદ્ધે લગાવી મોતની છલાંગ, પોલીસે હાથ ધરી તપાસ

• ઈસ્કોન બ્રિજ પરથી વૃદ્ધનો આપઘાત
• ફેફસાની બીમારીથી પીડિત હતા વૃદ્ધ 
• પોલીસે તપાસ હાથ ધરી

અમદાવાદમાં ચકચાર ભરેલી ઘટના સામે આવી છે. અમદાવાદના ઈસ્કોન બ્રિજ પરથી ભરબપોરે ટ્રાફિકની વચ્ચે વૃદ્ધે મોતની છલાંગ લગાવી હતી. આ બનાવને પગલે આસપાસના લોકો એકઠા થવા લાગ્યા હતા અને ભારે ટ્રાફિકજામ પણ સર્જાયો હતો. આ અંગે જાણ થતાં પોલીસની ટીમ પણ ઘટના સ્થળે દોડી આવી હતી અને તપાસ શરૂ કરી હતી. 

ઇસ્કોનબ્રિજ પરથી કૂદીને મોતને વ્હાલુ કર્યું
મળતી માહિતી અનુસાર, શહેરના વેજપુર વિસ્તારમાં આવેલા ક્રિષ્નાધામ ઔડાના મકાનમાં રહેતા અને રિક્ષા ચલાવતા માંગીલાલ નામના વૃદ્ધ આજે રાબેતા મુજબ રિક્ષા લઈને ઘરેથી નીકળ્યા હતા, બપોરના સમયે તેઓ રિક્ષા લઈને ઈસ્કોન બ્રિજ પર પહોંચ્યા હતા અને ત્યાં બ્રિજ પર સાઈડમાં રિક્ષા ઉભી રાખી બાદમાં બ્રિજ ઉપર પડતું મૂક્યું હતું. 

પોલીસે પહોંચી વધુ તપાસ શરૂ કરી
બ્રિજ પરથી કૂદકો મારતા તેઓ નીચે પટકાયા હતા અને તેમનું સ્થળ પર જ મોત નિપજ્યું હતું. પોલીસની પ્રાથમિક તપાસમાં જાણવા મળ્યું હતું કે, વૃદ્ધ લાંબા સમયથી ફેફસાની બીમારીથી પીડિત હતા. જેથી બીમારીથી કંટાળીને તેમણે મોતને વહાલું કર્યું હોવાની શક્યતા છે. આ સમગ્ર ઘટના સીસીટીવી કેમેરામાં કેદ થઈ છે.