નિર્દયતા / અમદાવાદની રૂવાંડા ઊભા કરી દે તેવી ઘટના, માસૂમની આંખેય ઊઘડી નથી ત્યાં ત્યજીને ચાલ્યો ગયો એક શખ્સ!

• અમદાવાદમાં ફરી બાળક ત્યજવાની ઘટના
• તાજુ જન્મેલું મુકીને શખ્સ ફરાર 
• બાળકને સારવાર માટે લઇ જવાયું

અમદાવાદમાં ફરી ગાંધીનગર જેવી બાળક ત્યજવાની ઘટના સામે આવી છે. અમરાઇવાડીના મહાલક્ષ્મીનગર તાજુ જન્મેલુ નવજાત બાળક મુકીને શખ્સ ફરાર થઈ ગયો છે. એ પણ બપોરના તડકામાં. હજુ તો ગાંધીનગર શિવાંશને ત્યજવાનો કેસ માંડ શાંત પડયો છે. ત્યારે અમદાવાદની આ ઘટના અનેક સવાલ ઊભા કરે છે. બાળકનું અપહરણ કરી અહી લવાયું છે કે  બાળકને તરછોડનાર ખુદ તેના પિતા છે તે અંગે પોલીસ હાલ તપાસ કરી રહી છે. પણ સવાલ એક જ છે માસૂમનો શું વાંક?

આવી નિર્દયતા ક્યાંથી આવે છે ? 
અમદાવાદના મહાલક્ષ્મીનગરનો આ બનાવ હ્રદયને હચમચાવી મૂકે છે. એક શખ્સ તાજા જન્મેલા બાળકને બપોરના તડકામાં નિદર્યતાથી મૂકીને ચાલ્યો જાય. નક્કીએ આરોપી પાસે દિલ નથી, હજુ તો નવજાતની આંખ પણ ઊઘડી નથીને માતા-પિતાનો છાયો છીનવી લીધો છે. બાળકને ત્યજનાર શખ્સ કોણ છે તેની હજુ પણ ભાળ નથી મળી પણ જો તે આ બાળકનો પિતા હોય તો અનેક સવાલ ઊભા કરે છે કે તમારી મજા આ નવજાતને જિંદગી ભરની સજા આપી રહ્યું છે. કોઈ ગેર સંબંધો બાંધી પાપને છુપાવવા બાળકને તરછોડી દે છે તો કોઈ બાળકીને સાપનો ભારો સમજી, પણ કેમ? આ તાજા જન્મેલા માસૂમનો વાંક એટલો જ કે તેને આવા નિર્દય પિતાના ઘરે જન્મ લીધો? કેસ પર હાલ દરેક પાસા પર તપાસ ચાલી રહી છે. બાળકનું અપહરણ કરી અહી કોઈ તરછોડી ગયું છે કે અન્ય કોઈ કારણસર બાળકને અહી  મૂકી દેવાયું છે. હાલ અમરાઇવાડી પોલીસે ગુનો નોંધી સીસીટીવી ખાળવાના પ્રયાસ કરી રહી છે.

બાળકને સારવાર માટે હોસ્પિટલ લઇ જવાયું
તાજુ જન્મેલુ નવજાત બાળક મુકીને એક શખ્સ ફરાર થઈ ગયો હતો. જે બાદ સ્થાનિકોને બાળક દેખાઈ જતાં પોલીસને જાણ કરી હતી. પોલીસે ઘટનાસ્થળે પહોંચી અજાણ્યા શખ્સ સામે ગુનો નોંધી તપાસ હાથ ધરી છે. તો બાળકને સારવાર માટે હોસ્પિટલ લઇ જવામાં આવ્યું છે.  ઘટનાની જાણ આસપાસના સ્થાનિકોને થતાં લોકોના ટોળે ટોળા એકત્રિત થયા હતા.