એલર્ટ / દેશમાં હવે ખતરાની ઘંટડી વાગી, એક જ સપ્તાહમાં દેશમાં કોરોના સંક્રમણમાં 79% ટકાનો જંગી ઉછાળો, ડેટા ડિસ્ટર્બ કરી મૂકે તેવા

• દેશમાં એક જ સપ્તાહમાં જે 79 ટકાનો કેસમાં ઉછાળો
• સાથે સાથે પોઝિટિવિટી રેટમાં પણ વધારો થયો
• સાત મહિનામાં સૌથી વધુ કેસમાં ઉછાળો

દેશમાં કોરોના સંક્રમણ ખતરનાક ગતિએ પ્રસરી રહ્યું છે. રોજેરોજ કોરોના સંક્રમણની ઝપટમાં વધુને વધુ લોકો આવતા જાય છે. સૌથી ચિંતાજનક વાત એ છે કે હવે લોકો કોરોના સંક્રમણના કારણે જીવ ગુમાવી રહ્યા છે. દેશમાં છેલ્લા 24 કલાકમાં કોરોનાથી 15 સંક્રમિતોનાં મોત થતાં કુલ મૃત્યુઆંક વધીને 5,31,000 થયો છે.  દેશમાં છેલ્લા 24 કલાકમાં કોરોનાના 5,676 નવા કેસ સામે આવતાં અત્યાર સુધીમાં નોંધાયેલા કુલ કેસની સંખ્યા 4,47,68,172 થઈ છે. રાજ્યવાર મૃત્યુની યાદી જોઈએ તો કોરોનાના કારણે દિલ્હી, રાજસ્થાન અને પંજાબમાં ત્રણ-ત્રણ અને કર્ણાટકમાં બે, તામિલનાડુ, મહારાષ્ટ્ર, હરિયાણા અને ગુજરાતમાં એક-એક દર્દીઓનાં મોત થયાં છે.

 

દેશમાં છેલ્લા 24 કલાકમાં 3,761 લોકોએ કોરોનાને હરાવ્યો
કેન્દ્રીય આરોગ્ય મંત્રાલયના સત્તાવાર ડેટા અનુસાર, દેશમાં છેલ્લા 24 કલાકમાં 3,761 લોકોએ કોરોનાને હરાવ્યો છે અને આમ અત્યાર સુધીમાં કુલ 4,42,00,079 લોકો કોરોના સંક્રમણથી મુક્ત થયા છે. દેશમાં છેલ્લા 24 કલાકમાં કોરોના માટે 1,96,796 સેમ્પલનું ટેસ્ટિંગ કરવામાં આવ્યું હતું અને આ સાથે અત્યાર સુધીમાં કુલ 92,30,53,282 સેમ્પલનું ટેસ્ટિંગ થઈ ચૂક્યું છે. છેલ્લા 24 કલાકમાં કોરોના વેક્સિનના માત્ર 358 ડોઝ આપવામાં આવ્યા હતા અને આ સાથે અત્યાર સુધીમાં કુલ 2,20,66,23,885 ડોઝ અપાઈ ચૂક્યા છે. કોરોનાનો ડોઈલી પોઝિટિવિટી રેટ 2.88 ટકા છે, જ્યારે વીકલી પોઝિટિવિટી રેટ ઊછળીને 3.81 ટકા થયો છે. રિકવરી રેટ વધુ ઘટીને 98.73 ટકા થઈ ગયો છે.

હિમાચલ પ્રદેશમાં 1,762 એક્ટિવ કેસ
રાજ્યવાર એક્ટિવ કેસની વાત કરીએ તો, 13,745 એક્ટિવ કેસ સાથે કેરળ સૌથી ટોચ પર છે, જ્યારે 4,667 કેસ સાથે મહારાષ્ટ્ર બીજા ક્રમે છે. એ જ રીતે દિલ્હીમાં 2,338 તામિલનાડુમાં 2,099, ગુજરાતમાં 1,947, હરિયાણામાં 1,928, હિમાચલ પ્રદેશમાં 1,762, કર્ણાટકમાં 1,673, ઉત્તરપ્રદેશમાં 1,282, રાજસ્થાનમાં 804, ગોવામાં 780 એક્ટિવ કેસ નોંધાયા છે. દેશમાં આજે સતત બીજા દિવસે કોરોના સામેની તૈયારી અને સજ્જતાની સમીક્ષા કરવા મેગા મોક ડ્રિલ યોજાઈ રહી છે. આજે દિલ્હી સરકારની હોસ્પિટલોમાં મોક ડ્રિલ યોજાઈ હતી, જેનું નિરીક્ષણ દિલ્હીના આરોગ્ય પ્રધાન સૌરભ ભારદ્વાજે કર્યું હતું. રાજસ્થાનની સૌથી મોટી સરકારી હોસ્પિટલ સવાઈ માનસિંહ હોસ્પિટલમાં પણ મોક ડ્રિલ યોજાઈ હતી.