સ્પોર્ટ્સ / રોહિત-કોહલીના ભવિષ્ય પર કેપ્ટન શુભમન ગિલે તોડ્યું મૌન, World Cup 2027 માં રમવાને લઈને કર્યો ખુલાસો

ભારતીય ક્રિકેટ ટીમે વેસ્ટઇન્ડીઝ સામેની વનડે સિરીઝ 2-1 થી પોતાના નામે કરી લીધી છે. ભલે ભારતીય ટીમ શ્રેણીની આખરી મેચ જીતી શકી ન હતી, પરંતુ કેપ્ટન શુભમન ગિલની આગેવાની હેઠળ ટીમે શાનદાર પ્રદર્શન કર્યું હતું. આ શ્રેણીમાં વિરાટ કોહલી અને રોહિત શર્માના બેટમાંથી રનનો ખજાનો છલકાયો હતો. મેચ પૂર્ણ થયા બાદ પ્રેસ કોન્ફરન્સમાં કેપ્ટન શુભમન ગિલે રોહિત અને વિરાટની નિવૃત્તિ તેમજ 2027 ના વનડે વર્લ્ડ કપના પ્લાનિંગ અંગે મોટો ખુલાસો કર્યો હતો.

અદ્ભુત ફોર્મમાં છે વિરાટ-રોહિત: કેપ્ટન ગિલ

પ્રેસ કોન્ફરન્સ દરમિયાન શુભમન ગિલે સ્પષ્ટ શબ્દોમાં જણાવ્યું કે, રોહિત શર્મા અને વિરાટ કોહલી સતત મેચ વિનિંગ પ્રદર્શન કરી રહ્યા છે અને ટીમ જ્યારે પણ મુશ્કેલીમાં હોય ત્યારે મોટી ઇનિંગ્સ રમે છે. ગિલે ઉમેર્યું, "રોહિત ભાઈએ છેલ્લી 4 ઇનિંગ્સમાં કમાલની બેટિંગ કરી છે, જ્યારે વિરાટ ભાઈ પણ જબરદસ્ત ફોર્મમાં છે. આ સિવાય જ્યારે પણ કેએલ રાહુલને તક મળી છે તેણે પણ શ્રેષ્ઠ યોગદાન આપ્યું છે."

2027 વનડે વર્લ્ડ કપ અને 'પ્લેઇંગ 11' અંગે મોટું નિવેદન

જ્યારે ગિલને પૂછવામાં આવ્યું કે શું યુવા ખેલાડીઓને તક આપવા માટે આ સિનિયર કલાકારોને આરામ આપવામાં આવશે? ત્યારે સુકાની ગિલે રોકડું સંભળાવતા કહ્યું કે, "હવે ટીમમાં બહુ વધારે પ્રયોગો કરવાનો સમય રહ્યો નથી. વર્લ્ડ કપ પહેલા ટીમે પોતાની કાયમી પ્લેઇંગ 11 નક્કી કરવી પડશે જેથી તમામ ખેલાડીઓ એકસાથે રમીને સેટ થઈ શકે."

વધુ વાંચો : 9 વર્ષ બાદ ટેક્સ સિસ્ટમમાં મોટા ફેરફારની તૈયારી? 7 ઓક્ટોબરે લેવાશે નિર્ણય

ઉંમર માત્ર એક નંબર: રોહિત અને વિરાટનો દબદબો યથાવત

ભલે રોહિત શર્મા (39 વર્ષ) અને વિરાટ કોહલી (37 વર્ષ) ની ઉંમરને લઈને અવારનવાર ક્રિકેટ જગતમાં સવાલો ઉઠાવવામાં આવે છે, પરંતુ મેદાન પર તેમના બેટથી નીકળતા રન આલોચકોને જડબાતોડ જવાબ આપી રહ્યા છે. આ શ્રેણી દરમિયાન વિરાટ કોહલીએ પોતાની વનડે કરિયરની 55મી સદી ફટકારી હતી, જ્યારે રોહિતે પણ સતત રન બનાવીને સાબિત કર્યું કે ઉંમર માત્ર એક આંકડો છે.

શુભમન ગિલના આ સ્ટેટમેન્ટ બાદ હવે એ સ્પષ્ટ થઈ ગયું છે કે રોહિત શર્મા અને વિરાટ કોહલી નીલી જર્સીમાં પોતાનો જાદુ વિખેરતા રહેશે અને ચાહકોને તેઓ 2027 ના વર્લ્ડ કપમાં રમતા જોવા મળશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ