ગુજરાત / સુરતની ખાડીપૂરની સમસ્યા પર સવજી ધોળકિયાએ જણાવ્યું કારણ, અમરેલીના આ ગામનો દાખલો આપી શું કહ્યું?

સુરત શહેરમાં ચોમાસામાં વારંવાર સર્જાતી ખાડીપૂરની સમસ્યા અંગે પદ્મશ્રી વિજેતા અને ડાયમંડ કિંગ સવજી ધોળકિયાએ કહેલી વાત હાલ સોશિયલ મીડિયામાં વાયરલ છે. જેમાં તેમને સ્પષ્ટપણે કહ્યું કે, કુદરતી જળમાર્ગો પર અતિક્રમણ અને નદી-ખાડીઓની ભૌગોલિક સ્થિતિ બદલવાને કારણે જ શહેરમાં પાણી ભરાવાની આ સ્થિતિ સર્જાઈ રહી છે.

• નદી-ખાડીઓને નાની કરી નાખી છે!
  આ અંગે સવજીભાઈએ કહ્યું કે, પહેલાં નદીઓમાંથી પાણી મુક્તપણે દરિયામાં વહી જતું હતું. પરંતુ સમય જતાં આપણે નદીઓ અને ખાડીઓને નાની કરી નાખી, કેટલીકને તો પૂરી દાટી દીધી છે. બારડોલી તરફથી આવતું પાણી સુરત પહોંચે ત્યારે ખાડીઓની વહન ક્ષમતા ઘટી ગઈ હોવાથી પાણી શહેરના નીચાણવાળા વિસ્તારો અને ભોયરાઓમાં ઘૂસી જાય છે.
  

સવજીભાઈએ પોતે અમરેલીના દુધાળા ગામમાં કરેલા જળસંચય અને નદી સુધારણાના કાર્યનું ઉદાહરણ આપ્યું હતું. ત્યાં પણ અતિભારે વરસાદ પડ્યો હતો પરંતુ નદીને પહોળી અને ઊંડી કરીને પાણીને વહેવા માટે યોગ્ય માર્ગ આપવામાં આવ્યો હતો. પરિણામે ગામમાં ક્યાંય પાણી ભરાયું ન હતું.

તેમને કહ્યું કે, જે રાત્રે અતિભારે વરસાદ પડ્યો હતો તે રાત્રે 3 વાગ્યે નદીમાં પૂર આવ્યું અને સવારે 6 વાગ્યા સુધીમાં બધું પાણી સરળતાથી વહી ગયું હતું. જો નદી ઊંડી અને પહોળી ન કરી હોત તો લોકોને મોટું નુકસાન થાત અને લોકોના ઢોર-ઢાંખર પણ તાણાઈ ગયા હોત.

વધુ વાંચો : ''મારા નામે કોઇ ચેનલ નથી...'', સોશિ. મીડિયામાં ફેક વીડિયોથી અંબાલાલ લાલઘૂમ

સવજી ધોળકિયાએ કહ્યું કે, સુરતમાં પણ જો ખાડીઓ અને જળમાર્ગોને સાફ કરી, ઊંડા અને પહોળા કરવામાં આવે તો જ આ ખાડીપૂરની કાયમી સમસ્યામાંથી મુક્તિ મળી શકે એમ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ