અજબ ગજબ / VIDEO: એક એવું વૃક્ષ જેની સારસંભાળ માટે વર્ષે લાખો રૂપિયા ખર્ચે છે સરકાર

હવે આપણાં ભારતમાં ઘણા વૃક્ષોની પણ પૂજા કરવામાં આવે છે એ તો આપણે બધા જાણીએ જ છીએ પણ મધ્યપ્રદેશમાં એક એવું વૃક્ષ આવેલું છે જેનું ધાર્મિક રીતે તો મહત્વ છે જ પણ આ વૃક્ષને આપણાં દેશના VVIPને અપાતી Z+ સિક્યોરીટી પણ આપવામાં આવે છે. આ પીપળાના વૃક્ષને બોધિ વૃક્ષ કહેવામાં આવે છે જે મધ્યપ્રદેશમાં ભોપાલ અને વિદિશા વચ્ચે સલામતપુરની પહાડીઓ પર આવેલું છે. જો કે આ વૃક્ષનું મૂળ બિહારમાં છે. વર્ષ 2012માં શ્રીલંકાના વડાપ્રધાન મહિન્દા રાજપક્ષે ભારતની મુલાકાતે આવ્યા હતા, ત્યારે એમને આ વૃક્ષ અહીં રોપ્યું હતું. પણ પ્રશ્ન એ થાય કે આ વૃક્ષને આટલી સિક્યોરીટી કેમ અપાય છે..?

તો બોધગયામાં જે વૃક્ષ નીચે બેસીને ગૌતમ બુદ્ધે તપશ્ચર્યા કરી હતી આ વૃક્ષ તેનો જ અંશ છે અને મધ્યપ્રદેશ સરકાર દર વર્ષે તેની સુરક્ષા અને સારસંભાળ પર લગભગ 12 થી 15 લાખ રૂપિયા ખર્ચે છે. આ વૃક્ષ એક ટેકરી પર 15 ફૂટ ઊંચી લોખંડની જાળીથી સુરક્ષિત કરવામાં આવ્યું છે. આ VVIP બોધિ વૃક્ષની દેખરેખ ખુદ કલેકટરની દેખરેખ હેઠળ થાય છે અને ટેન્કર વડે વૃક્ષોને પાણી આપવામાં આવે છે. જો આ ઝાડનું એક પાંદડું પણ સુકાઈ જાય સરકાર ચિંતિત થઈ જાય છે અને દેશ-વિદેશથી પ્રવાસીઓ તેની મુલાકાત લેવા આવે છે.

ઈતિહાસ અનુસાર ગૌતમ બુદ્ધે પીપળાના વૃક્ષ નીચે બેસીને તપસ્યા કરી હતી, ત્યારબાદ તેમને જ્ઞાન પ્રાપ્ત થયું હતું અને પછીથી આ વૃક્ષને બોધિ વૃક્ષ કહેવામાં આવ્યું હતું. જો કે, જે મૂળ બોધિ વૃક્ષ છે તે બિહારના ગયા જિલ્લામાં અને આ વૃક્ષને નષ્ટ કરવાના ઘણા પ્રયાસો થયા છે પરંતુ દર વખતે ત્યાં એક નવું વૃક્ષ ઉગે છે. 1857માં કુદરતી આપત્તિના કારણે આ વૃક્ષ સંપૂર્ણપણે નાશ પામ્યું હતું ત્યારબાદ 1880 માં, બ્રિટિશ અધિકારી લોર્ડ કનિંનઘમ શ્રીલંકાના અનુરાધાપુરમથી બોધિ વૃક્ષની એક શાખા લાવ્યા અને તેને બોધગયામાં ફરીથી લગાવ્યું હતું.

વધુ વાંચો: VIDEO: આ હિલ સ્ટેશન પર ગાડી લઈને જશો, તો એન્ટ્રી જ નહીં મળે

રિપોર્ટ્સ અનુસાર ત્રીજી સદીમાં સમ્રાટ અશોકે તેમના પુત્ર મહેન્દ્ર અને પુત્રી સંઘમિત્રાને બોધિ વૃક્ષની એક શાખા આપીને બૌદ્ધ ધર્મ ફેલાવવા માટે શ્રીલંકા મોકલ્યા હતા અને એમને જ શ્રીલંકાના અનુરાધાપુરામાં બોધિ વૃક્ષનું વાવેતર કર્યું હતું, આ વૃક્ષ આજે પણ ત્યાં છે.