- વાસ્તુશાસ્ત્ર મુજબ અરીસો, તૂટેલા વાસણો, સાવરણીનો રસોડામાંથી કરો નિકાલ
- કલેશ, બીમારી તથા આર્થિક તંગી જેવી સમસ્યાઓ ઊંચકે છે માથું
- વાસ્તુશાસ્ત્રના નિયમનું પાલન ખાસ કરવું જોઈએ
ઘરમાં વાસ્તુદોષ હોય તો માણસ ગમે તેટલી મહેનત કરે છતાં પણ સફળતા મળતી નથી. કમાણી હોવા છતાં પણ પૈસા બિલકુલ ટકતા નથી. જેને લઇને પરિવારજનોને આર્થિક તંગીનો સામનો કરવાની નોબત આવતી હોય છે. ત્યારે વાસ્તુશાસ્ત્રમાં ઘર અને રસોડાને ખૂબ વધારે મહત્વ આપવામાં આવ્યું છે અને માણસે ઘરમાં વાસ્તુશાસ્ત્રના નિયમનું પાલન ખાસ કરવું જોઈએ. જો આમ કરવામાં ન આવે તો માણસની જિંદગીમાં અનેક પ્રકારની મુશ્કેલીઓ આવતી હોય છે.આવી સ્થિતિ વચ્ચે ઘર અને રસોડામાં અમુક એવી વસ્તુ હોય છે. જેનો સમયાંતરે નિકાલ કરવો જોઈએ નહિ તો વાસ્તુદોષ લાગી શકે છે.
ઝાડુને ભૂલથી પણ રસોડાની અંદર ન રાખવું
આમ તો સાવરણીને મા લક્ષ્મીના પ્રતિક તરીકે ઓળખવામાં આવે છે. પરંતુ ઝાડુને ભૂલથી પણ રસોડાની અંદર ન રાખવું જોઈએ. જો સાવરણીને રસોડામાં રાખવામાં આવે તો તેને અશુભ માનવામાં આવે છે અને જેના પરિણામે વાસ્તુદોષ લાગી શકે છે. ઝાડુને રસોડામાં રાખવાથી પરિવારજનોનું આરોગ્ય બગડવાનું જોખમ જોવા મળે છે અને મા અનપૂર્ણા નારાજ થઈ જતા હોય છે.
તૂટેલા વાસણનો ઉપયોગ ટાળો
ઘણી વખત વાસણ તૂટી જવા છતાં પણ લોકો આવા વાસણનો ઉપયોગ કરતા હોય છે અને તેને રસોડામાં રાખતા હોય છે. પરંતુ વાસ્તુશાસ્ત્રમા આમ કરવાને અશુભ માનવામાં આવે છે અને રસોડામાં તૂટેલા વાસણ રાખવા પર મનાઈ કરાઈ છે. આવું કરવાથી માં અન્નપૂર્ણા નારાજ થાય છે પરિણામે ઘરમાં ધન ધાન્યની સમસ્યા ઊભી થાય છે.
દવા, અરીસો રસોડાથી દૂર રાખો
રસોડામાં અરીસો લગાવવાથી નકારાત્મક શક્તિઓને ઉર્જા મળે છે. વાસ્તુશાસ્ત્રમાં જણાવ્યા અનુસાર રસોઈઘરમાં અરીસો લગાવવાથી આગનું પ્રતિબિંબ ઊભું થાય છે અને જરૂરથી વધારે ઉર્જા પેદા થાય છે. જે નુકસાનકારક નીવડી શકે છે. તેવી જ રીતે રસોડામાં દવા પણ ન રાખવી જોઈએ આવું કરવાથી ઘરમાં નકારાત્મક ઊર્જાનો સંચાર થાય છે અને કલેશ, બીમારી તથા આર્થિક તંગી જેવી સમસ્યાઓ માથું ઊંચકે છે. ઘરમાં જો ના છુટકે દવાનો ઉપયોગ થતો હોય તો તેને રસોડાથી દૂર રાખવી જોઈએ.
