ભારે હાલાકી / વલસાડમાં NH-48ની ખખડધજ હાલત, ખાડાઓથી વાહનચાલકો પરેશાન

રાજ્યમાં ચોમાસાની સિઝન દરમિયાન અનેક રસ્તાઓની હાલત કથળી છે ત્યારે વલસાડ જિલ્લામાંથી પસાર થતો નેશનલ હાઈવે-48 પણ ખાડાઓના કારણે બિસ્માર બન્યો છે. છેલ્લા બે અઠવાડિયાથી વરસાદે વિરામ લીધો હોવા છતાં હાઈવે પર અનેક સ્થળોએ મોટા ખાડાઓ યથાવત જોવા મળી રહ્યા છે.

કામગીરીને લઈને પણ અનેક સવાલો

વલસાડના સોનવાડા ગામ નજીક નેશનલ હાઈવે-48 પર ખાડાઓ પુરવા માટે નેશનલ હાઈવે ઓથોરિટી દ્વારા પેચવર્ક હાથ ધરવામાં આવ્યું છે. જોકે, આ કામગીરીને લઈને પણ અનેક સવાલો ઉઠી રહ્યા છે. પેચવર્કના કારણે હાઈવે પર ટ્રાફિકની સમસ્યા સર્જાઈ રહી છે અને લાંબા ટ્રાફિક જામમાં વાહનચાલકો અટવાઈ રહ્યા છે.

વાહનોને નુકસાન થવાની ફરિયાદો સામે આવી

હાઈવે પર અનેક સ્થળોએ મોટા ખાડાઓ પડેલા હોવાથી વાહનોને નુકસાન થવાની ફરિયાદો સામે આવી રહી છે. ચોમાસા દરમિયાન ખાડાઓમાં પાણી ભરાઈ જતાં નાના વાહનોના ચાલકોને ખાડાઓનો અંદાજ ન રહેતા અકસ્માતનું જોખમ પણ વધી જાય છે. બીજી તરફ, પેચવર્ક દરમિયાન હાઈવે પર ધૂળની ડમરીઓ ઊડતી હોવાથી વાહનચાલકોને વધુ મુશ્કેલીનો સામનો કરવો પડી રહ્યો છે.

ખાડાઓનું તાત્કાલિક અને ગુણવત્તાયુક્ત સમારકામ કરવામાં આવે તેવી માંગ

વાહનચાલકોનું કહેવું છે કે નેશનલ હાઈવે માટે મોટો ટોલ વસૂલવામાં આવે છે, ત્યારે રસ્તાની જાળવણી અને સુરક્ષાની જવાબદારી પણ તેટલી જ મહત્વની છે. હાઈવે પર પડેલા ખાડાઓનું તાત્કાલિક અને ગુણવત્તાયુક્ત સમારકામ કરવામાં આવે તથા પેચવર્કની કામગીરી યોગ્ય રીતે કરવામાં આવે તેવી વાહનચાલકો દ્વારા માંગ કરવામાં આવી છે.

આ પણ વાંચોઃ નવસારીમાં પિતાએ પુત્રના પેટમાં ચપ્પુ હુલાવી દીધું, સારુ કરવા છતાંય મોત, જાણો કારણ?

હવે નેશનલ હાઈવે ઓથોરિટી દ્વારા હાઈવેની બિસ્માર હાલત અંગે ક્યારે ગંભીરતાથી પગલાં લેવામાં આવે છે અને ખાડાઓનું કાયમી સમારકામ ક્યારે થાય છે તેના પર સૌની નજર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ