ખુવારી / વલસાડમાં સેંકડો કાર પૂરના પાણીમાં ડૂબી, 7,000થી વધુ કારને નુકસાન, કંપનીઓ પર વીમાનું 'ઘોડાપુર'

વલસાડ જિલ્લામાં તાજેતરમાં આવેલા વિનાશક પૂરે માનવજીવનની સાથે વાહનોને પણ ભારે નુકસાન પહોંચાડ્યું છે. ખાસ કરીને વાપી શહેર અને આસપાસના વિસ્તારોમાં પૂરનાં પાણીમાં મોટી સંખ્યામાં કાર ડૂબી ગઈ હતી, જ્યારે અનેક વાહનો પાણીના ધસમસતા પ્રવાહમાં તણાઈ ગયા હતા. પ્રાથમિક અંદાજ મુજબ સમગ્ર વલસાડ જિલ્લામાં 7 હજારથી વધુ ફોર-વ્હીલર વાહનોને નુકસાન થયું છે.

એકસાથે હજારો વાહનોના ઇન્સ્યોરન્સ ક્લેમ

પૂરનું પાણી ઓસરી ગયું છે, પરંતુ હવે કાર માલિકો સામે નવી મુશ્કેલી ઊભી થઈ છે. એકસાથે હજારો વાહનોના ઇન્સ્યોરન્સ ક્લેમ આવતાં વીમા કંપનીઓ સામે ક્લેમ સેટલમેન્ટનો મોટો પડકાર ઊભો થયો છે. જાણકારોના મતે આશરે 250થી 300 કરોડ રૂપિયાના ઇન્સ્યોરન્સ ક્લેમ આવવાની શક્યતા છે.

અમદાવાદમાં પણ વાહનોને નુકસાન

દક્ષિણ ગુજરાતની સાથે અમદાવાદ સહિત અન્ય વિસ્તારોમાં પણ પૂરના કારણે મોટી સંખ્યામાં વાહનોને નુકસાન થયું છે.પરિણામે જરૂરી સ્પેરપાર્ટ્સ મેળવવામાં પણ સમય લાગી રહ્યો છે. જેના કારણે એક તરફ વર્કશોપમાં કારનો ખડકલો છે, તો બીજી તરફ માલિકો પોતાની કારની ડિલિવરીની રાહ જોઈ રહ્યા છે.સામાન્ય સ્થિતિમાં જે કાર એક અઠવાડિયામાં રિપેર થઈ જતી હોય છે, તે જ કાર હવે પૂર બાદની આ અસામાન્ય પરિસ્થિતિમાં લાંબો સમય લઈ રહી છે. કેટલાક વાહનોમાં તો ઇલેક્ટ્રોનિક્સ સિસ્ટમ અને અન્ય પાર્ટ્સ બદલવાની જરૂરિયાત ઊભી થઈ છે.

વધુ વાંચો : બ્રેઝા કાર-9 મોબાઈલ સહિત બે લાખનો મુદ્દામાલ જપ્ત, જૂનાગઢના મેંદરડામાં દારૂની મહેફીલ ઝડપાઈ

ઘણી કાર તો ભંગાર જેવી હાલતમાં

વલસાડ જિલ્લામાં 7 હજારથી વધુ કારોને પૂરનાં પાણીથી ભારે નુકસાન થયું છે. આ માત્ર વાહનોને થયેલું નુકસાન નથી, પરંતુ તેની સાથે હજારો પરિવારોની રોજિંદી વ્યવસ્થા પણ ખોરવાઈ છે.કેટલાક વાહનો ટોટલ લોસમાં જવાની શક્યતા છે, જ્યારે કેટલાક વાહનો રિપેર થઈ શકે તેવી સ્થિતિમાં છે. પરંતુ બંને કિસ્સામાં કાર માલિકો માટે રાહ જોવાનો સમય લાંબો બની રહ્યો છે.એક તરફ વીમા કંપનીઓ સામે કરોડો રૂપિયાના ક્લેમના સેટલમેન્ટનો પડકાર છે, તો બીજી તરફ ગેરેજ અને વર્કશોપ સામે હજારો કારના રિપેરિંગનો પડકાર છે.આમ વાપી અને સમગ્ર વલસાડ જિલ્લામાં પૂરનું પાણી ઓસરી ગયું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ