કોરોના કાળ / કોરોના મહામારીમાં ગુજરાતના આ શહેરે 10 દિવસનું સંપૂર્ણ લોકડાઉન કર્યું જાહેર

• વલસાડ જિલ્લામાં 20 એપ્રિલથી 10 દિવસનું સંપૂર્ણ લૉકડાઉન
• વલસાડમાં 20 એપ્રિલથી 10 દિવસનું સંપૂર્ણ લોકડાઉન જાહેર
• સાબરકાંઠાના પ્રાંતિજમાં સ્વયંભૂ બજારો બંધ 

મહારાષ્ટ્રને અડીને આવેલા વલસાડ જિલ્લામાં પણ કોરોના રોકેટ ગતિએ આગળ વધી રહ્યો છે, આ વખતે વકરેલા કોરોના મૃત્યુઆંકનું પ્રમાણ પણ અતિશય હોવાના કારણે તંત્રની ચિંતામાં મોટાપાયે વધારો થયો છે. કોરોનાની ચેન તોડવા માટે લૉકડાઉન ખૂબ જરૂરી છે. તેને ધ્યાનમાં રાખીને વલસાડ જિલ્લામાં 20 એપ્રિલથી 10 દિવસનું સંપૂર્ણ લોકડાઉન જાહેર કરવામાં આવ્યું છે. વલસાડના કલેકટર આર.આર રાવલની અધ્યક્ષતામાં બેઠક મળી હતી. જેમાં  વલસાડ જિલ્લાના વેપારી મંડળ, ધારાસભ્ય અને અન્ય બુદ્ધિ જીવો હાજર રહ્યા હતા.

આ બેઠકમાં કોરોનાની ચેન તોડવા માટે લૉકડાઉન ખૂબ જરૂરી હોવાનું તારણ બહાર આવ્યું છે. જોકે કેટલીક આવશ્યક ચીજવસ્તુઓ માટે દુકાનો ખુલ્લી રહેશે. બાકી તમામ પ્રકારના ધંધા અને બજારો બંધ રહેશે. જેથી આગામી સમયમાં કોરોનાની ચેન તૂટે અને વલસાડ જિલ્લો કોરોના મુક્ત થાય તેવો પ્રયાસ તમામ લોકોએ સાથે મળીને કર્યો છે.

સાબરકાંઠાના પ્રાંતિજમાં સ્વયંભૂ બજારો બંધ 

સાબરકાંઠા જિલ્લામાં કોરોનાના કેસોમાં સતત વધારો થઈ રહ્યો છે. વધતા કેસોને લઈને પ્રાંતિજમાં વેપારી એસોસિએશન દ્વારા સ્વયંભૂ બંધ રાખવાનો નિર્ણય લેવામાં આવ્યો છે. પ્રાંતિજમાં સવારના 8થી બપોરના 3 વાગ્યા સુધી જ દુકાનો ખોલવાની છૂટ આપવામાં આવી છે. પ્રાંતિજમાં લારી-ગલ્લાઓ સહિતના મોટાભાગના વેપારીઓ બંધમાં જોડાયા હતા. ઉલ્લેખનીય છે કે 30મી એપ્રિલ સુધી સ્વૈચ્છિક બંધ પાળવામાં આવશે.

ધાનેરાના બોર્ડર પર આવેલા નેનાવા ગામ દ્વારા સ્વૈચ્છિક લોકડાઉન

બનાસકાંઠામાં કોરોનાના કેસોમાં વધારો થઈ રહ્યો છે. ત્યારે ધાનેરા તાલુકાના બોર્ડર પર આવેલ નેનાવા ગામ દ્વારા સ્વૈચ્છિક લોકડાઉન કરવાનો નિર્ણય લેવામાં આવ્યો છે. 10 દિવસ સુધી ગામમાં લોકડાઉનનો નિર્ણય ગામના આગેવાનો તથા તંત્ર દ્વારા લેવામાં આવ્યો છે. લોકડાઉન દરમિયાન સવારે 7થી 11 વાગ્યા દરમિયાન જીવન જરૂરિયાતની ચીજવસ્તુઓની દુકાનો ખુલ્લી રાખી શકાશે. ઉલ્લેખનિય છે કે જિલ્લામાં અત્યારે 1100થી વધારે એક્ટિવ કેસો છે.