વડોદરા / માની આરાધનાના નામે ઠગાઈ કરતા ગરબા આયોજક! વડોદરામાં કર્યો શરતનો ઉલાળીયો, જાણો સમગ્ર મામલો

• વડોદરામાં નવરાત્રી પર્વમાં તગડી કમાણીનો ખેલ
• માની આરાધનાના નામે ઠગાઈ કરતા આયોજક
• મહિલાઓ ફ્રી પ્રવેશની શરત ભૂલાઈ

દેશભરમાં નવરાત્રીને લઈ તૈયારીઓ પુરજોશમાં ચાલી રહી છે. ગરબાએ પરંપરાગત નૃત્યનો પ્રકાર છે. જેના માટે ગુજરાત વિશ્વભરમાં જાણીતું છે. ત્યારે હવે જેમ જેમ નવરાત્રી નજીક આવી રહી છે. તેમ તેમ ગુજરાતમાં ગરબા પ્રેમીઓએ પૂરજોશમાં તૈયારીઓ આરંભી દીધી છે. પરંતુ આ બધાની વચ્ચે કેટલાક ઠગાઈ કરતા ગરબા આયોજકો પણ ધ્યાને આવ્યા છે. જેમાં વડોદરામાં નવરાત્રી પર્વમાં તગડી કમાણીનો ખેલ સામે આવ્યો છે.

મહિલાઓને ફ્રી પ્રવેશની શરત ભૂલાઈ
માની આરાધનાના નામે વડોદરામાં કેટલાક ગરબા આયોજકો મનમાની કરી રહ્યા છે. મહાપાલિકા પાસેથી ટોકન ભાડા પેટે મેદાન મેળવવામાં આવે છે. ટોકન ભાડા પેટે મેદાન લે ત્યારે મહિલાઓને ફ્રી પ્રવેશની શરત હોય છે. પરંતુ ઘણાં ગરબા આયોજકોએ આ શરતનો ઉલાળીયો કરી નાંખ્યો છે. કોર્પોરેશન પાસેથી ટોકન ભાડાથી મેદાન લઈ મહિલાઓને ફ્રી એન્ટ્રી ન આપી છેતરપિંડીનો કારસો કરે છે.

મેદાનમાં મહિલાઓને નહીં મળે ફ્રી એન્ટ્રી
અત્રે જણાવીએ કે, મહાપાલિકાએ વડોદરામાં 31 જગ્યાએ ટોકન ભાડાથી મેદાન આપ્યા છે. જે તે સમયે મહિલાઓને ટોકન ભાડેથી લીધેલા મેદાનમાં ફ્રી પ્રવેશ મળતો હતો. હવે ટોકન ભાડાથી લીધેલા મેદાન કમાણી માટે મોકળા મેદાન હોય તેવો ઘાટ સર્જાયો છે. મેદાનમાં મહિલાઓને ફ્રી એન્ટ્રી નહીં અને સ્ટોલ માટે પણ તગડુ ભાડુ લેવામાં આવી રહ્યું છે. કોર્પોરેશન આ બાબતે યોગ્ય કાર્યવાહીની વાત કરી રહ્યું છે, પરંતુ નવરાત્રી સમયે મહિલાઓને ફ્રી પ્રવેશ મળશે કે કેમ તે મહત્વનો સવાલ છે.