વિશ્વ / TCS-Infosys સહિતની 8 કંપનીઓના ગ્રીન કાર્ડ પ્રોસેસ પર અમેરિકાની રોક, ભારતીય કર્મચારીઓને શું અસર થશે ?

અમેરિકામાં નોકરી કરતા ભારતીય IT પ્રોફેશનલ્સ માટે ગ્રીન કાર્ડ મેળવવાનો માર્ગ મુશ્કેલ બની શકે છે. અમેરિકાના રાષ્ટ્રપતિ ડોનાલ્ડ ટ્રમ્પના વહીવટીતંત્રે આઠ મોટી IT કંપનીઓને પરમેનન્ટ લેબર સર્ટિફિકેશન પ્રોગ્રામ (PERM)માંથી સસ્પેન્ડ કરી છે. આ કંપનીઓમાં કોગ્નિઝન્ટ, ઇન્ફોસિસ, ટાટા કન્સલ્ટન્સી સર્વિસીસ (TCS), વિપ્રો, HCL, કેપજેમિની, માઇક્રોસોફ્ટ અને એડોબનો સમાવેશ થાય છે. આ કાર્યવાહીથી સંબંધિત કંપનીઓની નવી અને પેન્ડિંગ PERM અરજીઓની પ્રક્રિયા અટકી શકે છે.

PERM પ્રોગ્રામ શું છે?

PERM અમેરિકામાં વિદેશી કર્મચારી માટે રોજગાર આધારિત ગ્રીન કાર્ડ મેળવવાની પ્રક્રિયાનો મહત્ત્વપૂર્ણ ભાગ છે. આ પ્રક્રિયામાં કંપનીએ સાબિત કરવું પડે છે કે સંબંધિત નોકરી માટે લાયક અમેરિકન કર્મચારી ઉપલબ્ધ નથી. શ્રમ વિભાગની મંજૂરી બાદ કંપની ગ્રીન કાર્ડની આગળની પ્રક્રિયા કરી શકે છે. જોકે, PERM મંજૂર થવાથી ગ્રીન કાર્ડ તરત મળતું નથી.

H-1B વિઝા પર શું અસર થશે?

આ નિર્ણયનો અર્થ એ નથી કે આ કંપનીઓમાં કામ કરતા તમામ ભારતીય કર્મચારીઓના H-1B વિઝા રદ થઈ ગયા છે. H-1B વિઝા અસ્થાયી નોકરી માટે છે, જ્યારે PERM કાયમી નિવાસની પ્રક્રિયા સાથે જોડાયેલો છે. તેથી હાલની કાર્યવાહી મુખ્યત્વે ગ્રીન કાર્ડની પ્રક્રિયાને અસર કરી શકે છે.

આ પણ વાંચો : ફ્લાયદુબઈના ભારતીય પાઇલટ સ્મિત મચ્છરને ઇઝરાયલ આપશે વીરતા પુરસ્કાર

માઇક્રોસોફ્ટ સામે શું આરોપ છે?

અમેરિકાના ઉપરાષ્ટ્રપતિ જે.ડી. વાન્સે આરોપ લગાવ્યો હતો કે કેટલીક કંપનીઓ અમેરિકન કર્મચારીઓને બદલે વિદેશી કર્મચારીઓને નોકરી આપે છે. તેમણે દાવો કર્યો હતો કે માઇક્રોસોફ્ટે 2025માં આશરે 6,000 અમેરિકન કર્મચારીઓને છૂટા કર્યા હતા. જોકે, માઇક્રોસોફ્ટે જણાવ્યું હતું કે તેની આશરે 80 ટકા H-1B અરજીઓ હાલના કર્મચારીઓના વિઝા સ્ટેટસમાં ફેરફાર માટે હતી. આ નિર્ણયથી ભારતીય કર્મચારીઓની ગ્રીન કાર્ડ પ્રક્રિયામાં વિલંબ થઈ શકે છે, પરંતુ તમામ કર્મચારીઓની નોકરી જતી રહેશે એવું નથી. કર્મચારીઓએ પોતાની અરજી અને વિઝાની સ્થિતિ અંગે કંપનીના ઇમિગ્રેશન વિભાગ અથવા નિષ્ણાત વકીલની સલાહ લેવી જોઈએ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ