વિશ્વ / ઈરાનમાં ફરી ગૂંજ્યા વિસ્ફોટ, અમેરિકાની કાર્યવાહીથી મધ્ય પૂર્વમાં તણાવ વધ્યો

અમેરિકા છેલ્લા કેટલાક દિવસોથી ઈરાનના વિવિધ વિસ્તારોમાં સૈન્ય કાર્યવાહી કરી રહ્યું હોવાના અહેવાલો સામે આવી રહ્યા છે. ઈરાનની કેટલીક મીડિયા સંસ્થાઓએ બંદર અબ્બાસ, બુશહેર અને કોનારક સહિતના વિસ્તારોમાં ધડાકા થયાનો દાવો કર્યો છે. જોકે કેટલાક અહેવાલો અંગે ઈરાનની સરકારી એજન્સીએ સ્પષ્ટતા પણ કરી છે. આ દરમિયાન અમેરિકાના રાષ્ટ્રપતિ ડોનાલ્ડ ટ્રમ્પ અને ઇઝરાયલના વડાપ્રધાન બેન્જામિન નેતન્યાહૂ વચ્ચે પણ મહત્વપૂર્ણ ચર્ચા થઈ છે.

અનેક શહેરોમાં વિસ્ફોટના અહેવાલ

ઈરાનની સમાચાર એજન્સી મેહરના અહેવાલ મુજબ દક્ષિણ ઈરાનના બંદર અબ્બાસ, બુશહેર, ચોગાદક અને કોનારક સહિતના વિસ્તારોમાં અનેક વિસ્ફોટોના અવાજો સાંભળવામાં આવ્યા હતા. કેટલાક વિસ્તારોમાં એકથી વધુ ધડાકા થયાની માહિતી પણ સામે આવી છે.

નૌસૈનિક ઠેકાણું નિશાને હોવાનો દાવો

અહેવાલો અનુસાર કોનારક વિસ્તારમાં ઈરાની નૌસેનાના એક મહત્વના ઠેકાણા નજીક હુમલો થયો હોવાની માહિતી મળી છે. સ્થાનિક અધિકારીઓના હવાલાથી આ દાવો કરવામાં આવ્યો છે. જોકે આ અંગે સત્તાવાર અને સંપૂર્ણ માહિતી હજુ સુધી બહાર આવી નથી.

ઈરાનની સરકારી એજન્સીનું નિવેદન

ઈરાનની સરકારી સમાચાર એજન્સી IRNAએ બંદર અબ્બાસમાં થયેલા ધડાકાના કેટલાક અહેવાલોને નકારી કાઢ્યા છે. એજન્સીના જણાવ્યા મુજબ બુશહેરની બહાર આવેલા સૈન્ય વિસ્તારમાં હુમલાનો પ્રયાસ થયો હતો, જ્યારે શહેરમાં સંભળાયેલા કેટલાક અવાજો એર ડિફેન્સ સિસ્ટમની કાર્યવાહી કારણે પણ હોઈ શકે છે.

ટ્રમ્પ અને નેતન્યાહૂ વચ્ચે ચર્ચા

ઈરાનમાં ચાલી રહેલી પરિસ્થિતિ વચ્ચે અમેરિકાના રાષ્ટ્રપતિ ડોનાલ્ડ ટ્રમ્પ અને ઇઝરાયલના વડાપ્રધાન બેન્જામિન નેતન્યાહૂ વચ્ચે ફોન પર વાતચીત થઈ હતી. બંને નેતાઓએ સુરક્ષા અને પ્રાદેશિક સ્થિતિ અંગે ચર્ચા કરી હોવાનું જણાવાયું છે. બંને દેશો વચ્ચે સંકલન જાળવી રાખવા પર પણ સહમતિ થઈ હોવાનું કહેવામાં આવે છે.

હોર્મુઝ હુમલા બાદ વધી કાર્યવાહી

હોર્મુઝ જળમાર્ગમાં વ્યાવસાયિક જહાજો પર થયેલા હુમલાઓ બાદ અમેરિકા વધુ આક્રમક વલણ અપનાવી રહ્યું છે. અગાઉ પણ અમેરિકા દ્વારા ઈરાનના કેટલાક વિસ્તારોમાં કાર્યવાહી કરવામાં આવી હતી. હાલની સ્થિતિને કારણે સમગ્ર મધ્ય પૂર્વમાં સુરક્ષા અને સ્થિરતા અંગે ચિંતા વધી છે.

આ પણ વાંચોઃ ટ્રમ્પની હત્યાનું નવું કાવતરું? ઇઝરાયલે ઇરાનના 'કિલિંગ પ્લાન' પર અમેરિકાને ચેતવ્યું

તણાવપૂર્ણ સ્થિતિ પર વિશ્વની નજર

અમેરિકા અને ઈરાન વચ્ચે વધતા તણાવને લઈને આંતરરાષ્ટ્રીય સમુદાય પણ પરિસ્થિતિ પર નજર રાખી રહ્યો છે. જો બંને દેશો વચ્ચે સંઘર્ષ વધુ વધશે તો તેની અસર વૈશ્વિક તેલ બજાર અને પ્રાદેશિક સુરક્ષા પર પણ પડી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ