ખુલાસો / તથ્ય પટેલ રજિસ્ટ્રેશન વગર જેગુઆર લઈને 48 દિવસ રખડ્યો; એક મંદિરમાં એક્સિડેન્ટ પણ કર્યો, ટ્રાફિક પોલીસનું હવે પગલાં લેવાનું રટણ

• તથ્ય પટેલનો વધુ એક કાંડ
• રજિસ્ટ્રેશન વિના ફેરવતો હતો કાર
• VTV NEWSએ દર્શાવ્યો હતો રિપોર્ટ

ઇસ્કોન બ્રિજ પર 141 કિમી પ્રતિકલાકની ઝડપે જેગુઆર ચલાવી 9 લોકોને ઉડાવી દેનાર તથ્ય પટેલનો વધુ એક કાંડ સામે આવ્યો છે. આરોપી તથ્ય પટેલ 48 દિવસ સુધી રજિસ્ટ્રેશન વગરની જ જેગુઆર કાર લઈને ફેરતો હોવાનું સામે આવ્યું છે. એટલે કે 16મી ડિસેમ્બરે જેગુઆર ગાડી ખરીદીને 3 ફેબ્રુઆરીએ ગાડીનું રજિસ્ટ્રેશન કરાવવામાં આવ્યું હતું. એટલું જ નહીં રજિસ્ટ્રેશન પહેલા જ આરોપીએ જેગુઆર ગાડીથી અકસ્માત પણ સર્જ્યો હતો.

VTV NEWSએ ટ્રાફિક પોલીસના વડાને પૂછ્યો સવાલ
રજિસ્ટ્રેશન મોડું થવા અંગે VTV NEWSએ રિપોર્ટ દર્શાવ્યો હતો. આ મામલે VTV NEWSએ અમદાવાદ ટ્રાફિક પોલીસ વડાને સવાલ પૂછ્યો હતો. VTV NEWSએ પછ્યું હતું કે, 48 દિવસ સુધી ગાડીનું રજિસ્ટ્રેશન નહીં કરવનારા તથ્ય સામે પોલીસ શું પગલા લેશે? VTV NEWSના સવાલના જવાબમાં JCPએ ગાડીના રજિસ્ટ્રેશનને રદ કરવાની ખાતરી આપી છે. 9 લોકોના જીવ ગયા બાદ ટ્રાફિક પોલીસ વડાને બ્રહ્મજ્ઞાન થયું છે. જે ગાડીથી 9 લોકોના જીવ ગયા એ ગાડીનું રજિસ્ટ્રેશન રદ કરવા પોલીસ રટણ કરી રહી છે. 

તથ્યને જેગુઆર કાર મળી હતી ગિફ્ટમાં
તો તથ્યએ જે કારથી અકસ્માત સર્જ્યો હતો તે જેગુઆર કારને લઈને પણ મોટો ખુલાસો થયો છે. ઈસ્કોન બ્રિજ અકસ્માતના આરોપી તથ્ય પટેલને જેગુઆર કાર ગિફ્ટમાં મળી હતી. પિતા પ્રજ્ઞેશ પટેલે દીકરાને કાર ગિફ્ટમાં આપી હતી. ભાગીદારના નામે ગાડી લઈને પિતાએ દીકરાને ગાડી ગિફ્ટમાં આપી હતી. પોલીસ કોન્સ્ટેબલ, હોમગાર્ડ જવાન સહિત 9 લોકોનો ભોગ લેનાર જેગુઆર ગાડી દોઢ વર્ષ પહેલા તથ્ય પટેલને ગિફ્ટમાં મળી હતી. દોઢ વર્ષમાં આ જેગુઆર કારથી તથ્ય પટેલ 3 વખત અકસ્માત કરી ચૂક્યો છે.

સાંતેજના બળિયાદેવ મંદિરમાં ઘૂસાડી હતી કાર
એક અકસ્માત તો ગાડીના રજિસ્ટ્રેશન પહેલા જ થયો હતો.  જેગુઆર ગાડી ગિફ્ટમાં મળ્યાના 15 દિવસ બાદ જ તેણે ગાડીને ઠોકી દીધી હતી. 1 જાન્યુઆરીએ વહેલી સવારે તથ્યએ બેફામ રીતે જેગુઆર ગાડી હંકારીને ગાંધીનગર જિલ્લાના એક મંદિરમાં ઘુસાડી દીધી હતી. જેમાં મંદિરને નુકસાન પહોંચ્યું હતું. તથ્ય પટેલે 6 મહિના પહેલા ગાંધીનગરના એક મંદિરમાં જેગુઆર કાર ઘુસાડી હતી. નવા વર્ષની પાર્ટીમાં ગયેલા તથ્ય પટેલે વાંસજડા ગામની ભાગોડે સાણંદ જતા મેઈન રોડ પર બળિયાદેવના મંદિરમાં કાર ઘુસાડી દીધી હતી.

અત્યાર સુધીમાં તથ્ય સામે કેટલી ફરિયાદ નોંધાઈ?
19 જુલાઈની મોડી રાત્રે એસજી હાઈવે પર ફૂલ સ્પીડમાં કાર ચલાવી ઇસ્કોન બ્રિજ પર 9 લોકોના જીવ લેનાર તથ્ય સામે અત્યાર સુધીમાં 3 ફરિયાદ નોંધાઈ ચૂકી છે. જે ત્રણેય ફરિયાદ અકસ્માતની છે. એક ફરિયાદ ઇસ્કોન બ્રિજ અકસ્માત, બીજી સિંધુભવન રોડ અકસ્માત અને ત્રીજી ફરિયાદ આજે નોંધાઈ છે. ગાંધીનગરના સાંતેજ પોલીસ સ્ટેશનમાં તથ્ય પટેલ સામે ફરિયાદ નોંધાઈ છે. તથ્યએ 6 મહિના પહેલા ગાંધીનગરના એક મંદિરમાં જેગુઆર કાર ઘુસાડી હતી. નવા વર્ષની પાર્ટીમાં ગયેલા તથ્ય પટેલે વાંસજડા ગામની ભાગોડે સાણંદ જતા મેઈન રોડ પર બળિયાદેવના મંદિરમાં કાર ઘુસાડી દીધી હતી. આ મામલે સાંતેજ પોલીસે તથ્ય પટેલ સામે ગુનો નોંધી કાર્યવાહી હાથ ધરી છે.