- શેરબજારમાં સતત પાંચમાં દિવસે તેજીનો સંચાર
- રિઝર્વ બેન્ક ઓફ ઇન્ડિયા વ્યાજ દર મામલે નિર્ણયને લઈ તેજી
- સેન્સેક્સ 59,844 પર અટક્યો હતો તો નિફટી 17,600 પર બંધ
શેરબજારમાં સતત પાંચમાં દિવસે તેજીનો સંચાર જોવા મળ્યો છે. નવા નાણાકીય વર્ષના પ્રથમ સપ્તાહમાં માર્કેટ મોજમાં હોય તેમ રોજેરોજ સેન્સેક્સ અને નિફ્ટી વધારા સાથે બંધ થઈ રહ્યા છે. ત્યારે આજે પણ આ વધારાનો સિલસિલો યથાવત રહેવા પામ્યો હતો. પરિણામે આજે સેન્સેક્સ 155 વધીને 59,844 પર અટક્યો હતો તે જ રીતે 43 પોઇન્ટના ઉછાળા સાથે નિફટી 17,600 પર પહોંચ્યો હતો. જેને લઈને સ્ટોક માર્કેટમાં રોકાણ કરતા લોકો ગેલમાં આવી ગયા હતા.
સેન્સેક્સ અને નિફ્ટીમાં જબરદસ્ત ઉછાળો
નવા નાણાકીય વર્ષના પ્રારંભની સાથે જ બજારમાં વધારા સાથેના આવકારદાયક સંકેતો દેખાયા હતા. જે આજ સુધી યથાવત રહ્યા છે અને ત્રણ દિવસના ટ્રેડિંગ સેશન દરમિયાન સેન્સેક્સ અને નિફટીમાં 1.6 ટકા સુધીનો વધારો નોંધાયો છે. આવી સ્થિતિ વચ્ચે રિઝર્વ બેન્ક ઓફ ઇન્ડિયા દ્વારા આજે વ્યાજ દરમાં કોઈ પણ ફેરફાર ન કરી અને જુનો દર યથાવત રાખવામાં આવ્યો તેવા સમાચાર વહેતા થતાની સાથે જ બજારમાં તેજી જોવા મળી હતી. પરિણામે પ્રારંભના સમયગાળા દરમિયાન નબળાઈનો માર સહન કર્યા બાદ સેન્સેક્સ અને નિફ્ટીમાં જબરદસ્ત ઉછાળો જોવા મળ્યો હતો.
સેન્સેક્સ 59844 તથા નિફ્ટી 17600 પર બંધ
આજે સેન્સેક્સ 59844 તથા નિફ્ટી 17600 ની સપાટી પર બંધ રહ્યા હતા. આજે બજાજ ફાઇનાન્સના શેરમાં 2.9% નો ઉછાળો આવ્યો છે તો ટાટા મોટર્સના શેરમાં 2.6% નો વધારો નોંધાયો છે એ જ રીતે બજાજ ફિનસર્વ માં પણ 1.9 ટકા અને સન ફાર્મામાં 1.5 ટકાનો વધારો આવતા રોકાણકારોને જલસા પડી ગયા હતા. બીજી બાજુ એચસીએઆ 1.76 ટકા અને , ઓએનજીસીમાં 1.5 ટકા તથા આઇસીઆઈસીઆઈ બેંકમા પણ 1 ટકાનો ઘટાડો થયો હતો તો ટેક મહિન્દ્રાના શેરમાં પણ 0.98 ટકાનો કડાકો થયો હતો.
