- કેરળના અલપ્પુઝાથી કન્નુર જતી ટ્રેનમાં ગોધરા જેવો કાંડ
- અલપ્પુઝાથી કન્નુર જતી ટ્રેનમાં આગ કેસમાં પોલીસને મોટી સફળતા
- ATS અને સેન્ટ્રલ ઈન્ટેલિજન્સનાં સંયુક્ત ઓપરેશનમાં ફરાર શાહરૂખ સૈફી ઝડપાયો
કેરળના અલપ્પુઝાથી કન્નુર જતી ટ્રેનમાં ગોધરા જેવો કાંડની ઘટના સામે આવી છે. વાત જાણે એમ છે કે, અલપ્પુઝાથી કન્નુર જતી ટ્રેનમાં આગ લગાવવાના કેસમાં પોલીસને મોટી સફળતા મળી છે. મહારાષ્ટ્ર ATS અને સેન્ટ્રલ ઈન્ટેલિજન્સનાં સંયુક્ત ઓપરેશનમાં ફરાર શાહરૂખ સૈફીની મહારાષ્ટ્રના રત્નાગીરીમાંથી ધરપકડ કરવામાં આવી છે. ધરપકડ બાદ આ માહિતી કેરળ પોલીસને પણ આપવામાં આવી હતી. હાલ કેરળ પોલીસ પણ રત્નાગીરી પહોંચી ગઈ છે. હવે પકડાયેલા આરોપીઓને કેરળ પોલીસને સોંપવામાં આવશે. ટ્રાન્ઝિટ રિમાન્ડ લીધા બાદ પોલીસ આરોપીને લઈને કેરળ જવા રવાના થશે.
કેરળના અલપ્પુઝાથી કન્નુર જતી ટ્રેનમાં આગની ઘટનામાં લોકોએ પોતાનો જીવ બચાવવા માટે ટ્રેનમાંથી કૂદવાનો પ્રયાસ કર્યો હતો. જ્યારે ઘણા લોકો ટ્રેનમાંથી પડી ગયા. આ ભયાનક ઘટનામાં એક બાળકી સહિત ત્રણ લોકોના મોત થયા છે જ્યારે અનેક મુસાફરો ઘાયલ થયા છે. આ ઘટનામાં નવ લોકો દાઝી ગયા છે, જેમને કોઝિકોડની ઘણી હોસ્પિટલમાં દાખલ કરવામાં આવ્યા છે.
આરોપીઓ સામે ગુનો દાખલ
આ મામલે પોલીસે આરોપી સામે ગુનો નોંધ્યો હતો. રવિવારે મોડી રાત્રે ટ્રેનમાં આગ લાગવાથી એક મહિલા, એક શિશુ અને એક પુરુષ ગુમ થયા હતા, જેમના મૃતદેહ બાદમાં એલહત્તુર રેલ્વે સ્ટેશન નજીકના પાટા પરથી મળી આવ્યા હતા. આ કેસમાં પોલીસે સ્થળ પર હાજર સાક્ષીઓની પૂછપરછ કરી હતી. જે બાદ આરોપીનો સ્કેચ બનાવવામાં આવ્યો હતો.
આગ પર કાબુ મેળવાયો
અલપ્પુઝાથી કન્નુર જતી ટ્રેનમાં આગ લાગવાની ઘટના બાદ તરત જ મુસાફરોએ રેલવે પ્રોટેક્શન ફોર્સ (RPF)ને જાણ કરી અને આગ પર કાબુ મેળવ્યો. શરૂઆતમાં પોલીસને શંકા હતી કે આરોપી ઉત્તર ભારતીય હોઈ શકે છે. જેણે કાવતરું ઘડ્યું અને આ ઘટનાને અંજામ આપ્યો, કારણ કે તેની બેગમાં એક બોટલમાં પેટ્રોલ હતું.
