ઢીલી નીતિ? / મોરબી બ્રિજ દુર્ઘટના: ગુજરાત સરકારે આરોપી 2 ક્લાર્કના જામીન વિરુદ્ધ અરજી ન કરી, પીડિત પરિવારોએ ફેક્યો કોર્ટમાં પડકાર

• મોરબી ઝૂલતા પુલ દુર્ઘટના કેસ
• પીડિત પરિવારોએ કરી અરજી
• 2 ક્લાર્કને અપાયેલા જામીનને પડકાર્યા

Morbi Bridge Collapse case : મોરબી બ્રિજ દુર્ઘટના મામલે મહત્વના સમાચાર સામે આવ્યા છે. બ્રિજ દુર્ઘટનામાં 2 ક્લાર્કને અપાયેલા જામીનને સુપ્રીમકોર્ટમાં પડકારાયા છે. અત્રે જણાવીએ કે, ગુજરાત સરકારના બદલે પીડિત પરિવારોએ સુપ્રીમકોર્ટમાં અરજી કરવી પડી છે. 

ગુજરાત હાઇકોર્ટે આપ્યા હતા જામીન 
ગુજરાત સરકારે આરોપી 2 ક્લાર્કના જામીન વિરુદ્ધ અરજી ન કરી હતી જેને લઈ પીડિત પરિવારોએ અરજી કરી છે. ગુજરાત હાઈકોર્ટે ટિકિટ વહેંચનાર 2 ક્લાર્કને જામીન મંજૂર કર્યા છે. જે સમગ્ર મામલાને લઈ પીડિત પરિવારોની અરજી પર આવતીકાલે સુપ્રીમકોર્ટમાં સુનાવણી હાથ ધરવામાં આવશે. 

બ્રિજ ખુલ્લો મુકાયાના 5 દિવસમાં ધરાશાયી થયો હતો 
મોરબીની મચ્છુ નદી પર આવેલા ઝૂલતા પુલનું રિનોવેશન ઓરેવા કંપનીએ રૂપિયા 2 કરોડના ખર્ચે કર્યું હતું. ભારતમાં સીએફએલ અને એલઈડી બલ્બમાં 1 વર્ષની વોરંટી આપવાની શરુઆત ઓરેવાએ કરી હતી. પરંતુ તેઓ આ વોરંટી પોતે રિનોવેટ કરેલા મોરબીના ઝૂલતા પુલ પર ન આપી શક્યા. 26 ઓક્ટોબરથી મોરબીનો ઝૂલતો પુલ ખુલ્લો મુકવામાં આવ્યો હતો તથા 12થી 15 વર્ષની મજબૂતાઈની ગેરંટી આપવામાં આવી હતી. જે 5 દિવસની અંદર તૂટ્યો અને 135 લોકો કાળનો કોળિયો બની જતાં હાહાકાર મચી ગયો હતો. આ દુર્ઘટના બાદ કંપનીના એમડી જયસુખ પટેલ ભૂગર્ભમાં ઉતરી ગયા હતો. બાદમાં તેની ધરપકડ કરવામાં આવી હતી. 

શું છે મામલો?
30 ઓક્ટોબર 2022ના રોજ ઝૂલતો પુલ તૂટવાની બની હતી ઘટના
ઘટનામાં 135 લોકોએ ગુમાવ્યો હતો જીવ
દુર્ઘટના કેસમાં અત્યાર સુધી 9 આરોપીની ધરપકડ કરવામાં આવી હતી
જયસુખ પટેલની આગોતરા જામીનની અરજીમાં સુનાવણી ટળી હતી
ગુજરાત હાઈકોર્ટે ટિકિટ વહેંચનાર 2 ક્લાર્કને જામીન મંજૂર કર્યા 
2 ક્લાર્કને અપાયેલા જામીન મામલે સુપ્રિમ કોર્ટમાં પડકાર્યા