બિગ ન્યૂઝ / હવે ત્રીજા બાળક પર પણ મળશે એક વર્ષની મેટરનિટી લીવ, આ રાજ્ય સરકારનું એલાન

મહિલા કર્મચારીઓના સામાજિક સશક્તિકરણ અને કલ્યાણ તરફ એક મોટો નિર્ણય લેતા તમિલનાડુ સરકારે એક મહત્વપૂર્ણ જાહેરાત કરી છે. રાજ્યની સરકારી મહિલા કર્મચારીઓને હવે ત્રીજા બાળકના જન્મ પર પણ 12 અઠવાડિયા (84 દિવસ) ને બદલે પૂરા 365 દિવસ (1 વર્ષ) ની મેટરનિટી લીવ મળશે. આ સુવિધા અત્યાર સુધી માત્ર પ્રથમ બે બાળકોના જન્મ સુધી જ મર્યાદિત હતી.

વિધાનસભામાં પોતાના વિભાગની અનુદાન માંગણીઓ પરની ચર્ચા દરમિયાન માનવ સંસાધન પ્રબંધન મંત્રી ડી. શરતકુમારે આ નિર્ણયની જાણકારી આપી હતી. શરતકુમારે જણાવ્યું હતું કે આ નવા નિયમને લાગુ કરવા માટે ટૂંક સમયમાં જ એક વિસ્તૃત સરકારી આદેશ જારી કરવામાં આવશે. ગૃહને સંબોધિત કરતા શરતકુમારે કહ્યું હતું કે, તમિલનાડુ સરકાર એક કલ્યાણકારી પ્રશાસન છે જે સામાજિક કલ્યાણ અને મહિલા સશક્તિકરણને પ્રાથમિકતા આપે છે. આ બાબતોને ધ્યાનમાં રાખીને, સરકારી મહિલા કર્મચારીઓને ત્રીજા બાળક માટે મળતી 12 અઠવાડિયાની મેટરનિટી લીવ વધારીને 365 દિવસ કરવામાં આવશે.

હાલના નિયમોમાં કરવામાં આવ્યો ફેરફાર

હાલના નિયમો અનુસાર તમિલનાડુમાં બે કરતાં ઓછા હયાત બાળકો ધરાવતી પરિણિત મહિલા સરકારી કર્મચારીઓને 365 દિવસની સવેતન (Paid) મેટરનિટી લીવ આપવામાં આવે છે. જોકે, બે કરતાં વધુ બાળકો હોય તો મહિલાઓને માત્ર 12 અઠવાડિયા (84 દિવસ) ની જ રજા મળતી હતી, જેને હવે વધારીને પૂરૂં 1 વર્ષ કરવાનો નિર્ણય લેવાયો છે.

સમય જતાં આ રીતે બદલાયા નિયમો

તમિલનાડુમાં મેટરનિટી લીવના સમયગાળામાં સમયાંતરે વધારો કરવામાં આવ્યો છે:

2011 માં: 90 દિવસની રજા વધારીને 6 મહિના કરવામાં આવી હતી.

2016 માં: આ રજા લંબાવીને 9 મહિના કરાઈ હતી.

જુલાઈ 2021 માં: રાજ્ય સરકારે તેને વધારીને 1 વર્ષ (365 દિવસ) કરી દીધી હતી.

આ પણ વાંચોઃ નેશનલ / પહેલી પત્નીને છૂટાછેડા આપ્યા વગર બીજા લગ્ન કર્યા તો 20% પગાર કપાશે! જાણો સરકારનો નિયમ

સરકારના આ નવા નિર્ણયથી ત્રીજા બાળકની યોજના બનાવી રહેલી રાજ્ય સરકારની મહિલા કર્મચારીઓને મોટી રાહત મળશે અને તેઓ પોતાના બાળકની દેખભાળ વધુ સારી રીતે કરી શકશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ