- પંજાબ-હરિયાણા હાઈકોર્ટ તરફથી તજિન્દર બગ્ગાને મોટી રાહત
- બગ્ગા ધરપકડ પર સ્ટે માટે અરજી લઈને હાઈકોર્ટમાં પહોંચ્યા હતા
- મોહાલી કોર્ટે બગ્ગાની ધરપકડ કરવાનો આદેશ આપ્યો હતો
ભારતીય જનતા પાર્ટીના નેતા તજિન્દર પાલ સિંહ બગ્ગાની ધરપકડ 10 મે સુધી ટાળી દેવાઇ છે. પંજાબ-હરિયાણા હાઈકોર્ટ (HC) એ બગ્ગાની ધરપકડ વોરંટ સામેની અરજી પર સુનાવણી કર્યા બાદ આ નિર્ણય લીધો હતો. મોહાલી કોર્ટ દ્વારા જારી કરાયેલ ધરપકડ વોરંટ સામે બગ્ગાએ શનિવારે મોડી સાંજે પંજાબ-હરિયાણા હાઈકોર્ટમાં અરજી કરી હતી. કોર્ટે જસ્ટિસ અનૂપ ચિતકારાના નિવાસસ્થાને સુનાવણીની મંજૂરી આપી હતી. ત્યારે મધ્યરાત્રિએ અરજીની સુનાવણી થઈ અને બગ્ગાને હાઈકોર્ટ તરફથી રાહત મળી હતી.
આ અગાઉ, મોહાલી કોર્ટ દ્વારા બગ્ગા વિરુદ્ધ નવું ધરપકડ વોરંટ પણ જાહેર કરવામાં આવ્યું હતું. મોહાલી કોર્ટે પંજાબ પોલીસની સાયબર ક્રાઈમ બ્રાન્ચને બગ્ગાની ધરપકડ કરીને કોર્ટમાં રજૂ કરવાનો આદેશ આપ્યો હતો. ત્યાર બાદ જ બગ્ગા શનિવારે રાત્રે પંજાબ-હરિયાણા હાઈકોર્ટ પહોંચ્યા અને ધરપકડ વોરંટને રદ કરવાની માંગ કરી. બગ્ગાની અરજી પર સુનાવણી કરતા જસ્ટિસ અનૂપ ચિતકારાએ કહ્યું હતું કે, તેજિંન્દર બગ્ગા સામે કોઈ પણ પ્રકારની જબરદસ્તી કાર્યવાહી ન કરવામાં આવે.
પિતાએ કહ્યું- પોલીસ ફસાવવાનો પ્રયાસ કરી રહી છે
બગ્ગાને ધરપકડમાંથી રાહત મળવા પર પિતા પ્રીતપાલ સિંહે ખુશી વ્યક્ત કરી હતી. પ્રીતપાલે કહ્યું કે, તેઓ (પંજાબ સરકાર) તેજિંન્દરને કોઈને કોઈ કેસમાં ફસાવવા માંગે છે. આથી હજુ વધારે એફઆઈઆર થઈ શકે છે, પરંતુ અમે પણ નહીં રોકાઇએ. આ લડાઈ લાંબા સમય સુધી ચાલશે. બીજેપી યુવા મોરચાના રાષ્ટ્રીય અધ્યક્ષ તેજસ્વી સૂર્યાએ પણ બગ્ગાની મુક્તિ પર ટ્વિટ કર્યું હતું. તેઓએ કહ્યું કે, કાયદાના શાસનની વધુ એક જીત થઈ છે.
જાણો કેમ પંજાબ પોલીસ બગ્ગાની ધરપકડ કરવા આવી હતી?
આમ આદમી પાર્ટીના નેતા ડૉ. સન્ની સિંહની ફરિયાદ પર મોહાલીમાં તેજિંન્દર પાલ સિંહ બગ્ગા વિરુદ્ધ ધાર્મિક લાગણીને ભડકાવવાનો કેસ નોંધવામાં આવ્યો હતો. બગ્ગાએ ફિલ્મ 'ધ કાશ્મીર ફાઇલ્સ' પર કરેલી ટિપ્પણી બાદ દિલ્હીના મુખ્યમંત્રી અરવિંદ કેજરીવાલ પર આકરા પ્રહારો કર્યા હતા. બગ્ગાએ સીએમ કેજરીવાલને કાશ્મીરી પંડિત વિરોધી ગણાવ્યા હતા. આથી કેસ નોંધાયા બાદ પંજાબ પોલીસ બગ્ગાની શોધમાં હતી. પંજાબ પોલીસ બગ્ગાની જ્યારે પહેલી વાર દિલ્હી આવી ત્યારે તેને બૈરંગ પરત ફરવું પડ્યું હતું. ત્યાર બાદ બીજેપી નેતાઓના જણાવ્યાં અનુસાર, બીજી વખત પંજાબ પોલીસના લગભગ 50 જવાનો બગ્ગાને તેના ઘરેથી ઉઠાવીને પંજાબ લઈ જઈ રહ્યાં હતા, જેમને દિલ્હી પોલીસની અપીલ બાદ હરિયાણા પોલીસે અટકાવ્યા હતા.
