Lok Sabha Election 2024 : લોકસભા ચૂંટણી સંદર્ભે કોંગ્રેસને લઈ સૌથી મોટી અપડેટ સામે આવી છે. વાત જાણે એમ છે કે, ગાંધી પરિવારનો ગઢ ગણાતી ઉત્તરપ્રદેશની અમેઠી અને રાયબરેલી બેઠકો અંગે કોંગ્રેસે હજુ સુધી તેનું પત્તું ખોલ્યું નથી. દરમિયાન સૂત્રોએ જણાવ્યું કે, કોંગ્રેસ નેતા રાહુલ ગાંધી અમેઠીને બદલે રાયબરેલીથી ચૂંટણી લડી શકે છે. કોંગ્રેસ અમેઠીથી કેએલ શર્માને ભાજપના ઉમેદવાર અને કેન્દ્રીય મંત્રી સ્મૃતિ ઈરાની સામે મેદાનમાં ઉતારી શકે છે. પાર્ટી ગુરુવારે (2 મે, 2024) બપોરે UPની બંને બેઠકો માટે ઉમેદવારોની જાહેરાત કરી શકે છે.
પ્રિયંકા ગાંધી ક્યાંથી ચૂંટણી લડશે?
સૂત્રોએ જણાવ્યું કે, રાહુલ ગાંધીએ કોંગ્રેસના પૂર્વ અધ્યક્ષ અને તેમની માતા સોનિયા ગાંધીની સલાહ પર પોતાના નિર્ણય પર પુનર્વિચાર કર્યો છે. એ સ્પષ્ટ થઈ ગયું છે કે, પ્રિયંકા ગાંધી રાયબરેલીથી લોકસભાની ચૂંટણી નહીં લડે. જોકે અત્યાર સુધી રાજકીય વર્તુળોમાં એવી અટકળો ચાલી રહી હતી કે, સોનિયા ગાંધીએ સક્રિય રાજકારણમાંથી નિવૃત્તિ લીધા બાદ કોંગ્રેસ પ્રિયંકા ગાંધીને રાયબરેલીથી ટિકિટ આપી શકે છે.
રાહુલ ગાંધીને લઈ શું અપડેટ ?
રાહુલ ગાંધી 2004થી 2019 સુધી અમેઠીના સાંસદ રહી ચૂક્યા છે. તેમણે કેરળની અમેઠી અને વાયનાડ બેઠકો પરથી 2019ની લોકસભા ચૂંટણી લડી હતી પરંતુ અમેઠીમાં કેન્દ્રીય મંત્રી સ્મૃતિ ઈરાની સામે ચૂંટણી હારી ગયા હતા. આ વખતે પણ રાહુલ ગાંધી વાયનાડ બેઠક પરથી ચૂંટણી લડ્યા છે. જોકે અમેઠી અને રાયબરેલીમાં 20મી મેના રોજ મતદાન થવાનું છે. બંને સીટો પર નોમિનેશન પ્રક્રિયા 3 મે સુધી ચાલુ રહેશે.
વધુ વાંચો: કેસરગંજ સીટથી બ્રિજભૂષણ શરણસિંહની ટિકિટ કટ! તો BJP હવે કોને મેદાનમાં ઉતારે તેવી શક્યતા
નોંધનિય છે કે, સ્મૃતિ ઈરાનીએ અમેઠી બેઠક પરથી ઉમેદવારી નોંધાવી છે. વાસ્તવમાં વિપક્ષી ગઠબંધન 'INDIA'નો ભાગ બનેલી સમાજવાદી પાર્ટી ઉત્તર પ્રદેશમાં કોંગ્રેસ સાથે મળીને ચૂંટણી લડી રહી છે. ઉત્તરપ્રદેશમાં ગઠબંધનમાં કોંગ્રેસને 80માંથી 17 સીટો આપવામાં આવી છે. આ 17 સીટોમાં અમેઠી અને રાયબરેલીનો સમાવેશ થાય છે.
