IPL 2024ની 49મી મેચ ચેન્નાઈ સુપર કિંગ્સ અને પંજાબ કિંગ્સ વચ્ચે રમાઈ હતી. આ મેચમાં ભલે પંજાબ કિંગ્સનો 7 વિકેટે વિજય થયો હતો અને ચેન્નાઈને હારનો સામનો કરવો પડ્યો હતો, પરંતુ ચેન્નાઈ સુપર કિંગ્સના કેપ્ટન રૂતુરાજ ગાયકવાડે 62 રનની શાનદાર ઈનિંગ રમી હતી અને તેની સાથે તે આઈપીએલ 2024માં ઓરેન્જ કેપ હોલ્ડર પણ બન્યો હતો.
ઋતુરાજ ગાયકવાડે IPL 2024માં બુધવારે પંજાબ કિંગ્સ સામે 48 બોલમાં 62 રન બનાવ્યા હતા. આ સાથે ઋતુરાજે ચેન્નાઈ માટે 10 મેચમાં 509 રન બનાવ્યા છે, જે આઈપીએલ 2024માં આ સૌથી વધુ રન છે અને વિરાટ કોહલીને પાછળ છોડીને સૌથી વધુ રન બનાવનાર ખેલાડી બની ગયો છે. આ મેચ પહેલા સૌથી વધુ રનનો રેકોર્ડ વિરાટ કોહલીના નામે હતો. વિરાટે આ T20 લીગમાં 10 મેચમાં 500 રન બનાવ્યા છે.
આ સાથે જ ઋતુરાજ ગાયકવાડે ઈતિહાસ રચ્યો અને IPL સિઝનમાં 500 થી વધુ રન બનાવનાર ચેન્નાઈ સુપર કિંગ્સનો પ્રથમ કેપ્ટન બની ગયો છે. ઓરેન્જ કેપની રેસમાં સાઈ સુદર્શન ત્રીજા સ્થાને છે, જેણે ગુજરાત ટાઇટન્સ માટે 10 મેચમાં 418 રન બનાવ્યા છે. કેએલ રાહુલ 406 રન સાથે ચોથા સ્થાને છે. જ્યારે ઋષભ પંતે દિલ્હી કેપિટલ્સ માટે અત્યાર સુધીમાં 398 રન બનાવ્યા છે.
મેચની વાત કરીએ તો બુધવારે પંજાબ કિંગ્સ સામે પ્રથમ બેટિંગ કરવા આવેલી ચેન્નાઈ સુપર કિંગ્સે નિર્ધારિત 20 ઓવરમાં 7 વિકેટ ગુમાવીને 162 રન બનાવ્યા હતા. જેમાં કેપ્ટન રૂતુરાજ ગાયકવાડે 48 બોલમાં પાંચ ચોગ્ગા અને બે છગ્ગાની મદદથી 62 રનની ઇનિંગ રમી હતી. જવાબમાં પંજાબ કિંગ્સ ટીમે ત્રણ વિકેટના નુકસાને 17.5 ઓવરમાં લક્ષ્યાંક હાંસલ કરી લીધો હતો અને 7 વિકેટે જીત મેળવી હતી.
ચેન્નાઈના 10 મેચમાં 5 જીત અને 5 હાર સાથે 10 પોઈન્ટ છે અને તેની નેટ રન રેટ હવે +0.627 છે. જો કે ચેન્નાઈ હજુ પણ ચોથા સ્થાને છે. પંજાબની વાત કરીએ તો તેને 10 મેચમાં ચોથી જીત મળી છે. પંજાબના 8 પોઈન્ટ છે અને તેનો નેટ રન રેટ -0.062 છે. ટીમ આઠમા સ્થાને હતી અને આ જીત બાદ તેના રેન્કમાં ફેરફાર થયો છે. પંજાબની ટીમ સાતમા સ્થાને પહોંચી ગઈ છે.
