- પેકેટ ડ્રિંક્સમાં આપાતા કાગળના સ્ટ્રો પણ છે ખતરનાક
- કેમિકલની અસર શરીર પર પડતી હોવાનું ડરામણું તથ્ય
- બેલ્જિયમના સંશોધકો દ્વારા કરાયેલ સ્ટડીમાં દાવો
માનવ સ્વાસ્થ્ય માટે હાનિકારક અને ખતરનાક ગણાતા પ્લાસ્ટિકનો ઉપયોગ ટાળવા માટે સરકાર જહેમતશીલ છે. આ મામલે સરકાર દ્વારા અનેક નિર્ણયો લેવામાં આવી રહ્યા છે. પરિણામે હવે આપણે કોઈપણ રેસ્ટોરન્ટમાં કે હોટલોમાં જઈએ ત્યારે પ્લાસ્ટિકની જગ્યાએ પેકેટ ડ્રિંક્સમાં કાગળનાં સ્ટ્રો આપવામાં આવે છે. પરંતુ આવી સ્થિતિ વચ્ચે એક સર્વે સામે આવ્યો છે. જેમાં પેપરના આ સ્ટ્રોને પણ ખતરનાક ગણવામાં આવ્યા છે. સ્ટ્રો બનાવતી વખતે વપરાતા કેમિકલની અસર શરીર પર પડતી હોવાનું ડરામણું તથ્ય બહાર આવ્યું છે. તો આવો જાણીએ રિપોર્ટના પરિણામ વિષે વિસ્તારથી!
પરફ્લુરોઆલ્કિવ (pfas) પદાર્થ પણ મળ્યા
એક ખાનગી ન્યુઝના અહેવાલ મુજબ બેલ્જિયમના સંશોધકો દ્વારા એક સ્ટડી હાથ ધરવામાં આવ્યો હતો. જેમાં સામે આવ્યું છે કે પેપર સ્ટ્રો મારફતે પીવામાં આવતું પીણું નુકસાનકારક સાબિત થઈ શકે છે. અભ્યાસમાં એવો પણ દાવો કરવામાં આવ્યો છે કે સ્ટ્રોમાં અમુક ઝેરી કેમિકલ હોવાથી તે જોખમી ઉપરાંત અન્ય જીવો અને પર્યાવરણ માટે પણ તે ખતરો ઉભો કરી શકે છે. સાથે સાથે અમુક સ્ટ્રોના સંશોધન દરમિયાન તેમાંથી પોલી અને પરફ્લુરોઆલ્કિવ (pfas) પદાર્થ પણ મળી આવ્યાનુ અભ્યાસમાં ફલિત થયું છે.
સ્ટીલના સ્ટ્રોમાં આ પ્રકારના કેમિકલ્સની ગેરહાજરી
પીએફએએસ એવો પદાર્થ છે જે લાંબા સમય સુધી જીવિત રહી શકે છે વધુમાં તે માણસના આરોગ્ય માટે ખૂબ જ ખતરનાક છે અને બજારમાં મળતા પેપર સ્ટ્રોની ૨૦ થી ૧૮ કંપનીઓમાં તે જોવા મળે છે. જોકે તે કોલડ્રિન્કમાં ધોવાઈ જાય છે કે કેમ ? તે હજુ જાણી શકાયું નથી. આ નુકસાનકારક કેમિકલ્સથી થાઈરોઈડ, કોલેસ્ટ્રોલ લીવરની સમસ્યા અને કિડનીનું કેન્સર સહિતની અનેક સમસ્યાઓ માથું ઊંચકી શકે છે. જોકે સ્ટીલના સ્ટ્રોમાં આ પ્રકારના કેમિકલ્સ મળ્યા નથી.
